Kjúklingabringur uppskrift

bbq salat með chilli-sesam kjúkling

mars 23, 2016 by helenagunnarsd Leave a Comment

Það er ískyggilega langt síðan uppskrift hefur birst hér inni, ekki síðan í janúar! Myrkur á kvöldmatartíma spilar vissulega mikið inn í ásamt almennu annríki. Þið getið reglulega séð nýjar uppskriftir eftir mig inni á www.gottimatinn.is og ef þið fjárfestið í tímaritinu Húsfreyjunni má þar finna helling af skemmtilegum uppskriftum. En að þessu salati – Það er varla hægt að kalla þetta uppskrift svo einfalt er það. Hlutföllin eru alls ekki heilög eins og svo oft í svona matargerð og um að gera að nota það sem manni þykir gott. Svona þykir mér salatið best. Þessi réttur slær í gegn þar sem hann er borinn fram og alveg upplagður í saumaklúbba.

bbq salat með chilli-sesam kjúkling (fyrir fjóra):

3-4 góðar handfyllir grænt salat (ég nota ferskt spínat og lambhagasalat)
1/2 agúrka
1 lítil rauð paprika
1/2 rauðlaukur
1 askja kirsuberjatómatar
5-6 msk fetaostur í olíu
3 kjúklingabringur
Olífuolía, salt og pipar
2 dl bbq sósa (ég nota alltaf Hunts hickory brown sugar)
1 tsk sambal oelek chillimauk (má sleppa ef maður vill ekki hitann)
3 msk sesamfræ
Ofaná (ef vill):
Svartar Doritos flögur, muldar
1 dós sýrður rjómi með 2 msk bbq sósu pískað saman við

Aðferð: Rífið salatið gróflega niður og leggið í botninn á fati eða stórum diski. Skerið grænmetið frekar smátt og dreifið ofan á. Skerið kjúklinginn í litla bita, kryddið með salti og pipar og steikið á pönnu uppúr smá olíu þar til hann hefur lokast á öllum hliðum. Hellið þá bbq sósunnu út á pönnuna ásamt chillimaukinu og látið þetta krauma saman við meðal-háan hita í um 5 mínútur eða þar til sósan hefur þykknað og kjúklingurinn eldaður í gegn. Stráið þá sesamfræjunum yfir hrærið saman og takið af hitanum. Leyfið hitanum aðeins að rjúka úr kjúklingnum 5-10 mínútur og hellið honum svo yfir salatið. Skreytið með smá grænmeti og e.t.v. meiri bbq sósu og drefið svo fetaosti yfir allt saman. Berið fram með flögunum og kaldri sósu.

Léttur mangó chutney kjúklingur með möndluflögum og sætum kartöflum

desember 17, 2013 by helenagunnarsd 4 Comments

Á stuttum og annasömum dögum eins og núna síðustu dagana fyrir jól gefst lítill tími til eldamennsku. Það er þó þannig að þegar það er mikið að gera og allir frekar uppteknir er svo notalegt að setjast niður og borða kvöldmat, sem þarf bara alls ekki að vera svo flókið. Ég hef sótt mikið í léttar og bragðmiklar uppskriftir undanfarið. Eldaði til dæmis þessa tælensku kjúklingasúpu í gær og maður minn, hvað hún var góð. Einmitt það sem við þurftum á þessu dimma mánudagskvöldi. Um helgina eldaði ég svo þennan létta og bragðgóða mangó chutney kjúklingarétt. Ég mæli með að nota gott mangó chutney í réttinn. Geeta´s premium Mango chutney er í sérstöku uppáhaldi hjá mér og fæst t.d í Hagkaup. Það er vel kryddað og ekki of sætt. Ég hef einnig rekist á svipað chutney í öðrum verslunum, svo um að gera að prófa sig áfram.

