helenagunnarsd

Það er ef til vill ekki alveg í takt við fullkominn grænan lífsstíl sem fylgir gjarnan byrjun árs að setja inn uppskrift að sykraðri bombu eins og þessari. Við skulum samt horfast í augu við það að það mun koma að því einhverntímann að því að kökur verða aftur bakaðar, fólk mun eiga afmæli og allskonar og svei mér þá ef það koma ekki bara aftur jól þarna einhverntímann. Allt snýst þetta um jafnvægi og eins gott og það getur verið fyrir sálina að fá sér eina sneið af svona tertu við hátíðlegt tilefni getur græni sjeikinn og chiagrauturinn daginn eftir verið jafn góður, bara öðruvísi góður.. Ég trúi því að það sé heillavænlegast að lifa lífinu eins öfgalausu og hægt er og fara aldrei of langt í eina átt. Leyfa sér stundum smá og huga líka að heilsunni. Elda sem allra mest heima frá grunni, það er oftast hollara og ódýrara og umfram allt taka sig ekki of alvarlega, svona terta er einmitt liður í því markmiði 🙂

Rice krispies marengsbomba með bingókúlusósu

• 5 eggjahvítur
• 200 gr ljós púðursykur
• 5 dl rice krispies

Aðferð: Þeytið eggjahvitur og púðursykur vel saman. Bætið rice krispies út og hrærið varlega saman við með sleikju. Skiptið deiginu á tvær pappírsklæddar bökunarplötur í hringi sem eru ca. 24 cm í þvermál. (ég mæli þetta aldrei eða teikna hring, heimalagað bakkelsi er bara fallegra svolítið ójafnt að mínu mati) – Bakið við 150 gráður í 1 klst.

Fylling og ofan á:

• 7 dl rjómi
• 3 kókosbollur
• 1 bolli smátt skorin jarðarber (+ nokkur heil til skreytinga)
• 1/2 bolli hrískúlur (t.d. Nóa kropp eða annað góðgæti)
• Bingókúlusósa:
• 1 poki/150 gr bingókúlur (eða aðrar súkkulaði/lakkrískaramellur)
• 1 dl rjómi
• 50 gr suðusúkkulaði
• Skraut:
• Jarðarber
• Hrískúlur
• Nokkrir bitar af púðursykursmarengsbotni sem var keyptur í búð.

Aðferð:

Byrjið á sósunni. Bræðið allt saman í potti við vægan hita. Setjið til hliðar og leyfið að kólna. Þeytið rjómann. Hrærið kókosbollunum saman við. Setjið annan botninn á tertudisk og dreifið skornu jarðarberjunum yfir. Setjið svo rúmlega helminginn af rjómanum ofan á jarðaberin og hrískúlur þar ofan á. Leggið hinn botninn yfir. Dreifið restinni af rjómanum yfir. Skreytið með jarðarberjum, hrískúlum og marengsbrotum. Hellið vel af bingókúlusósunni yfir allt saman. Kælið í um 4 klst áður en borið fram. 

Ein af uppáhalds matarbloggurunum sem ég fylgist með er Smitten Kitchen –  Ég hef ósjaldan eldað eftir frábæru uppskriftunum sem þar má finna og aldrei orðið fyrir vonbrigðum. Það er einmitt þaðan sem þessi hugmynd er sprottin. Ég breytti þó einhverju smá hér og þar en pælingin er sú sama. Þetta sló svo þvílíkt í gegn á heimilinu að við getum eiginlega ekki beðið eftir að hafa þetta aftur í matinn. Það er líka ákaflega gott, hollt og umhverfisvænt og allt það að elda grænmetisrétti nokkrum sinnum í viku og fer bara talsvert vel með fjárhaginn. Sósan er stjarnan í þessum rétti og ég mæli með að tvöfalda uppskriftina. Ekki láta langan hráefnislista hræða ykkur, öll innihaldsefnin má finna í næstu verslun. Svo gildir hið fornkveðna að svona sósur þarf aðeins að smakka áfram. En útkoman er algjört dúndur! Prófiði bara. 

