Eldhúsperlur

Sumarleg berjabaka

maí 2, 2014 by helenagunnarsd 3 Comments

Ég á ennþá aðalbláber í frystinum síðan í haust, dásamlegur fylgifiskur þess að vera gift inn í eina mestu bláberjafjölskyldu Íslands þar sem fólk týnir ber af fagmennsku og kann svo vel að meta þessa ljúffengu og hollu ókeypis afurð sem náttúran gefur okkur. Ég viðurkenni það þó fúslega að berjatýnsla hefur hingað til ekki verið mín sterkasta hlið, gengur aðeins of hægt fyrir minn smekk. Þetta er samt að lagast aðeins með árunum, ég gat alveg týnt svona tvo lítra í fyrra, alveg sjálf. Ég er voða sparsöm á þessi ber og líður eins og ég liggi á gulli, tými þeim alls ekki í hvað sem er, sem er sennilega vitleysa. En jæja bláberin (aðal) voru sumsé í frystinum og ég ákvað að reyna að vera svolítið húsmóðurleg í mér og baka eitthvað með 1. maí kaffinu og mikið var yndislegt að gæða sér á nýbakaðri berjabökunni í sólinni á pallinum. Það er alveg hægt að borða hana svona eins og hún kemur fyrir en þeyttur rjómi eða vanilluís gerir auðvitað gott enn betra. Mér finnst mjög gott að nota pálmasykur í bakstur, hann gefur gott karamellubragð, er dálítið dökkur og fer aðeins betur með blóðsykurinn en hvítur sykur. Ég fæ pálmasykurinn í Bónus hjá Sollu vörunum, ef þið viljið ekki nota hann er vel hægt að nota venjulegan sykur eða hrásykur, í sama magni.

Sumarleg berjabaka (bollamálið mitt er 2.5 dl):

4 bollar frosin bláber
2 bollar jarðarber, skorin í fjóra hluta
2 msk maíssterkja eða kartöflumjöl
4 msk pálmasykur
1 tsk vanilluextract
Í deigið ofan á:
3 egg
2 dl pálmasykur
1 tsk vanilluextract
120 gr smjör, brætt
3 msk sýrður rjómi
1 bolli fínmalað spelt eða hveiti
1/4 tsk salt
1/2 tsk lyftiduft
1 msk kanilsykur

Aðferð: Hitið ofn í 160 gráður með blæstri, annars 180 gráður. Smyrjið eldfast mót eða pæform. Blandið bláberjunum, jarðarberjunum, maíssterkjunni, pálmasykrinum og vanillu saman í skál þannig að sterkjan og sykurinn þekji berin vel. Helllið blöndunni því næst í formið.Bræðið smjörið og leyfið því að kólna aðeins. Þeytið egg og sykur þar til ljóst og létt. Bætið vanillu, smjöri, sýrðum rjóma, spelti, lyftidufti og salti saman við og blandið vel saman. Hellið deiginu yfir berin og dreifið aðeins úr því. Stráið einni matskeið af kanilsykri yfir að lokum og bakið í 40-45 mínútur. (Ef berin sem þið notið eru ekki frosin er nóg að baka í um 30-35 mínútur).Berið bökuna fram heita eða volga, gjarnan með vanilluís eða rjóma.

Nokkrar sumarlegar uppskriftir

apríl 24, 2014 by helenagunnarsd Leave a Comment

Gleðilegt sumar kæru lesendur og takk fyrir samfylgdina í vetur. Ég ákvað í tilefni sumarkomu að taka saman nokkrar uppáhalds uppskriftir sem ég tengi við björt sumarkvöld og hækkandi hitastig. Þó vissulega megi nú elda þetta allt saman líka í harðavetri verður maður nú svona aðeins grill glaðari á sumrin. Ég sæki til dæmis ósjálfrátt í léttari og fljótlegri mat þegar fer að vora því það er vissulega margt skemmtilegra en að standa í eldhúsinu ef veður er gott og allir vilja vera úti. Það þarf þó ekki að vera flókið að elda frá grunni góðan mat heima sem tekur stutta stund. Ég vona að sumarið verði ykkur öllum yndislegt!