Léttur mangó chutney kjúklingur með möndluflögum og sætum kartöflum (fyrir 3-4):

4 kjúklingabringur
1/2-1 sæt kartafla (fer eftir stærð)
1 pressað hvítlauksrif
1 tsk rifið engifer
4-5 vænar msk mangó chutney (eða meira eftir smekk)
1,5 dl vatn
1 tsk kjúklingakraftur eða 1/2 mulinn kjúklingateningur
Handfylli af möndluflögum

Aðferð: Hitið ofn í 170 gráður með blæstri. Skerið sætu kartöfluna í þunnar sneiðar og leggið í botninn á eldföstu móti. Leggið kjúklingabringurnar ofan á. Hrærið saman hvítlauk, engifer, mangó chutney, vatni og kjúklingakrafti og hellið yfir kjúklinginn. Bakið í 25 mínútur. Takið þá út og dreifið möndluflögunum yfir og bakið áfram í 5 mínútur. Berið fram með fersku salati og brosi á vör!

Ofnbakaðar kjúklingabollur með sólþurrkuðum tómötum og papriku

ágúst 19, 2013 by helenagunnarsd Leave a Comment

Kjúklingur er á mínu heimili, ansi oft á borðum og þykist ég vita að svo sé á mörgum öðrum heimilum. Það er eiginlega takmarkalaust hvað hægt að gera við kjúkling og sennilega þess vegna sem erfitt er að fá leið á honum – matreiðslu möguleikarnir eru nánast endalausir. Svo oft sem áður átti ég bakka af kjúklingabringum í ísskápnum en var eitthvað heldur óviss um hvað ég ætti eiginlega að búa til úr þeim. Langaði auðvitað (eins og næstum alltaf) að gera eitthvað nýtt. Bæði fyrir okkur og svo auðvitað fyrir bloggið. Það er svo gaman að elda góðan mat og dunda við að gera hann það góðan að hann verði hæfur til birtingar hér inni.

Eins og ég hef talað um áður er mamma mín ansi sniðug í eldhúsinu og ég þakka henni hér með fyrir hugmyndina að þessum kjúklingabollum sem eru hreint stórgóðar! Ég notaði í þær það sem ég átti enda ákvörðunin tekin í skyndi, sólþurrkaðir tómatar og paprikan gerðu þær alveg dásamlega bragðgóðar og eftir smá grúsk á netinu stóðst ég ekki mátið að pensla þær með svona tómat gljáa frá henni Berglindi sem heldur úti síðunni Gulur Rauður Grænn og Salt. Kom hreint ótrúlega vel út og verða þessar án efa gerðar marg oft í viðbót. Bollurnar er afar einfalt að gera, sérstaklega ef maður er vopnaður matvinnsluvél. Ég gæti vel ímyndað mér að sniðugt væri að gera enn minni bollur úr uppskriftinni og bera fram sem fingramat eða smárétt í veislum, gómsætt!

Ofnbakaðar kjúklingabollur með sólþurrkuðum tómötum og papriku:

1 frekar lítil rauð paprika skorin gróft
1 hvítlauksrif, marið
Handfylli fersk steinselja
4-5 sólþurrkaðir tómatar
1 msk tómatpúrra
1-2 tsk sambal oelek chilimauk (fer eftir því hvað þið vijið hafa þetta sterkt)
800 grömm kjúklingabringur
1 egg
3 msk rjómi eða mjólk
3-4 msk góður brauðraspur
1/2 tsk sjávarsalt og nýmalaður pipar

Tómatgljái:

2 msk tómatpúrra,
1 msk balsamikedik
1 msk hunang
2 msk ólífuolía

Aðferð: Hitið ofn í 200 gráður eða 180 með blæstri. Setjið paprikuna, hvítlauksrifið, sólþurrkuðu tómatana, sambal oelek, tómatpúrru og steinselju í matvinnsluvél. Maukið létt þar til blandan hefur samlagast vel og þið eruð með frekar grófa blöndu. Setjið kryddblönduna í skál.Skerið kjúklingabringurnar í grófa bita og maukið niður í matvinnsluvélinni þar til þið eruð komin með kjúklingahakk. Setjið kjúklingahakkið í skálina með kryddblöndunni, bætið salti, pipar, eggi, brauðraspi og mjólk eða rjóma út í og blandið vel saman.

