helenagunnarsd

Mikil uppáhalds uppskrift sem hefur fylgt mér lengi. Ég setti hana fyrst hér inn á bloggið árið 2016. Hér er hún komin aftur örlítið uppfærð og breytt þó sú gamla standi nú algjörlega fyrir sér ennþá. Þetta er líklega eitt það besta sem ég veit og er í alvöru sáraeinfalt að elda. Aðalmálið að vera dálítið þolinmóður og leyfa þessu að malla í rólegheitum. Fullkominn helgarmatur!

Hægeldaðir lambaleggir í rauðvínssósu (fyrir fjóra)

• 4 vænir lambaleggir (350-400 gr stykkið)
• 2 laukar
• 1 stór gulrót
• 1 fennel
• 2-4 hvítlauksrif
• 2 msk tómatpurré
• 3-4 dl rauðvín
• 5 dl vatn
• 2 msk nautakraftur (Ég nota fljótandi Oscar kraft)
• 1 msk ferskt timían, gróft saxað (eða 1 tsk þurrkað)
• 3 þurrkuð lárviðarlauf
• Smjör, sjávarsalt og svartur pipar

Aðferð: Hitið ofn í 140 gráður (ég nota blástur). Kryddið kjötið vel með salti og pipar. Takið stóran pott, sem má fara í ofn og hitið á meðalháum hita á eldavél. Bræðið 1 msk af smjöri í pottinum, brúnið kjötið vel á öllum hliðum og takið það svo uppúr pottinu. Skerið grænmetið í frekar grófa teninga. Bræðið 1 msk í viðbót af smjöri í pottinum og steikið grænmetið þar til það mýkist aðeins. Setjið tómatpurré út í og steikið áfram. Hellið rauðvíninu yfir og skrapið vel botninn á pottinum. Leyfið að sjóða niður í eina mínútu.

Hellið vatninu og kraftinum saman við. Setjið kjötið út í pottinn og lok ofan á þannig að það sé örlítil rifa til að sleppa gufunni út. Hleypið suðunni upp og setjið svo inn í ofn í 2,5-3 klukkustundir, hafið örlitla rifu á lokinu áfram inni í ofninum.

Takið úr ofninum að loknum eldunartíma. Veiðið kjötbitana upp úr og geymið undir álpappír. Setjið pottinn á eldavélina, kveikið undir á háum hita og sjóðið sósuna niður þangað til að sósan er um það bil helmingi minni en var í upphafi eldunar. Smakkið ykkur til.

Ef ykkur finnst sósan of þunn má þykkja hana með örlitlum sósujafnara eða 2 tsk af hveiti stöppuðu saman við 1 msk af mjúku smjöri, pískað saman við sósuna á meðan hún sýður. Berið lambaleggina fram með góðri rótagrænmetis, blómkáls eða kartöflumús.

Mjúkir svampbotnar með stökkum möndlum, silkimjúku vanillu mascarpone-kremi og jarðarberjum. Þetta er sneið af sumri og svona terta sem maður þarf eiginlega tvær sneiðar af..

Möndluterta með vanillukremi og jarðarberjum

Möndlu-svampbotnar

4 egg

200 g sykur

1 msk. vanillusykur

80 g hveiti

1 tsk. lyftiduft

200 g fínt hakkaðar möndlur (heilar möndlur með hýði og hakkaðar í matvinnusluvél, myndi ekki nota tilbúið möndlumjöl)

1 dl rjómi

Krem

400 g mascarpone

2 dl flórsykur

2 tsk. vanilluextraxt eða fræin úr heilli vanillustöng

4 dl rjómi

Fersk jarðarber eftir smekk

AÐFERÐ

Botnar:

Hitið ofn í 175°C gráður með blæstri (190°C gráður án blásturs, en ég mæli alltaf með að baka kökur á blástursstillingu ef hægt er).

Þeytið mjög vel saman egg, sykur og vanillusykur þar til blandan verður þykk, ljóst og létt. Í annarri skál blandið vel saman hveitinu, möndlunum og lyftiduftinu. Hrærið helmingnum af þurrefnunum varlega saman við eggjablönduna með sleif eða sleikju. Hellið þá rjómanum og restinni af þurrefnunum saman við og blandið vel en varlega saman.

Hellið deiginu í tvö hringlaga 24 cm form og bakið í um 16-18 mínútur eða þar til prjónn sem stungið er í miðja köku kemur hreinn upp. Kælið botnana alveg á grind og gerið kremið á meðan.

Krem:

Þeytið mascarpone, vanillu og flórsykur aðeins saman þar til osturinn er mjúkur og sléttur, hellið rjómanum saman við á meðan þið þeytið og þeytið allt áfram þar til blandan er orðin að þykku silkimjúku kremi.

