Piccolo tómatar

Fylltar ofnbakaðar tortillarúllur

júní 20, 2013 by helenagunnarsd 9 Comments

Svei mér þá ef sumarið er ekki bara komið. Ég ætla að leyfa mér að segja það. Sonur minn spyr mig nánast daglega hvenær sumarið komi og skilur illa útskýringar mínar um að stundum rigni á sumrin. ”Getum við þá ekki farið í útilegu?”.. Fyrir honum er sumarið sól, ís á palli, stuttbuxur, gras, grillaðar pylsur og frisbídiskur. Ég sit allavega úti á palli í þessum skrifuðu orðum í smá hádegishléi frá lestri fræðibóka og almennum lokaritgerðarhugleiðingum, sólin skín í heiði og það er pottur á pallinum. Mig langar að deila með ykkur mikilli uppáhaldsuppskrift sem er í senn einföld og sérstaklega góð. Þessar rúllur hafa fylgt mér lengi og þróast aðeins með árunum þó að vissulega séu nú engin geimvísindi á bakvið þær. Mér þykir þetta upplagður föstudags- eða laugardagsmatur þegar alla langar í eitthvað gott að borða og vilja gera vel við sig án mikillar fyrirhafnar.

Fylltar ofnbakaðar tortillarúllur (fyrir 4):

500-600 gr hreint ungnautahakk (einn góður bakki)
1 krukka salsa sósa (ég nota milda)
1-2 dl vatn
Krydd t.d reykt paprika, cumin, hvítlauksduft og Krydd lífsins
Ferskt kóríander (má sleppa)
1 dós 18% sýrður rjómi
1 lítil dós hreinn rjómaostur
6 heilhveiti tortilla kökur (minni gerðin)
1 poki rifinn ostur (t.d pizzaostur)
1 box piccolo tómatar skornir í fernt
5 vorlaukar saxaðir smátt
1 rauð paprika smátt söxuð
2 avocado skorin í sneiðar

Aðferð: Hitið ofninn í 200 gráður. Byrjið á að saxa niður grænmetið. Steikið kjötið svo vel og kryddið það eftir smekk.Þegar kjötið er brúnað hellið salsasósunni yfir ásamt vatni og leyfið þessu að sjóða í ca. 5 mínútur. Takið þá af hitanum og bætið smá söxuðu kóríander saman við. Leggið tortillaköku fyrir framan ykkur. Smyrjið á hana 1 msk af rjómaosti. Setjið því næst 1/6 af hakkinu ofaná ásamt ca. matskeið af rifnum osti. Rúllið kökunni upp og leggið í eldfast mót.Endurtakið þar til allar kökurnar eru fylltar. Setjið sýrðan rjóma hér og þar yfir kökurnar. Stráið því næst söxuðu grænmetinu yfir og restinni af rifna ostinum. Bakið við 200 gráður í 15 mínútur. Berið fram með avocadosneiðum og brosi á vör 🙂

Spaghetti með risarækjum

janúar 31, 2013 by helenagunnarsd Leave a Comment

Litla fjögurra ára molanum á heimilinu þykir spaghetti alveg ofboðslega gott. Það gæti sennilega verið til skiptis, spaghetti, pylsubrauð og pizza með ananas alla daga og hann væri nokkuð sáttur. Hann er reyndar líka frekar mikill gúrmei maður og kann vel að meta hluti eins og bragðsterka osta (parmesan sérstaklega), rækjur, humar, ólívur og þar fram eftir götunum. En hann pantaði sumsé að hafa spaghetti í matinn í kvöld og varð að ósk sinni. Ég gat reyndar ekki hugsað mér í þetta skiptið að gera hefðbundna bolognese sósu þó hún sé góð og gild og ákvað því að gera létt og bragðmikið spaghetti með risarækjum. Rétturinn var mjög bragðgóður og var sá litli mjög hrifinn og borðaði vel ! Þetta er kannski dálítið sumarlegur réttur, en hvað er betra í mínus fjórum en þegar eldhúsið ilmar eins og veitingastaður um hásumar í ítölskum strandbæ?

Spaghetti með risarækjum: (fyrir 3-4)

300-400 gr frosnar hráar risarækjur, hreinsaðar og skornar í tvennt langsum.
2 skallottulaukar, smátt saxaðir
1-2 hvítlauksrif, smátt söxuð (má sleppa og nota bara skallottulaukinn)
1 askja piccolo tómatar eða kirsuberjatómatar
1 væn lúka fersk steinselja, smátt söxuð
Safi úr einni sítrónu
400 gr Spaghetti
Ólífuolía, salt og pipar
2-3 msk parmesan
Klettasalat og smátt saxaður chilli (má sleppa)

Aðferð:

Rækjurnar afþýddar, hreinsaðar og skornar í tvennt eftir endilöngu. Þerraðar á eldhúspappír og kryddaðar með salti og pipar. Spaghetti soðið eftir leiðbeiningum á pakkanum. Á meðan það sýður eru laukurinn og hvítlaukinn steiktur á pönnu í ca. 3 msk af ólífuolíu við meðalhita í um 3-4 mínútur. Tómötunum bætt út á og hitinn hækkaður og rækjurnar settar á pönnuna. Steikt í 2-3 mínútur eða þar til rækjurnar eru orðnar bleikar. Tómatarnir kramdir aðeins með sleifinni eða spaðanum. Þá er sítrónusafanum bætt út á auk steinseljunnar. Saltað og piprað.