Quinoa skál með bökuðu grænmeti og hnetusósu (fyrir 3-4)

• 3 dl quinoa, skolað
• 5 dl vatn
• 1 msk eða 1 teningur kjúklinga- eða grænmetiskraftur
• 1 sæt kartafla
• 1 brokkolíhöfuð
• Hreinn fetaostur (fetakubbur)
• Sesamfræ
• Vorlaukur, smátt saxaður
• Ólífuolía, sjávarsalt og nýmalaður svartur pipar
• Himnesk hnetusósa:
• 2 msk hreint ósætt hnetusmjör
• 2 msk tahini (sesamsmjör)
• 1 msk sítrónusafi
• 1 msk hrísgrjónaedik (líka hægt að nota annað edik)
• 1 tsk chillimauk (sambal oelek)
• 1 hvítlauksrif, hakkað
• 1 msk rifið engifer
• 1/2-1 msk sojasósa (ég nota alltaf tælenska light soysauce)
• 1 msk hunang, agavesíróp eða önnur sæta
• 1-2 msk ristuð sesamolía
• 3-4 msk vatn

Aðferð: Byrjið á að sjóða quinoað – Mér finnst gott að skola quinoa í fínu sigti undir köldu vatni áður en ég sýð það, það minnkar aðeins biturt bragðið sem getur verið af því. Setjið vatnið í pott ásamt kraftinum og hleypið suðunni upp. Hellið quinoa út í og hrærið aðeins. Lækkið hitann og látið sjóða undir loki við vægan í 15 mínútur. Takið þá lokið af og leyfið að sjóða þar til allur vökvinn er horfinn, u.þ.b 10 mínútur.  Takið þá af hitanum og hrærið í með gaffli.

Hitið ofn í 200 gráður. Flysjið og skerið sætu kartöfluna í teninga. Veltið upp úr olíu og kryddið með salti og pipar, setjið í fat og bakið í 15 mínútur. Skerið þá brokkolíið smátt og setjið hjá sætu kartöfluteningunum, kryddið með salti og pipar, aðeins meiri olíu og bakið áfram í 15 mínútur. Á meðan er upplagt að gera sósuna. Setjið allt hráefnið í blandara eða matvinnsluvél og vinnið vel saman. Smakkið ykkur áfram þar til ykkur finnst sósan góð, ég vil t.d. hafa mína talsvert sterka með vel af chilli og engifer og bæti aðeins við það. Allt fer þetta eftir smekk. Ég mæli með að gera tvöfalda uppskrift af sósunni.

Setjið skálina svo saman: Quinoa fer í botninn, svo grænmetið þar ofan á ásamt vel af sósunni góðu og skreytt með sesamfræjum, vorlauk og fetaosti. 

Ég var sannarlega ekki að finna upp hjólið með þessu hrökkbrauði – því er nú ver og miður vegna þess að það er einstaklega gott. Hafandi prófað um það bil 137 útgáfur af svona hrökkbrauði er þetta mín útgáfa og sú sem ég geri oftast. Einfalt og alveg sjúklega gott. Það er valfrjálst að setja ost ofan á, ef þið eruð sælkerar skulið þið samt gera það. Ég geri það ekki alltaf, en ef ég á til góðan bragðmikinn ost eins og parmesan, grana padano, gruyére eða aðra snilld nota ég það óhikað. Þið getið svo bara notað þau fræ sem ykkur þykja góð eða þau sem þið eigið inni í skáp.

Ostakex með sesamfræjum:

• 2 dl spelt (fínt eða gróft eða bæði)
• 1 ½ dl sesamfræ
• ½ dl sólblómafræ
• ½ dl chiafræ
• 1 tsk sjávarsalt
• ½ dl ólífuolía
• 1-1 ½ dl heitt vatn
• 2 dl rifinn parmesan eða annar bragðmikill ostur

Aðferð: Hitið ofn í 200 gráður. Öllu nema ostinum blandað vel saman í skál, ég nota bara venjulega matskeið við blöndunina. Setjið vatnið smám saman út í blönduna, þið þurfið e.t.v. ekki að nota það allt. Deigið á að vera eins og frekar þykkt og blautt brauðdeig. Takið eina örk af bökunarpappír (á stærð við bökunarplötu) og leggið á borð, setjið deigið á pappírinn og leggið aðra bökunarpappírsörk ofan á. Fletjið út með kökukefli þangað til deigið fyllir næstum út í bökunarpappírsörkina. Fjarlægið efri bökunarpappírinn, stráið ostinum yfir og skerið för í deigið t.d. með pizzahníf í þá stærð sem þið vijið hafa kexið. Leggið á bökunarplötu og bakið í 15 mínútur eða þar til gullinbrúnt.