Ef ykkur finnst blandan of blaut, bætið þá aðeins brauðraspi saman við, mjólk ef ykkur finnst blandan of þurr. Búið til bollur úr hakkinu og setjið á bökunarpappírsklædda ofnplötu. Hrærið öllu innihaldinu í tómatgljáann saman, penslið ofan á bollurnar og bakið í um það bil 20 mínútur, bökunartími fer þó vissulega eftir stærð á bollunum. Berið fram t.d með salati, hrísgrjónum og kaldri jógúrtsósu.

Fljótleg satay kjúklingaspjót

júní 24, 2013 by helenagunnarsd 1 Comment

Það er ýmislegt í minni eldamennsku sem ég á alls ekki erfitt með að viðurkenna og það kinnroðalaust. Til dæmis nota ég oft grænmetis- eða kjöt kraft í formi teninga eða dufts sem ég veit að sumir fá svima af. Og mér þykir það bara allt í lagi, ekki sviminn sko heldur að nota teningana. Ég reyni oftast að kaupa góða teninga eða kraft sem inniheldur ekki MSG og fjárfesti stundum í lífrænum krafti. En ef ég finn það ekki notast ég við gamaldags Knorr kraft og það með góðum árangri. Ég veit að það hljómar æðislega rómantískt að búa til sitt eigið soð, leyfa kjöti eða grænmeti að malla við hæga suðu þar til það sýður niður og eitthvað töfrandi gómsætt gerist. Það er jú vissulega stundum staður og stund fyrir það. En eldamennska af þessum toga er kannski ekki eitthvað sem maður er að malla heima hjá sér svona dags daglega.

Fleira sem ég skammast mín ekki fyrir að nota tilbúið er t.d satay sósa, pestó, hummus og curry paste tilbúið úr krukku. Þar gildir hið gamalkunna að reyna að finna góða tegund sem manni líkar vel og svo er sjálfsagt að hressa aðeins upp á innihaldið með nokkrum leynivopnum úr ísskápnum. Allt þetta má þó vel útbúa heima hjá sér frá grunni sem er virkilega gaman svona inn á milli. Satay kjúklingaspjótin sem ég gerði í gær eru einmitt marineruð úr tilbúinni satay sósu sem ég hressti aðeins upp á. Flljótlegur matur sem er tilvalinn á grillið og virkilega ljúffengur.

Satay kjúklingaspjót (fyrir 3):

2-3 vænar kjúklingabringur
1 krukka satay sósa (Ég nota Blue Dragon satay sósu úr glerkrukku)
1 msk sojasósa
1 hvítlauksrif, smátt saxað eða rifið
Sítróna, skorin í tvennt
1/2 kjúklingateningur
Krydd t.d Pasta Rossa eða Chilli explosion (Ég notaði bæði)

Aðferð: Byrjið á að skera kjúklingabringurnar í litla bita. Ég sker bringuna í tvennt á langveginn og sker hana svo í átta jafna bita. Setjið kjúklingabitana í skál. Hellið helmingnum af satay sósunni yfir kjúklinginn ásamt sojasósunni, hvítlauknum og safanum úr hálfri sítrónu. Blandið þessu vel saman og þræðið upp á teina og kryddið svo. Grillið á vel heitu grilli í 10-15 mínútur og snúið nokkuð oft. Afganginn af satay sósunni hita ég rólega upp í potti ásamt 1 dl af vatni, 1/2 kjúklingatening og safanum úr hálfri sítrónu og ber fram með kjúklingaspjótunum. Ég bar spjótin fram með kúskús og salati ásamt satay sósunni sem ég hitaði upp.

Estragon kjúklingur með mango chutney og dijon sinnepi

maí 29, 2013 by helenagunnarsd 3 Comments

Í dag er stutt færsla og stutt uppskrift í stíl. Þrátt fyrir það er ég alveg ægilega spennt að deila þessari uppskrift með ykkur þar sem þetta er einhver besti kjúklingaréttur sem ég hef lengi smakkað. Svo er hann líka alveg einstaklega fljótlegur. Ætli það taki ekki um fimm mínútur að undirbúa hann og svo dansar hann bara alveg sjálfur í ofninum þar til hann er eldaður í gegn. Dijon sinnep er í miklu uppáhaldi hjá mér og ég hef ósjaldan deilt hér uppskriftum með því þar sem ég nota það talsvert mikið í matargerð. Það koma reyndar oft svona tímabil hjá mér varðandi hvaða hráefni ég nota mest og svei mér þá ef það er ekki bara dijon sinnep tímabil núna. Þetta er eiginlega hálfgert leynivopn þegar kemur að matargerð og oft nóg að nota bara agnarlítið af góðu dijon sinnepi til að breyta miklu. Sósan með þessum rétti er alveg ofboðslega góð og ég mæli alveg með því að jafnvel tvöfalda magnið sem fer í hana, sérstaklega ef þið eruð með hrísgrjón með réttinum. Þið verðið að prófa þessa!

