Eldhúsperlur logo

Skúffukaka

Dökk og dúnmjúk skúffukaka með smjörkremi

by Leave a Comment

– Uppskrift unnin í samstarfi við Gott í matinn –

Enn ein skúffuköku uppskriftin? Gæti einhver hugsað núna. En það er bara þannig að skúffuköku má alltaf fullkomna enn frekar og ég held að hér sé komin líklega sú besta sem ég hef smakkað hingað til. Kaffijógúrtið gerir hana dúnmjúka og ýtir enn frekar undir djúpt súkkulaðibragðið og kremið, sem er eins og silki, er af öðrum heimi ljúffengt. 

Skúffukaka:

5 dl hveiti

4 dl sykur

2 dl kakó

½ tsk salt

2 tsk matarsódi

1 dl olía

2 dósir Óskajógúrt með kaffibragði

2 egg

2 tsk vanilluextract

150 gr smjör, brætt

2 dl heitt vatn

Aðferð:

  1. Hitið ofn í 170 gráður með blæstri. 
  2. Hrærið öllum þurrefnum saman í skál.
  3. Pískið saman olíu, eggjum, jógúrti og vanillu og hellið út í deigið. Bætið að lokum heitu vatni og bræddu smjöri saman við og blandið vel saman.
  4. Hellið í skúffukökuform og bakið í um það bil 30 mínútur eða þar til bakað í gegn. 

Krem:

200 gr smjör við stofuhita

3 dl flórsykur

1 tsk vanilluextrakt

4 msk rjómi frá Gott í matinn

200 gr dökkt súkkulaði

Aðferð:

  1. Þeytið smjörið, flórsykurinn og vanillu mjög vel saman þar til létt og ljós.
  2. Bætið rjómanum saman við og þeytið áfram.
  3. Bræðið súkkulaðið og hellið því volgu (alls ekki alveg kældu) saman við kremið og þeytið vel áfram.
  4. Smyrjið kreminu yfir kælda kökuna. 

Epla skúffukaka

by 1 Comment

Ég lá í flensu á dögunum og til að stytta mér stundir datt ég inn í Great British Bakeoff á Stöðtvö Maraþon. Þvílíkir snilldar þættir! Fullkomið raunveruleikasjónvarp, samt laust við allt dramað sem fylgir oft svipuðum bandarískum þáttum. Ég mæli eindregið með þeim. Hið óhjákvæmilega þegar ég horfi á svona þætti er samt að eftir hvern þátt fyllist ég mikilli löngun í að baka.. Sem hefur vissulega sína kosti og galla. En þessi dásamlega mjúka eplakaka fékk semsagt innblástur frá þáttunum góðu, og því tilefni að maðurinn minn átti afmæli. Uppskriftin er upprunalega frá Mary Berry, dómara í British Bakeoff, og Helgu Sig þeirra Breta, en með smá tilfærslum. Vona að þið prófið og njótið.

Epla skúffukaka

  • 400 gr græn epli, skræluð og skorin í þunnar sneiðar (ég notaði tvö stór epli)
  • Safi úr hálfri sítrónu
  • 2 msk kanilsykur
  • 250 gr mjúkt smjör
  • 200 gr ljós púðursykur (eða hvítur sykur og dökkur púðursykur til helminga)
  • 4 egg
  • 250 gr hveiti
  • 2 tsk lyftiduft
  • 1 tsk matarsódi
  • 1/2 tsk salt
  • 1 tsk kanill
  • 1 dl mjólk

Aðferð: Hitið ofn í 170 gráður með blæstri. Setjið eplasneiðarnar í skál, kreistið sítrónusafa yfir þær og stráið einni matskeið af kanilsykri yfir. Setjið til hliðar. Þeytið saman smjör og sykur þar til ljóst og létt og bætið eggjunum einu í einu út í og þeytið vel á milli. Pískið saman hveiti, lyftidufti, matarsóda, salti og kanil og bætið út í smjörblönduna ásamt mjólkinni. Hrærið vel saman en gætið þess að hræra ekki of lengi.

Smyrjið skúffukökuform að innan eða þekjið með smjörpappír. Setjið helminginn af deiginu í botninn og dreifið vel út því, raðið helmingnum af eplasneiðunum yfir. Setjið svo restina af deiginu yfir eplin og dreifið vel úr. Raðið að lokum eplum yfir og stráið 1 msk af kanilsykri yfir allt. Bakið í 30-40 mínútur eða þar til prjóni stungið í miðja kökuna kemur hreinn upp og eplin eru orðin mjúk. Sigtið dálítinn flórsykur yfir kökuna þegar hún hefur kólnað aðeins, berið fram volga með þeyttum rjóma.