Þessi uppskrift átti nú að vera komin inn fyrir löngu. Ég gerði hana 28. ágúst á afmælisdegi mömmu og færði henni á kaffiborðið. Síðan þá hef ég bara verið frekar upptekin í vinnu og allskonar skemmtilegheitum og svo skelltum við hjónakornin okkur til Parísar í langþráða nokkurra daga ferð. Það er skemst frá því að segja að París var fullkomin, allt sem við borðuðum var gott, enda allir veitingarstaðir vel ígrundaðir gegnum Tripadvisor og hint frá vönu Parísarfólki, hótelið var svo jafnvel enn betra, fólkið skemmtilegt og borgin skartaði sínu fegursta. Við náðum að skoða helling og upplifa ýmislegt sniðugt en erum sem betur fer enn með langan lista af hlutum sem við náðum ekki að gera. Við hjóluðum borgina þvera og endilanga og ég er handviss um að það sé ein besta leiðin til að skoða stórborgir á borð við París, maður nær aldrei að ganga svona mikið og svo missir maður af svo miklu ef of miklum tíma er varið í neðanjarðarlestunum. Við förum aftur til Parísar, það er alveg víst. Ég held að ég þurfi ekkert að hafa of mörg orð um þessa tertu, hún er bara alveg ofsalega góð og sparileg ..og ekki sykurlaus eða laus við eitt eða neitt nema hollustu kannski. Hún er reyndar glútenlaus. Það er eitthvað!

Pavlova með mokkarjóma og daimkurli:

• 6 eggjahvítur
• 300 gr sykur
• 1 tsk vanilluextract
• 1 tsk borðedik eða hvítvínsedik
• 2 tsk maíssterkja eða kartöflumjöl

Aðferð: Hitið ofn í 180 gráður, ég nota blástur því marengsinn er bakaður á tveimur plötum. Þeytið eggjahvíturnar þar til þær byrja aðeins að freyða. Bætið sykrinum hægt og rólega saman við á meðan þið þeytið áfram. Þeytið í 1-2 mínútur eftir að sykurinn er allur kominn saman við. Bætið þá vanillu, ediki og maíssterkjunni saman við og þeytið örstutt saman við. Skiptið marengsinum jafnt á tvær smjörpappírsklæddar bökunarplötur og myndið hringi sem eru u.þ.b 20 cm í þvermál. Setjið plöturnar inn í ofn og lækkið þá strax hitann í 120 gráður. Bakið í 75 mínútur. Opnið þá hurðina á ofninum og leyfið marengsinum að kólna alveg inni í ofninum. Sniðugt að baka pavlovurnar að kvöldi og leyfa þeim að kólna inni í ofni yfir nótt.

Fylling:

• 7 dl rjómi
• 1 tsk instant kaffiduft leyst upp í 1 msk af sjóðandi vatni
• 2 msk hreint kakóduft
• 3 msk flórsykur
• 1 tsk vanilluextract
• 2 pokar Daimkurl
• Jarðarber eftir smekk

Aðferð: Rjóminn, kaffið, kakóið, flórsykur og vanilla sett saman í skál og þeytt þar til næstum stífþeytt. 1 poki af daimkurli sett út í. Helmingurinn af rjómanum settur á milli marengsbotnanna og hinn helmingurinn settur ofan á. Skreytt með restinni af daimkurlinu, jarðarberjum og bræddu súkkulaði.

Ofan á:

• 50 gr suðusúkkulaði
• 1/2 dl rjómi

Aðferð: Brætt saman í potti eða örbylgjuofni við vægan hita. Leyft að kólna alveg og svo hellt yfir tertuna að lokum. 

Ég gat eiginlega ekki fundið nógu góðan titil á þessa uppskrift. Hveitilaus súkkulaðikaka gerir þessari himnesku súkkulaðiköku bara ekki nægilega góð skil. Ég hef nokkrum sinnum gert kökuna og aðlagað hana örltíið gegnum tíðina en uppskriftin kemur upphaflega frá Nigellu. Ég treysti henni alltaf þegar kemur að súkkulaði, samanber þessa uppskrift. Kakan er mjög blaut, en líka létt í sér, næstum því eins og bökuð súkkulaðimús, enda kallar Nigella kökuna ”Chocolate cloud cake”. Hún lyftir sér vel en fellur svo í miðjunni þegar hún kólnar. Miðjan er því upplögð til að fylla af einhverju góðgæti. Mér finnst fallegt að setja ber í miðjuna, en stundum þegar berin eru ekki upp á sitt besta er upplagt að léttþeyta rjóma og setja ofan á miðja kökuna, dusta svo smá kakódufti yfir eins og Nigella gerir.

