Archives for janúar 2013

Spaghetti með risarækjum

janúar 31, 2013 by helenagunnarsd Leave a Comment

Litla fjögurra ára molanum á heimilinu þykir spaghetti alveg ofboðslega gott. Það gæti sennilega verið til skiptis, spaghetti, pylsubrauð og pizza með ananas alla daga og hann væri nokkuð sáttur. Hann er reyndar líka frekar mikill gúrmei maður og kann vel að meta hluti eins og bragðsterka osta (parmesan sérstaklega), rækjur, humar, ólívur og þar fram eftir götunum. En hann pantaði sumsé að hafa spaghetti í matinn í kvöld og varð að ósk sinni. Ég gat reyndar ekki hugsað mér í þetta skiptið að gera hefðbundna bolognese sósu þó hún sé góð og gild og ákvað því að gera létt og bragðmikið spaghetti með risarækjum. Rétturinn var mjög bragðgóður og var sá litli mjög hrifinn og borðaði vel ! Þetta er kannski dálítið sumarlegur réttur, en hvað er betra í mínus fjórum en þegar eldhúsið ilmar eins og veitingastaður um hásumar í ítölskum strandbæ?

Spaghetti með risarækjum: (fyrir 3-4)

300-400 gr frosnar hráar risarækjur, hreinsaðar og skornar í tvennt langsum.
2 skallottulaukar, smátt saxaðir
1-2 hvítlauksrif, smátt söxuð (má sleppa og nota bara skallottulaukinn)
1 askja piccolo tómatar eða kirsuberjatómatar
1 væn lúka fersk steinselja, smátt söxuð
Safi úr einni sítrónu
400 gr Spaghetti
Ólífuolía, salt og pipar
2-3 msk parmesan
Klettasalat og smátt saxaður chilli (má sleppa)

Aðferð:

Rækjurnar afþýddar, hreinsaðar og skornar í tvennt eftir endilöngu. Þerraðar á eldhúspappír og kryddaðar með salti og pipar. Spaghetti soðið eftir leiðbeiningum á pakkanum. Á meðan það sýður eru laukurinn og hvítlaukinn steiktur á pönnu í ca. 3 msk af ólífuolíu við meðalhita í um 3-4 mínútur. Tómötunum bætt út á og hitinn hækkaður og rækjurnar settar á pönnuna. Steikt í 2-3 mínútur eða þar til rækjurnar eru orðnar bleikar. Tómatarnir kramdir aðeins með sleifinni eða spaðanum. Þá er sítrónusafanum bætt út á auk steinseljunnar. Saltað og piprað.

Sigtið vatnið frá spaghettíinu þegar það er al dente, en takið frá 1 bolla af soðvatninu. Spaghettíið sett á pönnuna og blandað saman við rækjurnar. Ég sett alveg 1 bolla af soðvatninu með og skreytti svo með steinselju og reif smá parmesan yfir. Munið svo að smakka til með salti og pipar. Ég bar spaghettíið fram með smá klettasalati og dreifði örlitlu af söxuðum chilli yfir fyrir fullorðna fólkið.

Það væri sennilega ekki úr vegi að drekka glas af ísköldu dálítíð þurru hvítvíni með þessum rétti..

Sítrónumuffins með birkifræjum

janúar 30, 2013 by helenagunnarsd 1 Comment

Hér hefur ekki verið eldað mikið undanfarna daga. Svona af kvöldmat allavega. Varla neitt síðan bjórkjúklingurinn góði var eldaður (sem við erum reyndar enn að hugsa um og ætlum að elda aftur við fyrsta tækifæri). Við höfum verið dálítið út um hvippinn og hvappinn, fórum á þorrablót og matarboð og svona allskonar fínerí. Auk þess hefur verið mikið að gera í skólanum og almennt kvöldmatar andleysi gert vart við sig hjá mér. Hver kannast ekki við andlausa kokkinn? Sem betur fer stoppar hann nú yfirleitt stutt við hjá mér svo ég býst við að skella hingað inn einhverjum góðum kvöldmat vonandi á næstunni.