Kalt pastasalat er alltaf vinsælt. Fljótgert og svo ljúffengt. Þetta er líka upplagt nesti í lengri eða styttri ferðalög.

Ó þessi lax. Finnst ykkur fiskur ekkert spes? Setjið á hann þessa marineringu og þið skiptið um skoðun. Namm!
Létt og fljótlegt meðlæti – nú eða forréttur, alltaf svo sígilt og gott. Mozarella og tómatar. Ég gæti borðað þetta á hverjum degi.Grillað lambakjöt á teini með papriku og rauðlauk. Allt á teini er gott og sumarlegt. Það er bara þannig.

Þessi satay kjúklingaspjót eru ekki síðri en lambaspjótin. Sumarleg og dásamlega bragðgóð.
Grillaður Halloumi ostur á salatbeði með jarðarberjum og smá chilli. Getur verið meðlæti, smáréttur eða forréttur. Bara gott.Jarðarber í salati eru yndilslega góð. Hérna fá þau að leika sér við rifinn piparost og grænmeti. Frábært og einfalt salat!

Ég mun seint fá leið á þessari himnesku gleðisprengju. Svo einföld er hún að hana mætti útbúa í útilegunum í sumar.Einhverjum finnst ég sennilega fara yfir strikið með grilluðum bönunum svona á sumardaginn fyrsta. En þeir standa alltaf fyrir sínu og minna mig bara á útilegur um hásumar. Þessir eru líka fylltir með After eight súkkulaði…!

Fisléttar morgunverðar pönnukökur með bláberjasýrópi

apríl 23, 2014 by helenagunnarsd Leave a Comment

Nú koma frídagarnir á færibandi sem er nú ekki til að skemma fyrir stemmningunni sem fylgir björtum vorkvöldum og örlítið hækkandi hitastigi. Í gærkvöldi söng lóan fyrir utan gluggann hjá mér þegar ég dró niður gardínurnar og hún var mætt aftur í morgun þessi elska og söng eins og enginn væri morgundagurinn. Mikið kann ég vel að meta vorið, ég held að það sé uppáhalds árstíminn minn. Mér finnst allir vera í góðu skapi. Talandi um gott skap. Ég hefði sennilega ekki getað glatt son minn meira en þegar ég sagði honum í gærkvöldi að á morgun mætti hann fara á strigaskóm í leikskólann. Þvílík gleði og tilhlökkun! Sá litli valhoppaði svo í morgun inn á leiksólann á glansandi nýjum strigaskóm sem hafa beðið í forstofunni síðan fyrr í vetur. Um páskana gerði ég þessar yndislegu pönnukökur sem ég hef gert svo oft áður en einhverra hluta vegna aldrei sett hingað inn. Pönnukökurnar eru afar léttar og góðar, lausar við fitu og bras og þeyttar eggjahvíturnar gefa þeim þessa ótrúlega góðu áferð, svona eins og maður sé að borða ský.

Fisléttar morgunverðar pönnukökur (fyrir 3-4)

130 gr fínmalað spelt
2 tsk vínsteinslyftiduft
1/4 tsk salt
4 egg
1 1/2 dl mjólk
1/2 tsk vanilluextract
(Ef þið viljið sætari pönnukökur er sjálfsagt að þeyta t.d 2 msk af sykri, hunangi eða öðru sætuefni saman við mjólkina og eggjarauðurnar, mér finnst það þó ekki þurfa þar sem bláberjasýrópið er svo sætt og gott)

Aðferð: Hrærið saman hveiti, lyftidufti og salti. Aðskiljið eggjarauðurnar frá hvítunum. Hrærið eggjarauðunum, vanillu og mjólkinni saman við þurrefnin. Stífþeytið eggjahvíturnar og blandið þeim rólega saman við deigið. Steikið á pönnu, báðum megin þar til eldaðar í gegn. Ég setti nokkur frosin bláber á helminginn af pönnukökunum áður en ég sneri þeim við á pönnunni. Það væri líka hægt að setja niðurskorna banana til dæmis. Ég nota þunga pottjárnspönnu við steikinguna og nota enga fitu, finnst það ekki þurfa og þær festast ekkert við pönnuna.