Hveitilaus súkkulaðikaka:

• 250 gr 56% súkkulaði
• 125 gr smjör
• 1 tsk vanilluextract
• 1/4 tsk salt
• 2 dl sykur (skipt í tvennt)
• 6 egg (2 heil, 4 eggjarauður og hvítur aðskilið)

Aðfðerð: Hitið ofn í 180 gráður (160 með blæstri). Bræðið smjörið og súkkulaðið við vægan hita. Takið af hitanum þegar bráðnað og bætið salti og vanillu saman við, leyfið að rjúka. Setjið tvö heil egg og fjórar eggjarauður í skál ásamt 1 dl af sykri og þeytið vel saman. Þeytið eggjahvíturnar ásamt 1 dl af sykri í annarri skál þar til stífþeyttar. Hellið brædda súkkulaðinu saman við eggjarauðublönduna og hrærið vel saman við. Bætið svo eggjahvítunum varlega saman við og hrærið hægt og rólega út í með sleif eða sleikju.

Hellið deiginum í ósmurt 24cm lausbotna smelluform og bakið í 35-40 mínútur. Kælið í a.m.k 1 klst áður en þið fjarlægið hringinn varlega af smelluforminu. Gott er að renna hníf meðfram hliðunum á forminu til að losa kökuna frá hliðunum. Toppurinn á kökunni á að vera svolítið sprunginn og skemmtilegur.

*ATH. Ég ber kökuna fram á botnum úr smelluforminu. Kakan er of laus í sér í viðkvæm til að hægt sé að hvolfa henni og fjarlægja botninn.

*ATH. Einnig er hægt að baka kökuna í eldföstu móti og bera fram heita eða volga með rjóma og/eða ís.

Sonur minn kom færandi hendi heim úr skólagörðunum í gær með fleiri kíló af dásamlegu grænmeti sem hann hefur ræktað í sumar. Þvílík hamingja sem fylgdi þessari grænmetissendingu. Það vita flestir að það jafnast hreint ekkert á við nýsoðið smælki borið fram með smjeri og góðu sjávarsalti. Það eru því góðir tímar framundan hjá okkur og ýmislegt prófað með nýja grænmetinu þó stundum sé líka bara gott að borða það hrátt eins og það kemur upp úr jörðinni. Eitt af grænmetinu sem Gunnar kom með heim var grænkál. Það skal viðurkennast hér með að einlægari aðdáendur grænkáls en undirrataða má auðveldlega finna. Ég veit ekki alveg af hverju hálfgert æði spratt í kringum þetta stórkostlega grófa og óárennilega kál? Soðið, hrátt eða steikt er það bara ekki að gera neitt fyrir mig svei mér þá. En má ég þá víkja sögunni að þessu stórgóða grænkálssnakki. Einu leiðinni til að borða grænkál ef þið spyrjið mig. Eins mikið og mér mislíkar almennt grænkál er ég jafn hrifin af grænkálssnakki. Það gjörsamlega umbreytist í eitthvað dásamlega stökkt, létt og skemmtilegt. Það er ekkert mál að gera svona snakk en gott að hafa nokkur atriði í huga. Ég hvet ykkur til að prófa grænkálssnakk og koma einhverjum á óvart með þessu nýstárlega nasli.

Svona geri ég:

• Eitt vænt búnt grænkál (passlegt á tvær bökunarplötur)
• 1 msk ólífuolía (ekki freistast til að setja meira)
• 1/2 tsk laukduft
• 1/2 tsk hvítlauksduft
• 1/2 tsk sítrónupipar
• 1 tsk reykt paprika
• 1/4 tsk cayenne pipar (má sleppa)
• 1 tsk gott sjávarsalt (t.d. Saltverk)

Hitið ofn í 145 gráður með blæstri, annars 165 gráður. (Mér finnst blástur virka betur hér) Byrjið á að fjarlægja stilkana af grænkálinu og rífið það svo í passlega bita, passið að hafa bitana ekki of litla. Setjið grænkálið í skál og sáldrið olíunni yfir það. Nuddið olíunni vel inn í allt grænkálið með fingrunum þannig að hver einasti grænkálsbiti hafi smá olíu á sér. Það má alls ekki ofgera olíunni hér, smá olía dugar á helling af grænkáli. Hrærið kryddinu saman í skál og stráið yfir kálið. Hrærið því vel saman við. Setjið kálið í einfalt lag á tvær pappírsklæddar bökunarplötur. Alls ekki hrúga eða stafla kálinu, þá er meiri hætta á að það gufusoðni í stað þess að steikjast. Bakið í 20-25 mínútur. Leyfið snakkinu að kólna á bökunarplötunni. Setjið á fallegan disk eða skál og berið fram. Stráið meira salti yfir ef ykkur finnst þurfa. 

