Smákökur

Snickers marengstoppar með rjómasúkkulaði, karamellu og salthnetum

desember 1, 2020 by helenagunnarsd Leave a Comment

Ef ykkur finnst snickers gott eiga þessir eftir að hitta beint í mark. Stökkir að utan og mjúkir að innan með rjómasúkkulaði og stökkum salthnetum. Þetta getur ekki klikkað.

Hráefni:

4 eggjahvítur

240 gr púðursykur

100 gr saxaðar salthnetur

200 gr smátt saxað rjómasúkkulaði

2 lítil Daim súkkulaði, smátt söxuð

Ofaná:

100 gr brætt suðusúkkulaði

4 msk smátt saxaðar salthnetur

Aðferð:

Hitið ofn í 140 gráður með blæstri
Þeytið eggjhvítur og púðursykur þar til mjög stífir og glansandi toppar myndast. Mæli með að nota hrærivél og þeyta á mesta hraðanum í 10 mínútur.
Blandið hnetum, súkkulaði og Daim varlega saman við eggjablönduna með sleikju.
Setjið með tveimur teskeiðum á bökunarpappír á plötu og bakið í 20 mínútur.
Kælið kökurnar alveg. Bræðið súkkulaði og dreifið yfir þær ásamt smátt söxuðum salthnetum.

Góð ráð:

Ef þið eigið margar plötur er best að baka á tveimur til þremur hæðum í einu. Eggjahvítudeig getur ekki staðið mjög lengi á borðinu áður en það er bakað án þess að falla.
Ég nota litla ískúluskeið til að setja kökurnar á plötuna. Þá verða þær frekar jafnar að lögun og allar jafn stórar.
Það er best að geyma kökurnar í lokuðu íláti við stofuhita. Þær eru langbestar nýjar en geymast vel í viku og jafnvel lengur en þorna við langa geymslu.

Ef þið bakið megið þið endilega deila með mér afrakstrinum á Instagram: @EldhusperlurHelenu – https://www.instagram.com/eldhusperlurhelenu/

Súkkulaðikossar með Baileyskremi..

nóvember 3, 2019 by helenagunnarsd Leave a Comment

Það er löngu komin á sú hefð að prófa að minnsta kosti eina nýja smákökuuppskrift í aðdraganda aðventu. Þessar dúllur hittu lóðbeint í mark og eru jafn dásamlegar og þær hljóma. Athugið að ef þið vijlið getið þið vel sleppt því að nota Baileys í uppskriftina og notað í staðin rjóma. Það er alls ekki síðra.

150 gr mjúkt smjör
200 gr sykur
2 egg
2 tsk vanilluextract
160 gr hveiti
60 gr kakó
1/2 tsk salt
1/2 tsk matarsódi
3 msk Baileys líkjör (eða rjómi)

Aðferð:

Ofn hitaður í 160 gráður með blæstri, annars 180 gráður. Smjör og sykur þeytt mjög vel saman þar til ljóst og létt. Eggin fara út í og þeytt vel saman.
Hveiti, kakó, salti og matarsóda blandað saman og bætt út í ásamt Baileys eða rjóma og blandað saman í deig og kælt í ísskáp í 10-15 mínútur.
Deigið sett með tveimur teskeiðum á ofnplötu. Úr þessari uppskrift næ ég um það bil 60 kökum og miða við að setja 20 kökur á hverja ofnplötu.
Bakið kökurnar í 7-9 mínútur. Takið út og kælið. Athugið að kökurnar eiga að vera mjúkar en ekki stökkar.

Baileys smjörkrem

150 gr mjúkt smjör
200 gr flórsykur
80 ml Baileys (eða 80 ml rjómi og 1 msk kakó)
1 tsk vanilluextract

Aðferð:

Smjör þeytt mjög vel þar til ljóst og létt.
Flórsykur fer út í og þetta þeytt aftur mjög vel saman. Kremið á að vera létt og loftmikið.
Hellið Baileys og vanillu saman við á meðan þið þeytið, skafið vel hliðarnar og þeytið vel áfram.
Sprautið kreminu á helminginn af kökunum og leggið köku ofan á til að mynda samloku.
Kökurnar geymast vel í lokuðu íláti í ísskáp í nokkra daga en geymast líka mjög vel í frysti.

Endilega fylgið með mér á Instagram: @helenagunnarsd – og taggið mig ef þið prófið Eldhúsperlur í ykkar eldhúsi!

Hollari hafraklattar með banana og hnetusmjöri

september 19, 2014 by helenagunnarsd 5 Comments

Kvöldmaturinn undanfarnarna daga hefur einkennst af réttum sem elda sig helst sjálfir, eru tilbúnir á undir 10 mínútum eða afgangar. Á svona dögum verð ég hálf óróleg og sakna þess svo að hafa ekki tíma til að dunda mér í eldhúsinu á mínum hraða. Þá dett ég stundum í gír seinna um kvöldið, barnið sofnað og allt komið í ró. Ég hef sagt það áður og segi það aftur að eldamennska og bakstur á rólegu nótunum er fyrir mig eins og besta slökun eða íhugun. Ég ákvað svo eitt kvöldið í vikunni þegar ég hafði ekki haft tíma fyrir rólegan kvöldmat lengi að panta mat frá Eldum rétt fyrir næstu viku. Hef aldrei prófað það áður svo ég er voða spennt. Hlakka til að prófa réttina en er líka pínu hrædd um að það verði engin leið til baka.. Þetta verði bara of þægilegt! Sjáum til. Kem með fréttir að tilraunum loknum. En þessar kökur urðu einmitt til í vikunni í rólegri eldhússtund. Þær eru kjörinn morgunmatur eða millibiti og ákaflega bragðgóðar. Áferðin á þeim er svolítið eins og af hráu hafra smákökudeigi.. Veit ekki með ykkur en það hringir allavega bjöllum hjá mér. Við vorum mjög ánægð með þær og líka sá fimm ára sem er næstum alltaf besti mælikvarðinn að mínu mati.