Okkur var jú einmitt boðið í matarboð í kvöld svo ég ákvað að nota tækifærið fyrst ég þurfti ekki að gera kvöldmat og baka þessar indælis muffins til að fara með í matarboðið, verandi komin í hálfgerð eldhús og blogg fráhvörf. Þessar kökur eru í miklu, miklu uppáhaldi á heimilinu, sérstaklega hjá eiginmanninum. Hann rifjar reglulega upp hversu góðar þær eru og hvort ég þurfi ekki bráðum að fara að baka þær aftur. Sem er kannski ekkert skrýtið því þær eru dásamlegar. Ofsalega mjúkar og góðar og afar fljótgerðar. Birkifræin gefa þeim svo alveg sérstaklega skemmtilega áferð og bragðið er ljúffengt. Ég mæli heilshugar með þessum svolítið öðruvísi muffins kökum.

Sítrónumuffins með birkifræjum:

150 gr smjör
3 egg
100 gr hrein jógúrt
Hýðið af tveimur sítrónum rifið af með rifjárni (bara þetta gula)
1 tsk vanilluextract
150 gr hrásykur
225 gr fínt spelt eða hveiti
2 msk birkifræ
2 tsk vínsteinslyftiduft (eða venjulegt)
1 tsk matarsódi

Aðferð:

Ofn hitaður í 180 gráður, eða 170 með blæstri. Smjörið brætt og aðeins leyft að kólna. Sykri, spelti, lyftidufti, matarsóda og birkifræjum blandað saman í skál. Egg, jógúrt, vanilla og sítrónuhýðið hrært vel saman. Eggjablöndunni svo blandað saman við þurrefnin og smjörinu svo bætt saman við. Hrært saman með sleif og sett í 12 pappírsklædd muffinsform. Bakað í 20 mínútur.

Glassúr:

Safi úr einni sítrónu
3-4 dl flórsykur

Hrært saman þar til ákjósanlegri áferð er náð. Sítrónur eru misstórar og ég mældi ekki nákvæmlega hversu mikill flórsykur fór í glassúrinn. Byrjið á 3 dl af flórsykri og sítrónusafanum og bætið svo smám saman flórsykri út í þar til glassúrinn er dálítið þykkur en lekur samt af skeið. Þegar kökurnar hafa kólnað í u.þ.b 20 mínútur er sett um 1 tsk rúmlega af glassúr á hverja köku og dreift aðeins úr honum með skeiðinni.

Hjónabandssæla

janúar 27, 2013 by helenagunnarsd Leave a Comment

Það hlýtur að vera við hæfi að baka hjónabandssælu svona í kjölfar bóndadags! Ég allavega bakaði þessa klassíska haframjöls hjónabandssælu á þessum hálfgráa notalega sunnudegi í dag. Ég hef ekki bakað hjónabandssælu oft áður, en þessi uppskrift sem ég studdist við er upphaflega komin frá henni Ree Drummond (Pioneer woman) og gengur þar undir heitinu Strawberry Oatmeal Bars. Innihaldið var þó afar svipað og í hinni ”íslensku” (kann annars einhver sögu hjónabandssælunnar?) hjónabandssælu og til þess að hún yrði alvöru skipti ég jarðaberjasultunni út fyrir rabarbarasultu. Ég get þó vel hugsað mér að gera hana næst með jarðarberjasultunni.. Útkoman varð alveg hreint ljómandi góð hjónabandssæla. Ég bakaði sæluna í ferköntuðu eldföstu móti (ca.22x33cm).