Volgt bláberjasýróp:

1 1/2 dl hlynsýróp
4-5 msk frosin bláber

Aðferð: Sett í pott og hitað saman við vægan hita þar til bláberin hafa þiðnað og sýrópið heitt en ekki farið að sjóða. Berið fram með pönnukökunum, niðursneiddum bönunum, jarðarberjum, bláberjum og pínu íslensku smjöri.

Kornflex terta með bananarjóma og saltri karamellusósu

apríl 14, 2014 by helenagunnarsd 2 Comments

Nú þegar páskavika gengur í garð þykir mér afar viðeigandi að gefa hér uppskrift að þessum dásamlega og auðvelda eftirrétti sem er meira að segja bara pínu páskalegur ef maður fer út í það. Það má með sanni segja að undirrituð hafi ekki verið að finna upp hjólið í eldhúsinu þegar þessi ljúffenga terta var gerð. Að sama skapi er nokkuð ljóst að uppskriftir að tertunni má finna á mjög mörgum matarbloggum sem og hingað og þangað um veraldarvefinn. Ég ætla þó óhikað og kinnroðalaust að birta bæði myndir og uppskrift að minni útgáfu af þessari dásamlegu tertu því aldrei er góð vísa of oft kveðin. Tertan er ótrúlega vinsæl sem er alls ekki skrýtið því hún er bæði fljótleg og óskaplega góð. Ég nota svipaða uppskrift og ég er vön að nota í rice krispies kökurnar mínar en notaði kornflex í botninn í þetta skiptið. Mér þótti það koma enn betur út. Ofan á notaði ég svo ljúffenga karamellusósu með örlitlu góðu sjávarsalti. Það var auðvitað bara himneskt. Ég hvet ykkur til að vera óhrædd við að prófa að nota gott sjávarsalt með svona sætindum, það einfaldlega gerir bara gott betra. Ég nota alltaf saltið frá Saltverk. Bæði þykir mér það mjög bragðgott og svo er áferðin á því afar góð. Ein sneið af þessari dásemd slær líka út hvaða páskaeggi sem er..!Klístruð kornflex terta með bananarjóma og saltri karamellusósu:

Í botninn:
75 gr smjör
150 gr suðusúkkulaði
50 gr rjómasúkkulaði
5 msk sýróp
1/4 tsk gróft sjávarsalt
4 1/2 bolli Kornflex eða Rice Krispies
Ofan á:
2-3 bananar
4 dl rjómi
1 msk kakó
ca. 1 dl góð karamellusósa (t.d þessi hérna eða keypt úr búð)
1/2 tsk gróft sjávarsalt

Aðferð: Setjið allt sem á að fara í botninn í pott nema Rice krispies/Kornflex. Bræðið saman við vægan hita. Takið af hitanum, bætið korninu saman við og hrærið vel saman með sleif eða sleikju þannig að súkkulaðiblandan þekji allt kornið vel. Hellið blöndunni í fat eða kökuförm, þrýstið vel í botninn og kælið í ísskáp í 30 mínútur eða lengur. (Botninn geymist vel í nokkra daga undir plastfilmu í ísskáp og hann má einnig frysta). Sneiðið bananana niður og dreifið yfir botninn. Þeytið rjómann og dreifið svo úr honum yfir tertuna. Dustið kakóinu yfir í gegnum sigti og hellið karamellusósunni svo yfir. Myljið sjávarsaltið milli fingranna og dreifið yfir. Tertuna má bera fram strax eða geyma í ísskáp og bera fram síðar. Mér finnst gott að leyfa tertunni að standa í stofuhita í 20 mínútur áður en hún er skorin, þá mýkist botninn aðeins svo auðveldara verður að skera hann.