Estragon kjúklingabringur með mango chutney og dijon sinnepi (fyrir 3):

3 kjúklingabringur
3 msk dijon sinnep
3 msk sætt mango chutney
1 msk rauðvínsedik (má sleppa eða nota t.d 1 msk sítrónusafa)
1 tsk þurrkað estragon + aðeins meira til að strá yfir

Aðferð:

Hitið ofn í 170 gráður með blæstri. Leggið kjúklingabringurnar í eldfast mót. Hrærið saman sinnep, mango chutney, rauðvínsedik og estragon, hellið yfir bringurnar og veltið þeim upp úr sósunni. Stráið dálitlu af þurrkuðu estragoni yfir að lokum og bakið í 25 – 30 mínútur. Berið fram t.d með steiktu brokkolíi og hrísgrjónum.

Timían kjúklingur með stökku beikoni og sveppum

maí 4, 2013 by helenagunnarsd 3 Comments

Eftir að hafa haft aðeins of mikið að gera, já eins og ég talaði um síðast og já, ég ætla að tala um það aftur, fannst mér kominn tími til að elda eitthvað almennilegt. Sonur minn er enn einu sinni að hafa áhrif á það hvað er eldað á heimilinu. Hverjum hefði dottið í hug að fjögurra ára barni hefði dottið þessi réttur í hug? Nei allt í lagi, kannski ekki alveg í smáatriðum en engu að síður stakk þetta litla ljós upp á því við úfna móður sína í búðinni seinnipartinn þennan föstudag. ”Mamma eldum bara kjúklingabringur” Og það varð auðvitað úr. Alltaf hægt að gera eitthvað stórkostlega gott og skemmtilegt við það hráefni. Samt alveg merkilegt hvað það var mikill mánudagsfílingur í mér þennan föstudaginn.. sem sennilega er vegna þessara blessuðu kærkomnu frídaga í miðri viku. Skemmtilegur ruglingur á rútínu sem svoleiðis frídagar gefa manni.

Þessir réttur er virkilega bragðmikill og góður. Sveppir og beikon passa alltaf svo vel saman og bragðið af timían og sítrónu smellur alltaf. Klassísk samsetning. Virkilega gaman að bera réttinn fram á fallegu fati með stökku beikoninu stráðu yfir og saxaðri ferskri steinselju.

Timían kjúklingur með beikoni og sveppum (fyrir 4):

4 kjúklingabringur
2 bakkar Flúðasveppir
1 bréf beikon (lítið)
2 dl hvítvín (má sleppa og nota meira kjúklingasoð)
Safi úr 1/2 – 1 sítrónu (fer eftir stærð, ég notaði bara 1/2)
3 dl kjúklingasoð (vatn+kjúklingakraftur)
3 msk rjómi
Salt, pipar og þurrkað eða ferskt timían
Smávegis af ferskri steinselju

Aðferð: Byrjið á að kljúfa kjúklingabringurnar í tvennt eftir endilöngu á þykktina og berjið þær svo með kjöthamri eða botni á potti þannig að þær þynnist aðeins. Kryddið með salti, pipar og timían. Skerið beikonið í litla bita og sveppina í frekar stóra bita. Hitið pönnu við háan hita og steikið beikonið þar til það verður stökkt. Takið það af pönnunni og færið á eldhúspappír. Steikið því næst kjúklinginn þar til hann er nánast alveg fulleldaður. Takið hann þá af pönnunni og geymið á diski. Hækkið hitann, setjið smá smjör eða olíu á pönnuna og steikið sveppina þar til þeir hafa brúnast vel. Kryddið með salti, pipar og timían. Þegar sveppirnir hafa brúnast vel. Hellið þá hvítvíni á pönnuna og leyfið því að sjóða aðeins niður, tekur ca. 1-2 mínútur. Bætið þá kjúklingasoðinu og sítrónusafanum á pönnuna ásamt rjómanum. Leyfið þessu að sjóða aðeins niður og smakkið til með salti og pipar. Leggið því næst kjúklinginn á pönnuna og látið hann hitna í gegn í sveppasósunni. Þegar kjúklingabringurnar eru heitar í gegn raðið þeim þá á fat og hellið sveppasósunni yfir. Stráið því næst stökku beikoninu og steinseljunni yfir og berið fram t.d með einföldu salati.

