Dökkar súkkulaði og piparmyntu smákökur

Mér þykir alltaf gaman að prófa að minnsta kosti eina nýja smáköku uppskrift fyrir aðventuna og hafði haft augastað á súkkulaði piparmyntukökum lengi. Þegar ég rakst á þessar kökur hjá Jessie Seinfeld (mæli með blogginu hennar og bókinni!) þá var ekki aftur snúið. Þetta eru ótrúlega einfaldar og ljúffengar kökur, ég breytti uppskriftinni örlítið frá hinni upprunalega, stækkaði hana og bætti við dökku Pipp súkkulaði með myntufyllingu. Jessie setur piparmyntu extract (sem er bara sama og piparmyntudropar) í sína uppskrift. Ég sleppti þeim því mér fannst koma nógu mikið myntubragð af Pipp súkkulaðinu. Eins finnst mér piparmyntuextract einstaklega vand með farið hráefni í bakstri því það þarf ótrúlega lítið að sullast aukalega út í deigið til að kökurnar bragðist eins og tannkrem.. Ekki svo gott kannski. En ef þið eruð mikið fyrir afgerandi myntubragð mætti eflaust alveg bæta eins og 1/4 tsk af piparmyntudropum til viðbótar í deigið.

Ég mæli að sjálfsögðu með þessum kökum. Þær hafa allavega fest sig í sessi á mínum smákökulista! Uppskriftin er talsvert stór, en úr henni ættu að fást alveg um 40 vænar kökur. Hana mætti auðveldlega helminga. Deigið geymist vel í ísskáp í 2-3 daga. Eins má pakka því vel inn í plast og frysta það og baka jafn óðum. Þannig eru kökurnar líka langbestar, nýbakaðar.

Dökkar súkkulaði og piparmyntu smákökur

• 5 dl hveiti
• 1 tsk lyftiduft
• 1/2 tsk matarsódi
• 1/2 tsk salt
• 120 gr smjör, brætt
• 2,5 dl kakó (ég mæli með Konsúm kakóinu frá Nóa Siríus)
• 3 dl púðursykur
• 2 dl sykur
• 4 egg
• 1/4 tsk piparmyntudropar (má sleppa og nota í staðin piparmyntusúkkulaði)
• 200 gr dökkt piparmyntusúkkulaði, t.d. Pipp
• Flórsykur (til að velta kökunum upp úr fyrir bakstur)

Aðferð:

1. Hrærið saman í skál, hveiti, lyftidufti, matarsóda og salti og setjið til hliðar.
2. Blandið saman kakói, púðursykri og sykri.
3. Bræðið smjörið og hellið saman við sykurblönduna, pískið vel saman.
4. Bætið eggjunum út í einu í einu og hrærið vel á milli.
5. Brjótið súkkulaðið út í deigið og hrærið aðeins.
6. Setjið hveitiblönduna saman við og blandið vel saman (ég kýs að hafa súkkulaðibitana stóra í deiginu, ef þið viljið getið þið líka saxað þá fyrst gróft og sett svo út í. Ég læt hrærivélina um að brjóta þá saman við deigið, þá verða sumir stórir og aðrir minni).
7. Setjið plastfilmu yfir skálina og geymið í ísskáp í a.m.k. eina klst fyrir bakstur. Fínt að geyma það yfir nótt.
8. Hitið ofn í 180 gráður. Takið deigið með matskeið, rúllið í kúlu milli lófanna og veltið ríkulega upp úr flórsykri. Athugið að deigið er frekar klístrað og best að meðhöndla það beint úr ísskáp.
9. Leggið á bökunarpappírsklædda plötu og bakið í 10 mínútur. Kökurnar eiga að vera svolítið seigar í miðjunni.
10. Leyfið að kólna aðeins á plötunni áður en þið takið þær af.