Skerið nokkur jarðarber til að setja á milli botnanna og geymið nokkur til að skreyta tertuna.

Setjið um það bil helminginn af kreminu á neðri botninn, dreifið söxuðum jarðarberjum yfir og leggið hinn botninn ofan á. Setjið restina af kreminu á tertuna og skreytið fallega með berjum og ef til vill fallegum blómum. Tertuna má bera fram strax en hún verður jafnvel betri við að fá að standa aðeins í ísskáp.

Það geta allir bakað vatnsdeigsbollur. Líka þeir sem halda að þeir geti það ekki. Ég hef síðustu ár prófað nýja bollu uppskrift nánast á hverju ári og komist að því að þær heppnast allar sem ein ef nokkur heilræði eru höfð í huga sem ég hef tekið saman eftir mínar tilraunir, bæði misheppnaðar og vel heppnaðar. Ef þið nennið að lesa og fylgja þessu lofa ég að bollubaksturinn verður leikur einn.

– Ofninn þarf að vera vel heitur áður en bollurnar eru settar inn. Það hefur reynst mér best að hafa stillt á blástur með yfir og undirhita og blússhita svo ofninn upp 200 gráður. Það þýðir ekkert að setja bollur inn í volgan ofn.

– Það þarf að bræða smjörið í vatninu og hleypa svo suðunni upp. Hella svo hveitinu út í á meðan potturinn er enn á heitri hellunni (hef hana á miðlungs hita).

– Hræra deigið meira en maður heldur að þurfi í pottinum (með sleif). Þá gerast töfrarnir. Á þessu stigi á deigið að losna vel frá hliðunum og vera fallega glansandi og þykkt og þá er það tekið af hitanum. Þetta tekur ca. hálfa mínútu.

– Deigið þarf að kólna aðeins áður en eggin eru sett út í. Það er nóg að það kólni niður í um 40 gráður. Eða þannig að þægilegt sé að snerta það með fingrunum.

– Píska eggin saman í skál áður og setja þau svo smám saman út í deigið, ca 2-3 msk í einu og hræra vel á milli. Stundum þarf ekki alveg öll eggin t.d. ef þau eru mjög stór. Ef of mikið er sett af eggi er hætta á að deigið verði of þunnt og þá lyfta bollurnar sér verr. Þetta er gert annað hvort með handafli, hrærivél eða handþeytara. Skiptir ekki öllu máli, bara hræra vel (það tekur samt vel á að gera þetta með handafli).

– Deigið á að vera mjúkt, glansandi og dálítið teygjanlegt þegar það er tilbúið og ekki of þunnt. Gott er að miða við að ef þið takið spaðann á hrærivélinni eða sleif, stingið í deigið og lyftið upp ætti það að mynda lítið V sem hangir niður af sleifinni en helst samt frekar stöðugt og lekur ekki mikið niður.

– Deigið er sett á bökunarpappír á plötu með góðu millibili (ég set 12 bollur á plötu) og sett inn í ofninn (sprautað eða sett með skeiðum, skiptir ekki öllu máli).

– Best er að baka bara eina plötu í einu. Þannig er hitinn jafnastur og deigið þolir vel að standa í skálinni á meðan bakstur stendur yfir.

– Aldrei undir neinum kringumstæðum freistast til að opna ofninn áður en bollurnar eru tilbúnar. Þær eiga að hafa lyft sér mjög vel og vera fallega gullinbrúnar.

– Gott er að stinga lítið gat á hverja bollu til að hleypa gufunni út. Þegar þær eru bakaðar. Þær halda hæð sinni stundum betur sé þetta gert.

Að lokum kemur hér mín uppáhalds vatnsdeigs uppskrift sem gefur um það bil 24 nettar bollur.

300 ml vatn

100 gr smjör

4 tsk sykur

150 gr hveiti

4 egg (pískuð)

– Ofn hitaður í 200 gráður með blæstri. Deiginu sprautað eða sett með skeið á plötu (magn af deigi í hverja bollu ca. 1 msk) og bakað í 20-22 mínútur.

– Ef þið viljið stærri bollur er mikilvægt að lengja bökunartímann.

– Mér finnast klassískar rjómabollur bestar með jarðarberjasultu, rjóma og súkkulaðiglassúr og er því lítið að krúsidúllast með aðrar bragð samsetningar.

Vonandi bakið þið helling af bollum og eigið gleðilegan bolludag! Hann kemur bara einu sinni á ári svo njótið vel ❤️

Sérlega gómsæt og bragðmikil tómatsúpa með kjúklingi og rjómaosti sem tekur enga stund að elda.