Grillaðar kryddlegnar kjúklingabringur og litríkt kúskús salat með pikkluðum vorlauk

mars 14, 2013 by helenagunnarsd 4 Comments

Lóan er komin. Hvort hún hafi orðið innligsa hérna í vetur og sé nýlega skriðin undan einhverjum skafli greyið eða hvort hún er nýkomin úr langflugi frá Afríku skiptir ekki öllu. Hún fannst og hún er mætt. Að ég tali nú ekki um blessaða dagsbirtuna sem varir nú langt fram yfir kvöldmatartíma! Hún er líka mætt. Þá er samkvæmt mínum bókum kominn tími til að draga út grillið. Þessi réttur er sannarlega ljúfur og vorlegur eins og vorboðinn ljúfi og bragðið af grilluðum marineruðum kjúklingabringunum og litríku kúskús salatinu smella saman. Pikklaður rauðlaukur er í miklu uppáhaldi hjá mér og ofsalega gott að nota hann út í svona salöt þar sem sterka lauk bragðið dofnar dálítið og laukurinn verður mjög gómsætur. Mæli sannarlega með því að elda þetta á einhverju komandi vorkvöldinu..

Kryddlegnar kjúklingabringur:

3 meðalstórar kjúklingabringur, klofnar í tvennt svo úr verði tvö þunn stykki úr hverri bringu.
4 msk ólífuolía
1 tsk cummin
1 tsk kóríander
1 tsk þurrkað óreganó
1 tsk gróft sjávarsalt
1/2 tsk svartur nýmaðalur pipar
Börkur af ca. hálfri sítrónu
1 tsk hunang

Aðferð: Öllu blandað saman í skál og hellt yfir bringurnar og nuddað vel inn í þær. Látið marinerast við stofuhita í 30 mínútur. Ef kjúklingurinn á að marinerast lengur þarf hann að vera í ísskáp. Grillið kjúklingabringurnar í um það bil 7 mínútur á hvorri hlið. Varist að ofelda þar sem þetta eru frekar þunn stykki.

Á meðan kjúklingabringurnar eru að marinerast er upplagt að búa til kúskús salatið.

Kúskús salat með pikkluðum rauðlauk:

3-4 dl hreint kúskús, kryddað með paprikudufti, cummin, kóríander og sjávarsalti. Ca. 1 tsk af hverju. Kúskúsið svo eldað skv. leiðbeiningum á pakkanum.
1 lítill rauðlaukur skorinn í tvennt og svo í þunnar sneiðar.
3 msk hvítvínsedik eða annað hvítt edik og örlítið salt
8-10 þurrkaðar apríkósur
1 lítill poki furuhnetur, ristaðar
1/2 krukka hreinn fetaostur í vatni
1/2-1 sítróna, safinn kreistur úr (fer eftir stærð, sítrónur eru mjög misjafnar)
1 avocado skorið í teninga
1 mangó skorið í teninga

Aðferð: Byrjið á að undirbúa pikklaða rauðlaukinn. Setjið þunnt skorinn laukinn í skál og hellið edikinu yfir ásamt smá salti. Leyfið þessu að liggja í ca. 30 mínútur og hrærið í lauknum af og til. Hann á að breyta aðeins um lit, verður eiginlega skærbleikur og aðeins mýkri.Kúskúsið er svo undirbúið, kryddað og eldað samkvæmt leiðbeiningum á pakkanum. Þá er að rista furuhneturnar, skera apríkósurnar, avocadoið og mangóið í litla bita og hella vökvanum af fetaostinum. Smakkið kúskúsið til með sítrónusafanum og kannski smá meira salti. Svo er öllu blandað saman og mangóinu og avocadoinu dreift yfir að lokum.Ég bar þetta fram með léttri jógúrtsósu sem passaði mjög vel við þetta. Hrærði saman sýrðan rjóma og ab mjólk til helminga. Kryddaði til með salti, pipar, cummin, orageno og örlitlu hunangi.