Hjónabandssæla uppskrift: (Breytt uppskrift frá Ree Drummond)

200 grömm smjör, skorið í litla teninga
4 dl spelt
4 dl grófir hafrar
2 dl púðursykur
3 msk súrmjólk
1 krukka rabarbarasulta

Aðferð:

Ofn hitaður í 160 gráður með blæstri. Bökunarmótið smurt vel svo ekkert festist við það. Allt hráefnið í kökuna nema sultan unnið saman (ég notaði K-ið í Kitchenaid hrærivélinni) þar til það loðir vel saman. Rúmlega helmingnum af deiginu er þrýst í bökunarmótið, rabarbarasultunni dreift yfir og restin af deiginu mulin yfir sultuna. Bakað frekar neðarlega í ofni í u.þ.b 35 mínútur. Látið kólna alveg og kakan svo skorin í teninga.

Dáfín sunnudagskaka.. eða hvaða dags sem er kaka 🙂

Einföld og góð súkkulaðimús

janúar 25, 2013 by helenagunnarsd 2 Comments

Góð heimatilbúin súkkulaðimús er eitthvað sem ég á afar erfitt með að standast og ég veit ekki um marga eftirrétti sem komast með tærnar þar sem músin góða er með hælana. Engu að síður geri ég eiginlega aldrei súkkulaðimús. Fyrir utan að það gengur náttulega ekki að vera alltaf borðandi súkkulaðimýs þá hefur mér fundist eintómt vesen að búa hana til. Ég fór aðeins að grúska og fann út að það þarf alls ekki að vera svo mikið mál að gera þennann dásamlega eftirrétt. Þeyta egg og sykur, bræða súkkulaði og blanda öllu saman við þeyttan rjóma, þetta hljómar ekki mjög flókið og er það bara alls ekki. Það er mesti misskilningur að það þurfi að aðskilja eggjarauður og eggjahvítur og vera með eitthvað vesen í kringum það. Þessi uppskrift er ofsalega góð og maður þarf alls ekki stóran skammt til að svala súkkulaðiþörfinni.

Uppskrift:

150 grömm dökkt súkkulaði (56 – 70%)
2 msk smjör
2 heil egg og 1 eggjarauða
2 msk sykur
3,5 dl rjómi
1 tsk vanilluextract
Salt á hnífsoddi

Aðferð:

Súkkulaði og smjör brætt yfir vatnsbaði eða í potti við vægan hita með ögn af salti. Tekið af hitanum og leyft að kólna. Á meðan eru eggin, eggjarauðan og sykurinn þeytt vel saman þar til ljóst og létt. Súkkulaðinu og vanillunni hrært saman við. Rjóminn stífþeyttur og honum blandað varlega saman við súkkulaði- og eggjablönduna. Músin færð í nokkrar litlar skálar, glös á fæti eða eina stóra skál og kæld í 1 klst eða lengur. Borið fram með ferskum berjum.

Bóndadags kjúklingur í ólífu og bjórsósu með ofnbökuðum rósmarínkartöflum

janúar 24, 2013 by helenagunnarsd 1 Comment

Eins og svo margir sennilega, erum við Heimir miklir nautnaseggir, það er alveg óþarfi að fara leynt með það. Okkur finnst fátt betra á heitum sumardögum en að fá okkur ískaldan bjór og gæða okkur á grænum ólífum með. Það er svona ekta Spánarstemning. Ólífur og bjór er samsetning sem klikkar seint. Þ.e.a.s ef manni finnast ólífur góðar og drekkur bjór. Og þó, ég er ekki einu sinni viss um að manni þurfi að finnast þessir hlutir góðir í sitthvoru lagi til að finnast þessi samsetning góð.

Eftir þessar bjór og ólífupælingar mínar ákvað ég því að taka bóndadaginn snemma í ár og mallaði þennan dásamlega góða kjúklingarétt sem samanstendur, jú einmitt, að miklu leyti af ólífum og bjór. Þessi réttur er án efa á topp 5 listanum okkar yfir gómsæta kjúklingarétti, ef ekki bara í efsta sæti. Það er alls ekki bjórbragð af sósunni en bjórinn gefur alveg ofsalega gott bakgrunnsbragð. Ég notaði kjúklingalæri í þennann rétt því það er svo gott að leyfa honum að malla lengi og ég er ekki viss um að bringur myndu þola svoleiðis meðferð jafn vel og lærin. Auk þess eru lærin bæði ódýr og einstaklega ljúffeng í svona rétti og ég ætla ekkert að réttlæta þetta læraval mitt neitt frekar, þetta var rétt ákvörðun!