Bláberjasæla

apríl 9, 2014 by helenagunnarsd 4 Comments

Uppáhalds sjónvarpsefnið á heimilinu hjá okkur mæðginum þessa dagana er Eldað með Ebbu á RÚV. Eruð þið ekki örugglega búin að vera að horfa? Það skiptir ekki máli hvort hún er að búa til skærgræna safa eða dýrindis kvöldmat, allt verður þetta jafn girnilegt. Svo lítur allt sem hún gerir út fyrir að vera svo auðvelt, sem það er. Ég hef prófað óteljandi margar uppskriftir frá henni, þær eru allar góðar og í alvöru svo einfaldar og þægilegar. Hvet ykkur til að prófa. Sonur minn hefur til dæmis ALDREI fengist til að drekka græna drykki eða djúsa. Einum Ebbu þætti seinna og barnið gúllar í sig fullu glasi af ósætum skrímslagrænum safa án þess að hika og hefur gaman að því, mér til mikillar gleði! Þessi drykkur sem ég gef uppskrift að núna hefur fylgt mér í nokkur ár og sá litli hefur aldrei fúlsað við honum. Okkur þykir hann alltaf jafn góður og það tekur enga stund að henda innihaldinu í blandarann og þá er morgunmaturinn tilbúinn mínútu seinna. Mér finnst gott að hafa allt hráefnið nálægt blandaranum á morgnana þegar ég geri drykkinn, hljómar kannski asnalega en trúið mér, það munar heilmiklu að þurfa ekki að grafa ofan í skúffum eða skápum og leita að því sem á að fara í drykkinn. Sérstaklega á morgnana þegar allir eru að flýta sér og ég er alltaf að flýta mér. Það getur því borgað sig að hafa allt innan seilingar eða flýta fyrir sér á kvöldin og gera allt tilbúið fyrir svefninn. Stundum skipti ég bláberjunum út fyrir frosin jarðarber og hálfan banana, það þykir stráknum mínum ofsalega gott, enda bragðast það eins og besti jarðarberjasjeik.

Bláberjasæla (fyrir 1):

2 dl ósæt möndlumjólk
1 dl vatn (minna ef þið viljið þykkan drykk)
2-3 dl frosin bláber
1 tsk kókosolía
1 msk hampfræ
1 msk chiafræ
4-5 dropar stevia, ef þið vijið sætara bragð. Má líka sleppa.

Aðferð: Allt sett í blandara og blandað þar til silkimjúkt. Stundum set ég eina matskeið af hreinu mysu- eða hemp próteini út í drykkinn ef ég á það til. Þá verður drykkurinn matarmeiri og maður er lengur saddur.

Mjúkt bananabrauð með súkkulaðibitum

apríl 3, 2014 by helenagunnarsd 2 Comments

Á sunnudaginn helltist óskemmtileg flensa í son minn, sama dag fór maðurinn til útlanda og áform mín um vinnusama viku fóru út um þúfur. Í dag er stráksi þó allur að hressast, pabbinn kominn heim og rútínan sem átti að byrja á mánudaginn gat því byrjað í morgun, þremur dögum seinna. Það á ekkert sérstaklega vel við mig að vera heima í marga daga án þess að fara út, ég verð eiginlega að komast út allavega svona einu sinni á dag. Þegar það er ekki í boði verður kona að finna sér eitthvað til dundurs svona heima við sem felur líka í sér eitthvert skemmtanagildi fyrir lasið barn. Það voru því vel þroskuðu bananarnir á eldhúsborðinu sem fengu að finna til tevatnsins á sunnudaginn og úr þeim varð þetta dásamlega bananabrauð sem sonurinn bæði naut þess að baka og borða. Það er samt eiginlega rangnefni að kalla þetta brauð þar sem þetta er nú meira í líkingu við sæta köku, þetta er allavega sætabrauð það er eitt sem er víst og ó já, gott er það. Uppskriftin er stór og passaði rétt svo í stærsta brauðformið mitt, það væri því ekki úr vegi að skipta deiginu í tvö minni form.