Sigtið vatnið frá spaghettíinu þegar það er al dente, en takið frá 1 bolla af soðvatninu. Spaghettíið sett á pönnuna og blandað saman við rækjurnar. Ég sett alveg 1 bolla af soðvatninu með og skreytti svo með steinselju og reif smá parmesan yfir. Munið svo að smakka til með salti og pipar. Ég bar spaghettíið fram með smá klettasalati og dreifði örlitlu af söxuðum chilli yfir fyrir fullorðna fólkið.

Það væri sennilega ekki úr vegi að drekka glas af ísköldu dálítíð þurru hvítvíni með þessum rétti..

Austurlenskt salat með stökkum sesamkjúklingi

janúar 17, 2013 by helenagunnarsd Leave a Comment

Ég var alveg búin að ákveða hvað þetta salat ætti að heita áður en ég byrjað að elda það og eiginlega áður en ég vissi hvernig það ætti að vera. Stökkur kjúklingur, sesamfræ, engifer, sweet chilli, teryaki sósa, cashew hnetur.. þessi samsetning hljómaði einstaklega vel í mínum huga svo úr varð salat. Ég myndi seint kalla þetta fjölskylduvænan rétt þar sem kjúklingurinn rífur svolítið í, allavega ekki fyrir mjög ung börn. Litli maðurinn á þessu heimili var ekki sérstaklega hrifinn en við foreldrarnir vorum alsæl með þennan rétt. Þá var nú gott að eiga afgang af hrísgrjónum og kjúkling í ískápnum. Já, við borðum oft kjúkling.

Það er best að byrja á því að elda kjúklinginn til fulls og leyfa hitanum að rjúka úr honum meðan restin í salatið er undirbúin.

Uppskrift (fyrir 4):

1 lítill poki brotnar cashew hnetur (má sleppa)
3 kjúklingabringur
1 tsk rifið engifer
3 msk teryaki sósa
3 msk sweet chillisósa
3 msk sesamfræ
1 poki blandað salat
1/2 gúrka, skorin í teninga
4 vorlaukar, skornir í þunnar sneiðar
1/2 askja litlir tómatar, skornir í tvennt
2-3 msk salat feti (þessi í vatninu, vatnið sigtað frá)
1/2 lítill ferskur chilli pipar, skorinn í þunnar sneiðar til að skreyta salatið (má sleppa)

Aðferð:

Cashew hnetur ristaðar á þurri pönnu og settar í skál. Kjúklingurinn skorinn í frekar litla teninga og brúnaður á pönnu, kryddaður með salti, pipar og ferskum rifnum engifer. (Ég notaði sömu pönnu og ég ristaði hneturnar á). Þegar kjúklingurinn hefur brúnast aðeins er sweet chilli sósu, teryaki sósu og sesamfræum bætt út á pönnuna. Látið malla við meðalháan-háan hita þar til sósan er orðin þykk og þekur kjúklinginn, ca. 10 mínútur. Slökkvið undir og undirbúið restina sem fer í salatið. Ég raðaði salatinu svona: Neðst setti ég salatblönduna, svo gúrkubita og helminginn af vorlauknum. Kjúklinginn þar ofan á, svo tómatana, restina af vorlauknum, fetaost, hneturnar og svo smá chillisneiðar.

Virkilega gott salat! Verði ykkur að góðu 🙂

Fljótlegt spínatlasagna

janúar 14, 2013 by helenagunnarsd Leave a Comment

Gerði ansi hreint fljótlegt og ljúffengt spínatlasagna í kvöld. Þetta átti reyndar upphaflega að verða spínatfyllt canelloni, en þar sem ég fór í tvær búðir að leita að ferskum lasagna plötum sem hægt væri að rúlla upp og fann þær ekki, breyttist rétturinn í lasagna með hefðbundnum þurrkuðum lasagnaplötum. Útkoman var ekki síðri. Ég fékk hugmyndina að þessum rétti í Jamie Oliver matreiðsluþætti fyrir mörgum árum síðan, þá gerir hann svipaða útgáfu af canelloni. Rétturinn hefur svo breyst og þróast gegnum árin hjá mér og okkur finnst hann alltaf mjög góður. Þetta er allavega mjög góð leið til að fá krakka til að borða helling af spínati, þar sem heill stór spínatpoki fer í réttinn. Það tekur bara um 10 mínútur að undirbúa lasagnað og svo er það í 30 mínútur í ofninum svo þetta er fljótgert.