Það er mjög gott að bera þennann rétt fram með þessum rósmarínkartöflubátum en vegna þess að sósan er svo góð er áreiðanlega ekki síðra að bera réttinn fram með brauði til að moppa sósuna upp með 🙂

Rósmarínkartöflur:

3 bökunarkartöflur
Salt, pipar, rósmarín og ólífuolía

Aðferð:

Kartöflurnar skornar í frekar þunna báta. Settar á smjörpappírsklædda bökunarplötu. Ólífuolíu hellt yfir og kryddaðar með salt, pipar og rósmarín. Bakað í 200 gráðu heitum ofni í 40 mínútur. (Ég byrjaði á að gera kartöflurnar og setti kjúklinginn svo inn í ofn með kartöflunum þegar þær höfðu verið í 10 mínútur í ofninum. Þá er allt tilbúið á sama tíma)

Kjúklingur í ólífu- og bjórsósu (fyrir 3 – 4):

5 kjúklingalæri
1 laukur, frekar smátt saxaður
1 krukka hakkaðir tómatar (ég nota frá Sollu, finnst þeir langbestir)
1 lítill bjór (tæpur, það má taka frá svona 2-3 sopa)
1 lítil krukka grænar fylltar ólívur
1 dl rjómi
1/2 kjúklingateningur
3 litlir vorlaukar, smátt saxaðir.

Aðferð:

Ofn hitaður í 200 gráður. Byrjið á því að snyrta kjúklingalærin vel og þerra þau með pappír. Ég sker alltaf vel af fitunni frá sem er ”aftaná” lærinu. Hitið pönnu og setjið örlítið af olíu eða smjöri á hana. Saltið og piprið kjúklinginn vel og brúnið á pönnunni á báðum hliðum. Takið kjúklinginn af pönnunni og geymið á diski. Ef mikil fita hefur farið af kjúklingnum á pönnuna er gott að hella aðeins af henni. Laukurinn er svo steiktur á sömu pönnu þar til hann mýkist aðeins. Því næst er tómötunum, bjórnum, kjúklingateningnum og ólívunum hellt út á. Leyft að malla aðeins og sjóða niður í ca. 5 mínútur á góðum hita og smakkað til með salt og pipar. Kjúklingalærin eru svo sett út í sósuna og rjómanum hellt yfir.

Ég setti pönnuna svo inn í 200 gráðu heitan ofn og leyfði þessu að malla þar í 30 mínútur. Ef þið eigið ekki pönnu sem má fara inn í ofn má einfaldlega hella sósunni í eldfast mót og raða kjúklingalærunum svo þar ofan á og svo inn í ofn. Þegar rétturinn er tekinn úr ofninum er vorlauknum stráð yfir. Þetta er svo að sjálfsögðu borið fram með ísköldum bjór.

Tómata- og spínatbaka

janúar 23, 2013 by helenagunnarsd 1 Comment

Var með þessa ljúffengu og bragðmiklu böku í kvöldmatinn í gær. Ég hef ekki verið mikið í svona bökugerð sjálf en þykja bökur af ýmsu tagi alveg einstaklega góðar og skemmtilegur matur. Þessi baka er ef til vill frábrugðin mörgum öðrum grænmetisbökum að því leyti að í henni eru engin egg og bökubotninn er tiltölulega einfaldur í framkvæmd. Það sem hefur kannski hrætt mig mest frá bökugerð er einmitt þessi viðkvæmi botn sem þarf að fletja út, kæla og þar fram eftir götunum. Þessi botn er mjög góður og einfaldur, unnin saman með höndunum í skál og svo bara þrýst í formið, getur varla verið einfaldara.