Mjúkt bananabrauð með súkkulaðibitum:

3 egg
2 1/2 dl púðursykur
1 tsk vanilluextract
1 1/2 dl bragðlítil olía
3 stórir bananar stappaðir
1/2 dl súrmjólk
5 dl fínmalað spelt eða hveiti
1 tsk matarsódi
1/2 tsk salt
3 dl saxað dökkt súkkulaði eða súkkulaðidropar

Aðferð: Þeytið saman egg, púðursykur og vanillu þar til ljóst og létt. Bætið olíunni út í í mjórri bunu og setjið stappaða bananana út í ásamt súrmjólkinni. Blandið þessu vel saman. Bætið þurrefnunum varlega út í ásamt súkkulaðinu og hrærið þessu saman með sleikju. Setjið í smurt form og bakið í u.þ.b 50 mínútur við 160 gráður með blæstri eða þar til að prjóni sem stungið er í miðja kökuna kemur tiltölulega þurr upp. Ef brauðið er bakað í tveimur minni formum er bökunartíminn u.þ.b 35 mínútur. Það er þó nauðsynlegt að fylgjast vel með því ofnar eru ansi misjafnir.

Útflattur chili kjúlli með hvítlauk og sítrónu

mars 28, 2014 by helenagunnarsd 4 Comments

Ég fæ seint leið á því að elda heilan kjúkling og hugsa að ég hafi prófað hundrað mismunandi útgáfur í gegnum tíðina. Hér á bæ er heill kjúklingur kallaður ”hæna” af þeim fimm ára og það er enginn vafi á því að þeim stutta þykir hænan margfalt betri en til dæmis kjúklingabringur. Hann dæsir þegar undirrituð býður upp á svoleiðis ómögulegheit. Ég er alveg á því að kjúklingabringur séu fyrir nútímabarnið það sem soðin ýsa var fyrir mig þegar ég var lítil. Oft á borðum og alveg ágætis matur en aldrei við nein sérstök húrrahróp eða fagnaðarlæti. Ég get svosum alveg tekið undir með stráknum og veit fátt betra, eða einfaldara en að elda heilan kjúkling. Þá fá líka allir eitthvað fyrir sinn snúð. Svo verður þessi fíni afgangur (allavega hjá okkur) sem má nota í hádegismat daginn eftir, inn í tortillakökur, út í kjúklingasalat og svo mætti lengi telja. Nýjasta hænu æðið á heimilinu er þessi skemmtilega flati chilli kjúklingur sem vekur ávalt lukku. Hryggbeinið klippi ég úr kjúllanum og baka hann svo í ofni með brjóstið upp (hér eru góðar leiðbeiningar hvernig maður klippir hrygginn úr kjúllanum). Bæði eldast kjúklingurinn fyrr með þessari aðferð og svo þykir mér skemmtilegt að bera hann fram svona. Ég hvet ykkir til að prófa þetta mikla gúmmelaði og lofa að Sambal chillimaukið gerir kjúklinginn alls ekki svo sterkan heldur bara alveg einstaklega ljúffengan.

Útflattur chilli kjúlli með sítrónum:

1 vænn heill kjúklingur
2-3 msk chillimauk eins og Sambal Oelek (fæst t.d í Bónus)
1 sítróna
2-3 hvítlauksrif
Ólífuolía, salt og pipar