Rómverskur kjúklingaréttur með hráskinku

febrúar 5, 2013 by helenagunnarsd Leave a Comment

Ég tek eftir því þegar ég renni gegnum uppskriftirnar hér inni að oftar en ekki innihalda þær tómata, í einhverskonar formi. Þetta fer næstum því að vera vandræðalegt hversu mikið ég nota þá, bæði ferska og eins niðursoðna. En vitið þið ekki hvað tómatar eru hollir? (þetta er samt ekki neitt sérstakt heilsumatarblogg, höfum það alveg á hreinu) Fyrir utan það hvað þeir eru góðir. Eða það finnst mér að minnsta kosti og fjölskyldunni greinilega líka. Ég á alltaf til tómata, það er eitt af því sem ég verð alltaf að eiga. Ég ætla þó að reyna að koma líka einhverntímann inn með uppskriftir sem innihalda ekki tómata.. sjáum hvernig það tekst til.

Þessi uppskrift inniheldur líka tómata. Jú jú, og það eina krukku af góðum niðursoðnum lífrænum tómötum. Það er líka hægt að nota dósatómata í staðin og hefur mér reynst vel að kaupa niðursoðnu Euroshopper tómatana, finnast þeir oftast mjög rauðir og góðir enda koma þeir beint frá Ítalíu og innihalda fremur lítið af aukaefnum eins og sykri og salti. En ef ég er að bruðla vel ég alltaf þessa lífrænu í glerkrukkunum. Þeir eru voða góðir. Kjúklingarétturinn bragðaðist afar vel og var vel af honum látið af öllum fjölskyldumeðlimum. Sósan er bragðmikil og hráskinkan og capersið gefa réttinum einstaklega gott bragð.

Rómverskur kjúklingur (fyrir 4):

4 Kjúklingabringur
1 rauð paprika
1 gul paprika
1 bréf hráskinka (5-6 sneiðar)
2 dl hvítvín (má sleppa og nota vatn í staðin)
1 krukka hakkaðir tómatar, eða 1 dós + 2 dl vatn
1/2 kjúklingateningur
2-3 msk capers
Ólífuolía, salt og pipar og smávegis söxuð steinselja eða basil

Aðferð:

Ofn hitaður í 180 gráður. Byrjið á að kljúfa kjúklingabringurnar í tvennt á þykktina þannig að úr einni bringu verða tvö frekar þunn stykki. Saltið og piprið bringurnar vel og brúnið á vel heitri pönnu á báðum hliðum. Takið bringurnar af og raðið í eldfast mót. Skerið paprikurnar í þunna strimla og hráskinkuna sömuleiðis. Steikið við frekar háan hita þar til skinkan verður stökk. Þá er víninu (eða vatni) hellt yfir og pannan skröpuð með spaða eða sleifinni svo allt losni af botninum. Soðið niður í um 1 mínútu.

Þá er tómötunum hellt yfir og krukkan svo skoluð að innan með ca. 2 dl af vatni og hellt yfir. Kryddað með pipar og kjúklingakraftinum og leyft að sjóða í 2-3 mínútur, passið að setja ekki of mikið salt þar sem skinkan er ansi sölt. Þá er sósunni hellt yfir bringurnar í eldfasta mótinu og capers að lokum stráð yfir. Bakað í 15-20 mínútur eða þar til kjúklingurinn er eldaður í gegn. Stráið svo saxaðri steinselju yfir réttinn og berið fram með nýbökuðu brauði og sítrónubátum. Það væri sennilega líka gott að hafa hrísgrjón með réttinum þar sem sósan er bragðmikil og góð. Mér finnst hins vegar brauð oft passa betur með svona ítölskum sósum.

Kjúklingabringur uppskrift

Footer