Spínatlasagna – fyrir 4

2 hvítlauksrif, smátt söxuð
2 msk ólífuolía
Salt, pipar og hálfur kjúklinga eða grænmetisteningur
1 stór poki af spínati
1 stór dós kotasæla
1 dós 10% sýrður rjómi
3 msk rifinn parmesan ostur
1 krukka hakkaðir tómatar (ég notaði lífræna í krukku frá Sollu)
Lasagnaplötur
Rifinn ostur

Aðferð:

Ofn hitaður í 170 gráður með blæstri, annars 180 gráður. Hvítlaukur steiktur uppúr olíunni við frekar vægan hita þar til hann mýkist, saltað og piprað og teningurinn mulinn yfir. Hitinn hækkaður aðeins og spínatinu bætt á pönnuna. Steikið spínatið þar til það hefur linast. Takin pönnuna af hitanum og bætið kotasælu, parmesan og sýrðum rjóma saman við. Salt og pipar eftir smekk. Lasagnað er svo sett saman þannig að neðst í eldfast mót fer örlítil ólífuolía og smá tómatmauk. Svo koma lasagnaplötur, spínatblanda, tómatamauk. Ég endurtók þetta þrisvar, endaði á spínatblöndu og tómatamauki. Stráði osti yfir og bakað í 30 mínútur. Lesið samt á pakkann á lasagnaplötunum, það stóð á mínum Barilla pakka að eldunartíminn á plötunum væru 20 mínútur, á sumum stendur þó alveg 30 – 40 mínútur.

Ég bar þetta fram með piccolotómötum og parmesan osti.

Grillaðar marineraðar lambakótilettur, hasselback kartöflur með brúnuðu smjöri, grískt salat og graslaukssósa

janúar 13, 2013 by helenagunnarsd 3 Comments

Er ekki alveg að koma sumar?.. Við ákváðum í gær að vera með grillaðar kótilettur, sem er sennilega ó-janúarlegasti matur sem fyrirfinnst. Ég mundi þá eftir uppskrift af marineringu sem ég hafði séð hjá henni Inu Garten vinkonu minni og ákvað að prófa. Útkoman var mjög góð og þetta er marinering sem alveg smellpassar við lambakjöt, án þess þó að vera of yfirgnæfandi. Þar sem Ina kallar lambakjötið sitt grískt, ákvað ég að vera með létta jógúrtsósu með og mína útgáfu af grísku salati. Hasselback kartöflurnar fengu svo að fylgja með. Ég hef verið að lesa á mörgum bloggum um hina miklu dásemd sem brúnað smjör er, svo ég ákvað að taka kartöflurnar upp á annað og æðra stig og hellti brúnuðu smjöri yfir þær áður en ég bakaði þær og sá svo sannarlega ekki eftir því. Mæli eindregið með því að þið skellið í brúnað smjör við fyrsta tækifæri, það opnaðist nýr heimur fyrir mér við þessa aðgerð.. möguleikarnir á þessari dýrð eru endalausir. Hérna eru góðar leiðbeiningar um hvernig best er að bera sig að við gerð brúnaðs smjörs.

Marinering á lambakjöt:

8 lambakótilettur (ég gleymdi að athuga vigtina en þetta voru 8 vænar sneiðar, með lundum, ég lét saga þær í tvennt fyrir mig, þetta dugði mjög vel fyrir 3 fullorðna og 1 barn)
2 hvítlauksrif, smátt söxuð
1 msk saxað rósmarín
2 msk sítrónusafi
1 tsk salt og 1 tsk pipar
1 dl ólífuolía
1 dl rauðvín

Öllu blandað saman og hellt yfir lambakjötið, ég setti þetta í rennilása plastpoka og lét standa við stofuhita í 1,5 klst. Má líka gera daginn áður og láta marinerast í ísskáp. Kjötið er svo grillað á útigrilli í um það bil 5-6 mínútur á hvorri hlið við frekar háan hita. Ég stráði svo saxaðri steinselju yfir kjötið þegar það var tilbúið. Það er nú ekkert möst samt :

Litlar hasselback kartöflur með brúnuðu smjöri:

Um það bil 10-12 frekar litlar kartöflur, skolaðar og þerraðar (Ég reiknaði með þremur kartöflum á mann)
75 grömm smjör, brúnað
Salt, pipar og rósmarín.

Raufar skornar í kartöflurnar, smjörið brúnað og hellt yfir, Saltað og piprað og nokkrar rósmaríngreinar settar með. Bakað í ofni við 180 gráður í 60 mínútur.