– Uppskriftin var unnin í samstarfi við Gott í matinn –  

Rjómalöguð tómatsúpa með kjúkling (fyrir 4-5) 

3-4 kjúklingabringur, skornar í litla bita 

1 laukur, smátt saxaður 

2 hvítlauksrif, smátt söxuð 

1 rauð paprika, skorin í litla teninga 

2 msk smjör 

2 msk tilbúin tacokryddblanda að eigin vali 

2 msk tómatpaste 

2 dósir maukaðir tómatar 

800 ml kjúklingasoð (vatn og 1-2 teningar eða kraftur) 

250 ml rjómi frá Gott í matinn 

1 askja rjómaostur með grillaðri papriku og chilli frá Gott í matinn 

Salt og pipar 

Ofaná: Saxaðir tómatar, basil, vorlaukur og rifinn Mozarella frá Gott í matinn 

Aðferð: 

1. Bræðið smjör í stórum potti, steikið kjúklinginn og kryddið með tacokryddi þar til aðeins brúnaður og setjið þá í skál til hliðar. Steikið því næst lauk, hvítlauk og papriku þar til mýkist aðeins, kryddið einnig með tacokryddi. Bætið tómatpaste út í og leyfið að steikjast aðeins með. 

2. Hellið tómötunum yfir ásamt kjúklingasoði, rjóma og rjómaosti, pískið saman og hitið hægt og rólega upp. Þegar suðan er að koma upp setjið kjúklinginn út í og sjóðið allt rólega saman í fimm mínútur. 

3. Smakkið súpuna til með salti, pipar og ef til vill meira tacokryddi. Setjið í skálar og toppið með ferskum tómötum, basil, rifnum osti og vorlauk.

Dásamlegar súkkulaðibita spariskonsur 

Ég hugsa að skonsur séu eitthvað það skemmtilegasta sem ég baka. Þær eru svo mikið einfaldari en allir halda að ég skil hreinlega ekki af hverju ég baka þær ekki miklu oftar. Lykillinn að góðum skonsum, að mínu mati er að hafa deigið dálítið blautt og aðalmálið, að vinna það eins lítið og mögulegt er, alls ekki hnoða það. Þá verða skonsurnar léttar í sér og bráðna í munni. Þessar skonsur eru svo góðar að þær má t.d. bera fram með jarðarberjum og þeyttum rjóma eins og einskonar bröns eftirrétt. Þær eru líka frábærar nýbakaðar einar og sér eða volgar með smjöri.

– Uppskriftin var unnin í samstarfi við Gott í matinn –

Ég nota bollamál í þessari uppskrift, en einn bolli er 2.5 dl 

2 ½ bolli hveiti 

2 tsk lyftiduft 

½ tsk salt (nota flögusalt) 

1/3 bolli sykur 

100 gr smjör, kalt 

2 egg 

1 tsk vanilludropar 

¾ bolli rjómi 

150 gr dökkt súkkulaði gróft saxað eða 1 ½ bolli súkkulaðibitar 

3 msk perlusykur eða hrásykur

Aðferð: hitið ofn í 170 gráður með blæstri, annars 190 gráður. Byrjið á að píska saman öll þurrefnin. Skerið smjörið í litla bita og vinnið það saman við hveitiblönduna með fingrunum þar til hveitið líkist rökum sandi en ennþá dálítið eftir af litlum smjörbitum. Pískið saman með gaffli, eggi, rjóma og vanillu og bætið saman við þurrefnin ásamt súkkulaðinu. Vinnið þetta mjög lítið saman með gafflinum þannig að deigið rétt loði saman. Hellið á borð og mótið hring úr deiginu sem er um 2 cm á þykkt. Ef degið er mjög blautt stráið þá smá hveiti á borðið. Skerið í átta jafnar sneiðar og raðið á ofnplötu. Penslið með dálitlum rjóma og stráið perlusykrinum yfir. Bakið í 18 – 20 mínútur.

Ein besta franska súkkulaðiterta sem ég hef smakkað og saltkaramellan setur hana á algjörlega hærra plan. Þessa þarf aðeins að dekra við og dúllast en útkoman er svo sannarlega þess virði og meira til.