Uppskrift

Bökubotn:

200 grömm gróft spelt eða heilhveiti
Salt á hnífsoddi og smá pipar
80 grömm smjör, skorið í litla teninga
1/2 dl heitt vatn

Fylling:

1-2 msk dijon sinnep
Handfylli af ólífum, smátt söxuðum
1 poki rifinn mozarella
2-3 msk graslaukur, smátt saxaður (hér má líka nota vorlauk)
1 væn lúka spínat, aðeins skorið niður
5 tómatar, skornir í frekar þunnar sneiðar og þerraðir með eldhúspappír svo að mest allur vökvinn og fræin fari í pappírinn.
Nokkur basilblöð, skorin í strimla
1 dós sýrður rjómi
2-3 msk rifinn parmesan ostur
Salt og pipar

Aðferð:

Ofn hitaður í 180 gráður með blæstri. Allt innihaldið í bökubotninn sett í skál og unnið saman með höndunum. Þegar það er komið saman er því þrýst í botninn og aðeins upp með hliðunum á eldföstu hringlaga formi. Þetta er svo bakað í 10 mínútur. Tekið úr ofninum og leyft að kólna í 30 mínútur eða á meðan fyllingin í bökuna er undirbúin. Hitinn á ofninum lækkaður í 160-170 gráður (fer eftir ofnum, minn er t.d mjög heitur)

Þegar bökubotninn hefur kólnað aðeins er fyllingunni komið fyrir. Dijon sinnepi smurt í þunnu lagi á botninn (þetta er alls ekki yfirgnæfandi, en ofboðslega gott). Ólífum stráð þar yfir. Því næst helmingnum af rifna mozarella ostinum og graslauknum.

Þá er spínatið sett yfir og tómötunum raðað þar ofan á ásamt basil, hér er gott að salta og pipra dálítið. Örlítið af rifnum osti stráð yfir, svo er sýrðum rjóma, restinni af rifna ostinum og parmesan ostinum blandað saman í skál og því svo smurt yfir bökuna og. Bakan er svo bökuð við 160-170 gráður í 45 mínútur. Það er gott að leyfa bökunni að jafna sig við stofuhita eftir bakstur, í 15-20 mínútur áður en hún er skorin.

Ég stráði smá söxuðum basil yfir bökuna og bar hana fram með gúrkustrimlum, spínati og sýrðum rjóma.

Brauð – ið

janúar 21, 2013 by helenagunnarsd 12 Comments

Já, þetta brauð er bara brauð-IÐ. Ég hef gert margar tilraunir gegnum árin til að baka brauð, úr geri. Þó ég geri alls ekki mikið af því langar mig samt að geta það skiljiði? Fólk er að baka gerbrauð hérna hægri vinstri og gerir það með einari. Af hverju gat ég það ekki líka? Ég hef boðið fólki í mat og gefið því brauðbollur með matnum sem hefðu sómað sér vel sem tennisboltar. Þið sem borðuð þær, þið vitið hver þið eruð. Þetta var eitthvað svona bullandi flókið brauð sem þurfti að hnoða og hnoða og það var hveiti út um ALLT í eldhúsinu. Þeir sem þekkja mig vita að ég er ekki hrifin af svoleiðis óreiðu. Nei ég þurfti eitthvað einfalt sem virkaði bara.

Ég rakst svo sumsé á þessa aðferð/uppskrift á síðunni hennar Nönnu Rögnvaldar fyrir nokkru síðan. Þetta hefur bjargað orðspori mínu þegar kemur að gerbakstri og allir sem smakka þetta halda að maður sé klárari en Jói Fel. Barn gæti bakað þetta, svo einfalt er það, barn getur líka borðað mikið af því, því svo gott er það. Ekkert hnoð bull og hveiti út um allt og það þarf ekki að baka þetta í einhverjum forláta potti. Þetta er einfalt og virkar, ég lofa. Ég hef gert ýmislegt úr þessari uppskrift, venjulegt brauð, baguette, bollur, pizzabotn og meira að segja brauðbollukarl í 4 ára afmæli sonar míns.