Grískt salat:

1 agúrka, kjarnhreinsuð og skorin í sneiðar
2 öskjur kirsuberjatómatar, skornir í tvennt
1/2 lítil krukka ólívur
1/2 krukka grillaðir ætiþistlar (Ítalía ætiþistlar, fást í Bónus og Hagkaup)
1/2 krukka salat feti, vatnið sigtað frá
Salt, pipar, 1 msk hvítvínsedik, 2 msk ólífuolía og þurrkað oregano

Öllu blandað saman í skál, ólífuolíu og ediki skvett yfir og smakkað til með salt, pipar og óreganó.

Graslaukssósa:

2 dl ab mjólk
1 dós sýrður rjómi
1/2 búnt graslaukur, smátt saxaður (þessi sem fæst í plastbökkunum)
1/2 tsk hunang
1 tsk hvítvínsedik
Salt og pipar

Öllu blandað saman og smakkað til með salti og pipar

Kínóa Salat

janúar 4, 2013 by helenagunnarsd Leave a Comment

Eftir endalausar kræsingar og stórsteikur finnst mér alltaf gott að útbúa eitthvað létt og gott í maga. Þetta salat kom upp í hugann í dag þegar ég var að reyna að ákveða hvað ætti að vera í matinn, langaði í eitthvað létt en bragðgott og smám saman týndist í hausinn á mér innihaldið í þetta fína salat. Samsetningin á þessu salati er í smá Miðjarðarhafsgír og smellur allt mjög vel saman, t.d sterkur chiili piparinn, fetaosturinn og döðlurnar sem er að mínu mati dásamlegt saman.

Það er sannarlega ekki auðvelt að ná góðum myndum af mat í þessu myrkri en við látum okkur hafa það.

Kínóa er í raun ekki korntegund heldur kemur það úr jurtaríkinu og hérna má lesa skemmtilegan fróðleik um það. Þess má geta að það er stútfullt af próteini og góðum fitusýrum og getur því vel komið í staðin fyrir kjöt eða fisk og stendur alveg fyrir sér sem máltið eitt og sér. Eins og ég gerði í þessum rétti 🙂 Það má í raun nota kínóa á ýmsan máta, t.d sem morgungraut eða í staðin fyrir kúskús eða hrísgrjón sem meðlæti. Kínóa er soðið í hlutföllunum 1 hluti kínóa á móti 2 hlutum af vatni og það er mikilvægt að skola það fyrir suðu. Það er frekar hlutlaust á bragðið og gengur nánast með hverju sem er, svipað og kúskús.

Kínóa salat – fyrir 3-4

1 bolli ósoðið kínóa.
1 lítill kúrbítur, skorinn í sneiðar
3 vorlaukar, smátt skornir
1 rauður chillipipar, fræhreinsaður og frekar smátt skorinn. (Ég hafði bitana frekar stóra svo auðvelt væri að taka þá frá fyrir þann 4 ára)
Handfylli söxuð steinselja
Aðeins minni handfylli söxuð mynta (má sleppa, ég átti hana bara til og hún kom mjög vel út)
4 msk ristaðar furuhnetur
1 krukka salat feti, vatnið sigtað frá.
1 box piccolo tómatar, eða 1/2 askja kirsuberjatómatar. Skornir í tvennt.
Ca. 6 döðlur saxaðar smátt

Byrjið á að skola kínóað og sjóða það í 2 bollum af vatni. Suðan tekur um 15 mínútur.

Hinir yndislegu íslensku piccolo tómatar, bestu tómatar sem við höfum smakkað! ég fékk þá í Bónus.

Kúrbíturinn grillaður á grillpönnu og svo ristaði ég furuhneturnar á pönnunni þegar kúrbíturinn var tilbúinn.

Allt hitt skorið niður á meðan kínóað sýður og kúrbíturinn grillast, ég skar kúrbítinn svo aðeins smærra niður.

Þegar kínóað er soðið er það sett í skál og mesta hitanum leyft að rjúka úr því, það lítur um það bil svona út þegar það er tilbúið.

svo er bara öllu blandað saman og dressingunni hellt yfir að lokum.

Dressing:

Safi úr einni sítrónu kreist í glas, jafn mikið af ólífuolíu hellt samanvið, 1/2 tsk salt, 1/2 tsk pipar, 1 tsk hunang. Öllu blandað vel saman og hellt yfir salatið.

Salatið er alveg rosalega gott og bragðmikið og manni líður alveg einstaklega vel eftir að hafa borðað svona fallegan og góðan mat 🙂 Það geymist alveg ágætlega og væri t.d hægt að undirbúa daginn áður og bera fram í saumaklúbbi eða taka með sér í nesti. Ljúffengt !

Piccolo tómatar

Footer