Ég hef legið á þessari uppskrift eins og ormur á gulli. Það er langt síðan ég bauð upp á tíramímúsina sem eftirrétt og hef eiginlega ekki getað hætt að hugsa um hana síðan. Ef þið kunnið að meta tiramisu og þess háttar eftirrétti get ég lofað að þetta á eftir að slá í gegn hjá bragðlaukunum. Nú og fyrir utan bragðið þá tekur þetta afar stutta stund í undirbúningi og getur svo bara staðið inni í ísskáp og beðið þess að vera borðað.. Ef þið getið þá beðið. Ég fékk hugmyndina að uppskriftinni upphaflega á matarblogginu crazyforcrust.com – Þar má finna ýmislegt girnilegt. Uppskriftinni breytti ég svo lítillega. Uppskriftin er rífleg fyrir fjóra sælkera sem frekar stór eftirréttur. Mér finnst þó huggulegra að hafa eftirrétti litla og sæta svo mér þykir uppskriftin passleg fyrir sex.

Tíramímús (fyrir 4-6):

• 2 sléttflullar tsk instant kaffiduft (instant espressoduft er mjög gott ef þið eigið það)
• 3 msk sjóðandi vatn
• 2,5 dl rjómi
• 1,5 dl flórsykur
• 250 gr mascarpone rjómaostur við stofuhita
• 1 vanillustöng (eða 2 tsk vanilluextract)
• 2 msk amaretto líkjör eða annar sætur líkjör (hægt að nota t.d. Tía maria, sérrý, Grand Marnier eða Marsala) Má líka sleppa víninu.
• 2 msk ósætt kakóduft
• 50 gr súkkulaði

Aðferð: Byrjið á að þeyta rjómann. Geymið hann í kæli. Blandið kaffiduftinu og heita vatninu saman í bolla og leyfið að rjúka. Þeytið mascarpone ostinn með flórsykrinum þar til silkimjúkt. Skafið fræin vel innan úr vanillustönginni. Bætið vanillu. líkjör og kaffiblöndunni saman við ostablönduna og þeytið vel saman. Blandið að lokum þeyttum rjómanum varlega saman við með sleikju.

Setjið blönduna í sprautupoka og sprautið í falleg glös (líka hægt að setja með skeið í glösin). Dustið örlitlu kakói gegnum sigti á milli laga svo úr verði falleg falleg lagskipting. Rífið að lokum súkkulaði yfir efsta lagið í öllum glösunum. Kælið í 1-2 klst og berið fram kalt. Má gera daginn áður en gætið þess þá að setja filmu yfir glösin. 

Þessi ógurlega fljótlega og ljúffenga uppskrift slær beint í mark þegar grillið er dregið fram. Uppskriftina má jafnt nota á læri, leggi, bringur eða heilan kjúkling. Eina sem þarf að vara sig á er að hafa grillið ekki of heitt því hunangið á það til að brenna. Gott er að byrja á að brúna kjúklinginn vel og setja hann svo á óbeinan hita til að klára eldunina. Ég ber fram með þessu gott matarmikið salat og grillaða sítrónur til að kreista yfir kjötið. Mæli heilshugar með þessum dásamlega klístraða kjúlla.

Sterk og klístruð chilli kjúklingalæri á grillið (fyrir fjóra)

• 800 gr úrbeinuð kjúklingalæri
• 2 vænar msk chillimauk úr krukku t.d. sambal oelek
• 2 msk hunang
• 2 msk sojasósa

Aðferð: Blandið saman chilli, hunangi og sojasósu. Veltið kjúklingalærunum vel upp úr blöndunni og látið marinerast í smá stund. Gott er að láta kjúllann liggja í leginum í ísskáp yfir nótt eða a.m.k 1 klst. En það þarf ekki. Grillið þar til kjúklingurinn er eldaður í gegn. Ef þið viljið extra klístraðan og sterkan kjúkling mæli ég með að búa til tvöfalda uppskrift af kryddleginum og pensla á nokkrum sinnum á kjúllann á meðan hann grillast.