Þessi aðferð að brauðbakstri gengur líka undir nafninu ”Artisan Bread in Five Minutes a Day”. og ef þið smellið á þennan link getið þið horft á indælisfólk gera svona brauð og séð hvað það er einfalt. Grunn uppskriftin er bara með hvítu venjulegu hveiti. Það er best að æfa sig bara á því eins og Nanna segir og þegar maður er kominn með lag á því má fara að breyta um korntegund og bæta við t.d fræjum og einhverri svoleiðis hollustu.

Uppskrift:

1 kg hveiti
1,5 msk ger
1,5 msk salt
750 ml vel volgt vatn

Athugið að þetta er stór uppskrift sem er auðveldlega hægt að helminga.

Allt hrært saman í stórri skál með sleif þar til maður er með þykkt en frekar blautt og klístrað deig og mest allt hveitið er horfið inn í deigið. Leggið viskastykki eða plastfilmu lauslega yfir og látið lyfta sér við stofuhita í tvo tíma. Að þeim tíma loknum má taka af því og baka eða geyma í ísskáp allt að tvær vikur og taka af því þegar þig langar að baka. Deigið er þá bara mótað, með vel hveitistráðum höndum eins og maður vill og það svo látið lyfta sér í hálftíma. Eftir þennann hálftíma skar ég í þessu tilfelli kross í brauðið svo það myndi lyfta sér betur í ofninum. Á meðan er ofninn hitaður í 220 gráður. Það er gott að horfa myndbandið á youtube, en galdurinn bakvið góðu skorpuna er að hafa fat með sjóðandi heitu vatni í botninum á ofninum.

Baksturstíminn fer svo nokkuð eftir stærð brauðsins. Þetta brauð tók um 30 mínútur að bakast og ég baka það bara á venjulegri bökunarpappírsklæddri bökunarplötu sem ég leyfi að hitna inni í ofninum meðan brauðið lyftir sér. Athugið að það er nauðsynlegt að leyfa brauðinu að standa og jafna sig við stofuhita í um það bil 15 mínutur eða lengur áður en það er skorið.

Brúnkur Nigellu

janúar 20, 2013 by helenagunnarsd 8 Comments

Ég á orðið ágætis safn matreiðslubóka, svona á minn mælikvarða allavega. Nokkrar þeirra eru í miklu uppáhaldi hjá mér og ég veit að ég get gripið til þeirra ef enga áhættu á að taka og útkoman þarf að vera fullkomin. Bók Nigellu Lawson, How to be a domestic goddess, er sannarlega ein þeirra, enda titillinn einn og sér einstaklega aðlaðandi. Hver vill ekki vera gyðja í eldhúsinu eins og Nigella? Ég hef ekki búið til mjög margar uppskriftir úr henni en þær sem ég hef prófað eru dásamlegar og oftast þannig að þær hafa verið gerðar oftar en einu sinni og oftar en tvisvar. Ein þeirra uppskriftin hennar af brúnkum (brownies). Nigella byrjar uppskriftina á því að lýsa yfir furðu sinni á því af hverju í ósköpunum fólk er ekki bara alltaf að baka brúnkur, svo auðveldar og gómsætar séu þær… Sennilegasta ástæða þess að fólk er ekki alltaf að baka hennar útgáfu af brúnkum er samt trúlega sú að í uppskriftinni er sko ekki skorið við nögl! Frekar en í öðrum uppskriftum frá Nigellu. En maður minn hvað brúnkurnar eru líka góðar og mega líka vera það miðað við innihaldið. Sex egg, 375 grömm súkkulaði og jafn mikið af smjöri og já HÁLFT kíló af sykri vill hún að við setjum í herlegheitin. Ég get alveg fyrirgefið henni ýmislegt en ég gat ómögulega fengið það af mér að setja hálft kíló af sykri í kökurnar svo ég minnkaði magnið umtalsvert en þær voru samt mjög sætar.. já og góðar já já.Nigella tileinkar súkkulaði heilan kafla í bókinni sinni og byrjar þann kafla á fróðlegum upplýsingum um þessar guðaveigar á gylltum dásamlegum blaðsíðum, allt súkkulaðinu til heiðurs.