Aðferð: Hitið ofn í 200 gráður eða 180 gráður með blæstri. Skolið kjúklinginn að utan og innan og þerrið með eldhúspappír. Snúið kjúllanum þannig að bringan snúi niður og náið góðu taki á honum. Klippið hryggbeinið/hryggsúluna úr kjúklingnum með góðum eldhússkærum (sjá hér). Leggið kjúklinginn þannig að bringan snúi upp og þrýstið með báðum höndum á bringubeinið þannig að það gefi undan og kjúklingurinn fletjist vel út, skerið nokkrar rákir í bringuna og lærin svo kryddið komist betur inn í kjötið. Penslið kjúklinginn með chillimaukinu báðu megin og kryddið með salti og pipar. Skerið sítrónuna í sneiðar. Leggið helminginn af sneiðunum í botninn á eldföstu móti ásamt hvítlauknum og leggið kjúklinginn þar ofan á. Setjið restina af sítrónunni yfir kjúllann og dreypið smá ólífuolínu yfir allt saman og setjið u.þ.b 1 dl af vatni í botninn á fatinu. Bakið í 40 mínútur og takið þá út og athugið hvort kjúklingurinn er tilbúinn með kjöthitamæli eða með því að skera í þykkasta hluta bringunnar. Ef hann er ekki alveg tilbúinn stingið honum þá inn aftur í 5 mínútur og athugið þá aftur. Það borgar sig að athuga frekar oftar en ekki til þess að ofelda ekki kjúklinginn. Þegar kjúklingurinn er tilbúinn tek ég hann út úr ofninum og leyfi honum að standa á borði í a.m.k 10-15 mínútur áður en ég sker hann. Þannig verður kjötið enn safaríkara. Ég ber þetta fram með kúskús og salati og dásamlega sítrónu, chilli, hvítlauks, kjúklingasoðinu sem kemur í botninn á fatinu.

Fljótlegu bollakökurnar með súkkulaðikremi

mars 26, 2014 by helenagunnarsd 4 Comments

Þessar bollakökur eru fljótlegri en margar aðrar bollakökur að því leyti að það þarf hvorki hrærivél né rafmagnsþeytara né mjúkt smjör eða brætt smjör eða annað dúllerí til að búa þær til. Öllu er einfaldlega skutlað í skál, hrært saman með písk og deigið er tilbúið. Uppskriftina fann ég á sínum tíma á síðunni hennar Mörthu Stewart og hef notað hana nokkuð oft síðan. Þetta er alveg upplögð uppskrift að nota þegar maður vill leyfa krökkum að spreyta sig við baksturinn þar sem hún er bæði einföld og fljótgerð.

Fljótlegu bollakökurnar með súkkulaðikremi (18-20 kökur):

3/4 bolli kakóduft
1 1/2 bolli hveiti eða fínmalað spelt
1 bolli sykur
1 tsk matarsódi
1 tsk lyftiduft
1/2 tsk salt
2 egg
3/4 bolli heitt vatn
3/4 bolli súrmjólk, ab mjólk eða hrein jógúrt
3 msk bragðlítil matarolía
2 tsk vanilluextractSúkkulaðikrem:

100 gr dökkt súkkulaði
200 gr mjúkt smjör
300 gr flórsykur
1 tsk vanilluextract
1-2 msk mjólk

Aðferð: Hitið ofn í 160 gráður með blæstri, annars 180 gráður. Hrærið öllum þurrefnunum saman með písk. Bætið restinni út í og hrærið saman þar til deigið er komið saman. Gætið þess þó að hræra ekki of lengi. Skiptið deiginu í 18-20 pappírsklædd bollakökuform og bakið í 20 mínútur. Kælið.

Krem: Bræðið súkkulaðið við afar vægan hita í potti, yfir vatnsbaði eða í örbylgjuofni. Þeytið mjúkt smjörið þar til ljóst og létt, bætið flórsykri og vanillu saman við og þeytið vel saman, 2-3 mínútur. Hellið kældu bræddu súkkulaðinu saman við og þeytið saman þar til vel samlagað. Bætið mjólk saman við ef ykkur finnst kremið of þykkt, 1-2 msk eftir smekk. Setjið í sprautupoka og sprautið á kældar kökurnar eða smyrjið á með hníf.