– Uppskriftin er unnin í samstarfi við Gott í matinn –

Frönsk súkkulaðiterta

200 gr dökkt súkkulaði

200 gr smjör

200 gr púðursykur

3 egg

2 tsk vanilluextract

100 gr hveiti

2 msk kakó

Örlítið salt

Saltkaramelluhjúpur:

300 gr sykur

110 ml vatn

150 ml rjómi frá Gott í matinn

75 gr smjör

1 tsk sjávarsalt í flögum (eða eftir smekk)

Aðferð kaka:

1. Hitið ofn í 160 gráður með blæstri – 180 gráður án blásturs. Bræðið saman súkkulaði og smjör við vægan hita. Takið af hitanum og látið aðeins kólna.
2. Þeytið saman egg, púðursykur og vanillu þar til blandan verður þykk, ljós og létt.
3. Pískið hveitið og kakóið saman í skál og hellið saman við eggjablönduna og blandið saman á hægum hraða.
4. Hellið súkkulaðinu saman við deigið og blandið vel en varlega saman.
5. Hellið deiginu í smjörpappírsklætt lausbotna bökunarform (ca 22-24cm, gott að nota smelluform) og bakið í um það bil 35-40 mínútur. Fylgist vel með kökunni. Hún á að vera dálítið blaut í miðjunni. Takið kökuna út og látið ná stofuhita eða kælið alveg áður en karamellan er sett yfir.

Aðferð saltkaramella:

1. Hitið rjóma og smjör við vægan hita þar til smjörið bráðnar, setjið til hliðar.
2. Setjið sykur og vatn í hreinan pott og hleypið suðunni upp við meðalháan hita – án þess að hræra. Látið sykurvatnið sjóða í 7-10 mínútur – án þess að hræra, þar til það nær 180 gráðum. ATH ef þið eigið ekki hitamæli til að mæla sykur sjóðið þá sykurblönduna þar til hún er fallega gullinbrún, dálítið dökk. Alls ekki stíga frá pottinum, þetta þarf að vakta allan tímann svo brenni ekki.
3. Takið bræddan sykurinn strax af hitanum þegar hann hefur náð réttum hita, hellið rjómanum og smjörinu saman við og hrærið.
4. Setjið aftur á meðalhita og látið malla í 3-5 mínútur eða þar til blandan þykknar aðeins.  Hrærið á meðan.
5. Takið karamelluna af hitanum og bætið sjávarsaltið saman við. Látið karamelluna ná stofuhita.
6. Takið kælda kökuna og losið úr forminu, setjið á disk og setjið smelluhringinn aftur utan um kökuna á diskinum sem þið berið kökuna fram á. Hellið karamellunni yfir kökuna og látið kólna í ísskáp í amk 2 klst áður en þið takið hringinn utan af og berið fram. Stráið örlitlu sjávarsalti yfir karamelluna og berið fram eina og sér eða með þeyttum rjóma.

• 

Einstaklega góðir og djúsí hafraklattar. Allir sem smakka þá biðja um uppskriftina sem segir kannski eitthvað. Mér finnst æðislegt að hafa kókos í þeim og alveg einstaklega jólalegt.

• 250 gr. mjúkt smjör
• 100 gr. sykur
• 180 gr. púðursykur
• 2 tsk vanillusykur
• 2 stór egg
• 1/2 tsk kanill
• 180 gr hveiti
• 1 tsk matarsódi
• 1/2 tsk salt
• 250 gr. haframjöl
• 50 gr. kókosmjöl (má sleppa og setja meira haframjöl)
• 200 gr. grófsaxað súkkulaði
• 100 gr rúsínur

Aðferð:

1. Hitið ofn í 170 gráður með blæstri. Þeytið saman smjör, sykur, púðursykur og vanillusykur þar til létt og ljóst. Bætið eggjunum út í einu í einu og þeytið vel saman.
2. Hrærið öllum þurrefnum saman í skál ásamt súkkulaðinu, kókos og rúsínum og bætið svo út í smjörblönduna og hrærið öllu vel saman.
3. Setjið deigið á bökunarplötu, ég miða við ca. 2 msk af deigi í hverja köku og nota ískúluskeið til að gera fullkomnar kúlur. Ef þið eigið ekki svoleiðis er líka hægt að hnoða bara léttar kúlur með höndunum. Bakið í 8-9 mínútur. Kökurnar eiga að vera vel mjúkar í miðjunni þegar þið takið þær úr ofninum. Látið kólna nánast alveg á plötunni áður en þið takið þær af þar sem þær eru mjög mjúkar.

Góð ráð:

• Ekki baka kökurnar of lengi. Þær eru extra góðar af því þær eru ekki ofbakaðar og verða því mjúkar í miðjunni – sem gerir þær dásamlegar.
• Fyrir rúsínuhatara er ekkert mál að skipta þeim út fyrir eintómt súkkulaði.
• Ég nota ekki alltaf kókos, set þá bara 300 gr haframjöl. Þær eru samt enn betri með kókos að mínu mati!
• Uppskriftin er frekar stór og gefur um 45 væna klatta. Hana má auðveldlega helminga.