Uppskriftin sem um ræðir er mjög stór og auðveldlega hægt að helminga hana. Það nást alveg 48 meðalstórir brúnkubitar úr henni. Uppskriftin passar vel í venjulegt skúffukökuform og galdurinn er að baka kökuna alls ekki of lengi. Mín var sennilega svona þremur mínútum of lengi í ofninum og örlítið brennd í köntunum, ég skar kantana af og setti súkkulaðikrem ofan á, sem er auðvitað bara bruðl en alveg ofsalega gott. Ég get þó alveg sagt kinnroðalaust að þetta ERU bestu brúnkur sem ég hef smakkað, Nigella kann svona lagað.

Uppskrift: (Aðeins breytt uppskrift frá Nigellu)

375 grömm dökkt súkkulaði
375 grömm smjör
6 egg
350 grömm hrásykur
1 msk vanilluextract
225 grömm fínt spelt eða hveiti
1/2 tsk salt
300 grömm grófsaxaðar valhnetur (þessu má líka sleppa eða skipta út fyrir öðruvísi hnetur, mér finnst valhneturnar samt eiginlega ómissandi..) 🙂

Súkkulaðikrem:

150 grömm súkkulaði
3 msk smjör
1 msk sýróp

Aðferð:

Ofn hitaður í 170 gráður með blæstri. Smjör og súkkulaði brætt saman við vægan hita í potti. Egg, sykur og vanilla hrærð létt saman með þeytara í frekar stórri skál, (ekki rafmagnsþeytara, þetta á ekki að verða létt og ljóst). Súkkulaðibráðinni leyft að kólna aðeins og svo blandað saman við með þeytaranum. Hveitinu, saltinu blandað saman við með sleif og síðast hnetunum. Hellt í smurt skúffukökuform með bökunarpappír á botninum sem nær upp með hliðunum, þá er hægt að kippa kökunni auðveldlega upp úr mótinu þegar hún er tilbúin. Bakað í um það bil 25 mínútur. Ég bakaði mína óvart í 30 mínútur og fannst það of mikið, ekki vera eins og ég. Hún á að vera blaut í miðjunni. Kakan þarf að kólna nánast alveg áður en hún er skorin, a.m.k í klukkutíma. Þegar kakan er kólnuð er innihaldið í kremið brætt við vægan hita í potti og því svo smurt yfir kökuna.

Austurlenskt salat með stökkum sesamkjúklingi

janúar 17, 2013 by helenagunnarsd Leave a Comment

Ég var alveg búin að ákveða hvað þetta salat ætti að heita áður en ég byrjað að elda það og eiginlega áður en ég vissi hvernig það ætti að vera. Stökkur kjúklingur, sesamfræ, engifer, sweet chilli, teryaki sósa, cashew hnetur.. þessi samsetning hljómaði einstaklega vel í mínum huga svo úr varð salat. Ég myndi seint kalla þetta fjölskylduvænan rétt þar sem kjúklingurinn rífur svolítið í, allavega ekki fyrir mjög ung börn. Litli maðurinn á þessu heimili var ekki sérstaklega hrifinn en við foreldrarnir vorum alsæl með þennan rétt. Þá var nú gott að eiga afgang af hrísgrjónum og kjúkling í ískápnum. Já, við borðum oft kjúkling.

Það er best að byrja á því að elda kjúklinginn til fulls og leyfa hitanum að rjúka úr honum meðan restin í salatið er undirbúin.