Appelsínugljáðar grísakótilettur með sinnepi og rósmarín

mars 21, 2014 by helenagunnarsd Leave a Comment

Eins og það er gaman og nauðsynlegt að fara í frí svona endrum og sinnum þá er alltaf jafn gott að koma heim aftur. Það þykir mér að minnsta kosti. Þrátt fyrir vandræðalega mikla flugþreytu og svefnleysi hjá heimilisfólki hér í gær gat ég eiginlega ekki beðið eftir að komast aftur í eldhúsið mitt. Ég eyddi talsverðum tíma í fríinu í að glugga í matartímarit og eftir að hafa rekist á girnilega uppskrift að grísakótilettum í Cooking Light hugsaði ég mér gott til glóðarinnar að elda eitthvað svipað þegar heim var komið. Útkoman var einstaklega góð og mér þykir þetta upplagður föstudags- eða helgarmatur.

Appelsínugljáðar grísakótilettur með sinnepi og rósmarín (fyrir 4):

5 grísakótilettur með beini
Safinn úr tveimur stórum appelsínum (u.þ.b 2 dl)
2 msk appelsínumarmilaði
2 msk grófkorna sinnep
1 hvítlauksrif smátt saxað eða rifið á rifjárni
3-4 ferskar rósmaríngreinar eða 2 tsk þurrkað
Salt og pipar

Aðferð: Hitið ofn í 180 gráður. Pískað saman í skál appelsínu safa, marmilaði, sinnepi, hvítlauk og kryddið með smá salti og pipar og 1 tsk af söxuðu rósmarín. Kryddið kjötið með salti og pipar og steikið á vel heitri pönnu þar til vel brúnað. Færið kjötið yfir á disk. Hafið pönnuna á meðalháum hita og hellið vökvanum á. Hleypið suðunni upp og leyfið að sjóða í 5 mínútur eða þar til sósan hefur aðeins þykknað. Leggið kjötið þá aftur á pönnuna og veltið vel upp úr sósunni. Leggið rósmaríngreinar ofan á og bakið í ofni í 8-10 mínútur eða þar til kjötið er eldað í gegn. Berið fram með fersku salati.

Bjór- og hunangsbrauð með valhnetum

mars 14, 2014 by helenagunnarsd 1 Comment

Við fjölskyldan höfum átt yndislega daga undanfarið í sólinni suður á Flórída. Fríinu er sem betur fer ekki lokið enn og ég sit í þessum skrifuðu orðum og horfi yfir sundlaugarbakka, sé nokkur pálmatré og bláan himinn. Þetta er eins og í draumi. Ég mátti hins vegar til að líta örstutt hingað inn, ég sakna þess dálítið að setja ekki inn uppskriftir í svona langan tíma. Ég hef frétt af einhverjum hálfgerðu leiðindaveðri heima svo mér þykir alveg upplagt að gefa ykkur uppskrift að gómsætu brauði sem fyllir heimilið af dásamlegum ilmi og hlýju. Þessi uppskrift birtist í Gestgjafanum fyrir nokkrum vikum og hefur sannarlega slegið í gegn hjá þeim sem hana hafa prófað. Það tekur fimm mínútur að hræra í deigið og það er ómótstæðilega gott nýbakað með smjöri og enn betra að dreypa örliltu góðu hunangi yfir bráðið smjörið. Já ég veit. Uppskriftina fann ég upphaflega í amerísku matreiðslublaði fyrir nokkrum árum, hún hefur þó breyst aðeins og þróast.

Brauð:

3 bollar fínmalað spelt
100 gr gróft saxaðar valhnetur
1 msk vínsteinslyftiduft
1 1/2 tsk sjávarsalt
3 msk hunang
1 flaska bjór (330ml)
3 msk brætt smjör

Aðferð: Hitið ofninn í 160 gráður með blæstri, annars 180. Blandið saman í stórri skál, spelti, lyftidufti, salti og valhnetum. Bætið bjórnum og hunanginu saman við og hrærið þar til rétt komið saman. Setjið deigið í smurt brauðform og hellið bræddu smjörinu yfir. Bakið í 50-60 mínútur. Leyfið brauðinu að kólna í 30 mínútur áður en það er skorið. Það er einstaklega gott að smyrja brauðið með smjöri og örlitlu af góðu hunangi.

Eldhúsperlur

Footer