Uppskrift (fyrir 4):

1 lítill poki brotnar cashew hnetur (má sleppa)
3 kjúklingabringur
1 tsk rifið engifer
3 msk teryaki sósa
3 msk sweet chillisósa
3 msk sesamfræ
1 poki blandað salat
1/2 gúrka, skorin í teninga
4 vorlaukar, skornir í þunnar sneiðar
1/2 askja litlir tómatar, skornir í tvennt
2-3 msk salat feti (þessi í vatninu, vatnið sigtað frá)
1/2 lítill ferskur chilli pipar, skorinn í þunnar sneiðar til að skreyta salatið (má sleppa)

Aðferð:

Cashew hnetur ristaðar á þurri pönnu og settar í skál. Kjúklingurinn skorinn í frekar litla teninga og brúnaður á pönnu, kryddaður með salti, pipar og ferskum rifnum engifer. (Ég notaði sömu pönnu og ég ristaði hneturnar á). Þegar kjúklingurinn hefur brúnast aðeins er sweet chilli sósu, teryaki sósu og sesamfræum bætt út á pönnuna. Látið malla við meðalháan-háan hita þar til sósan er orðin þykk og þekur kjúklinginn, ca. 10 mínútur. Slökkvið undir og undirbúið restina sem fer í salatið. Ég raðaði salatinu svona: Neðst setti ég salatblönduna, svo gúrkubita og helminginn af vorlauknum. Kjúklinginn þar ofan á, svo tómatana, restina af vorlauknum, fetaost, hneturnar og svo smá chillisneiðar.

Virkilega gott salat! Verði ykkur að góðu 🙂

Bláberja og banana muffins

janúar 15, 2013 by helenagunnarsd 4 Comments

Mér fannst alveg upplagt að gera þessar bláberja banana muffins seinnipartinn í dag með stráknum mínum. Rigning, þoka og mánudagur og ég veit ekki um betra tækifæri en einmitt á svoleiðis dögum en að baka smotterí og leyfa litla manninum að taka þátt. Þessar muffins eru mjög einfaldar svo krakkar geta alveg tekið þátt í bakstrinum. Auk þess eru þær bara frekar lítið óhollar.. 🙂 Allavega er lítill sykur í þeim og það er alltaf plús þegar kemur að bakstri fyrir börn í mínum bókum. Svo luma ég enn á nokkrum pokum í frystinum af aðalbláberjum síðan í haust og finnst nú ekki ónýtt að nota þau í svona fínerí. Uppskriftin gefur um það bil 18 muffins og ég baka þær í pappírsklæddum muffinsformum. Það er upplagt að frysta helminginn en þær geymast í 2-3 daga ófrystar. Þær eru mjúkar og mjög góðar með smá kanilbragði sem gerir gæfumuninn.

Uppskrift:

2 vel þroskaðir bananar, stappaðir
2 egg
1 dl hrásykur
1/2 dl olía (hvaða olía sem er, t.d kókos eða ólífu)
2 dl hrein jógúrt (hér má líka nota ab mjólk eða jafnvel sýrðan rjóma)
1 tsk kanill
1 tsk vanilluextract
Salt á hnífsoddi
5 dl spelt
2 tsk vínsteinslyftiduft
1/2 tsk matarsódi
2 dl frosin bláber

Aðferð:

Ofn hitaður í 170 gráður með blæstri. Stöppuðum bönunum, eggjum, jógúrti, olíu, sykri, vanillu og kanil blandað vel saman með sleif. Spelt, lyftiduft, matarsóda og salti blandað saman, bætt út í og rétt blandað saman, ekki hræra of mikið. Bláberjum hrært létt saman við. Sett í muffinsform og bakað í 20 mínútur.

Þessir litlu puttar áttu frekar erfitt með að bíða eftir að þær kólnuðu en biðin var þess virði 🙂 Verði ykkur að góðu !

Archives for janúar 2013

Footer