Hollari hafrakökur með banana og hnetusmjöri:

Bollamálið mitt er 2.5 dl

2 og 1/3 bolli haframjöl
1 tsk kanill
1/4 tsk gott sjávarsalt
1/2 bolli möndluflögur eða hakkaðar möndlur (líka hægt að nota hnetur)
1/2 bolli rúsínur (má sleppa)
1 bolli ósætt hnetu- eða möndlusmjör
3 msk hunang
2 msk kókosolía
2 stórir þroskaðir bananar stappaðir
1 tsk vanilluextract

Aðferð: Hitið ofn í 160 gráður með blæstri, annars 180 gráður. Hrærið þurrefnunum saman í skál. Blandið saman hnetusmjöri, hunangi, kókosolíu, bönunum og vanillu og hrærið saman við þurrefnin. Setjið deigið á smjörpappírsklædda plötu með tveimur matskeiðum eða ísskeið. Hver kaka er um 2 msk af deigi. Ýtið aðeins ofan á kökurnar, þær renna ekkert út við bakstur. Bakið í 13-15 mínútur eða þar til þær eru aðeins byrjaðar að brúnast í köntunum. Geymast vel í ísskáp í a.m.k viku.

Hafrakossar

nóvember 26, 2013 by helenagunnarsd 39 Comments

Ó þessir hafrakossar. Þegar Vikan hafði samband við mig og bað mig um að senda inn uppskriftir fyrir matgæðing vikunnar voru þessar dúllur fyrstar að koma upp í hugann. Þetta er svona næstum of gott til að vera satt og getur eiginlega ekki annað en slegið í gegn. Ég fékk hugmyndina að kökunum á síðunni sem bandarísku hjónin Kevin og Amanda halda úti. Þar má oft finna skemmtilegar uppskriftir, fallegar ljósmyndir og hugmyndir að hinu og þessu. Uppskriftirnar á síðunni eiga það hins vegar all flestar sameiginlegt að ekkert er til sparað í smjeri, sykri og öðru fíneríi svo þær flokkast algjörlega undir mat sem fólk ætti ekki að hafa oft á borðum. En maður minn, ef þú vilt gera vel við þig og þína og baka guðdómlegar kökur til að eiga á aðventunni, já þá eru þessar bara málið, ég lofa!

Hafrakossar (Breytt uppskrift frá www.kevinandamanda.com):

250 gr mjúkt smjör við stofuhita
2 dl púðursykur
1 dl sykur
1 egg
2 tsk vanilluexract
3 dl hveiti
1 tsk matarsódi
½ tsk salt
½ tsk kanill
6 dl haframjöl (ath ekki grófir hafrar)

Aðferð:

Hitið ofn í 170 gráður með blæstri. Hrærið saman smjör og sykur þar til létt og ljós. Bætið egginu og vanillu út í og blandið vel saman við.

Hrærið saman hveiti, matarsóda, salti og kanil. Bætið út í smjörblönduna og hrærið létt saman. Bætið höfrunum út í og blandið þar til rétt svo komið saman. Setjið deigið með tveimur teskeiðum á plötu, þrýstið aðeins ofan á hverja köku og bakið í 8-10 mínútur. Kælið á grind.

Krem:

150 gr smjör
250 gr flórsykur
2 msk rjómi
1 tsk vanilluextract

Aðferð: Þeytið allt vel saman og sprautið eða smyrjið á kældar kökurnar og leggið aðra köku ofan á.

Nutella smákökur

nóvember 21, 2013 by helenagunnarsd 1 Comment

Það er alveg með ólíkindum hvað fólk almennt virðist hafa gaman að því að lesa um mat. Ég verð allavega pínulítið feimin þegar ég átta mig á því hversu margir lesa þessa litlu uppskriftasíðu mína sem í byrjun átti aðeins að vera fyrir mig og mína og til að hafa uppskriftirnar allar á einum stað. Mér þykir svo ótrúlega vænt um að þið viljið líta hingað inn og ég tala nú ekki um þegar þið skiljið eftir ykkur spor eða sendið mér línu. Ég hefði aldrei getað ímyndað mér hvað það er gaman að halda úti svona síðu og hvað það gefur mér mikið að geta veitt öðrum innblástur þegar kemur að bakstri og matargerð. Það er svo stutt síðan ég sat hinum megin við borðið, þræddi matarblogg (sem ég geri sannarlega ennþá) og uppskriftasíður og hugsaði um að kannski ætti maður bara að skella saman einu svona bloggi til að koma skikki á uppskriftasafnið.

Í dag, 21. nóvember er heilt ár liðið síðan fyrsta uppskriftin birtist á Eldhúsperlum, gestum hefur jafnt og þétt fjölgað og uppskriftirnar eru orðnar vel á annað hundrað. Undanfarnar vikur hefur heimsóknateljarinn á síðunni hvað eftir annað slegið eigið met og greinilegt að mataráhugi fólks fer ekki dvínandi. í febrúar ákvað ég að stofna Facebook síðu utan um bloggið. Ég setti mér það markmið að ef sú síða myndi ná 1000 ”like-um” fyrir árslok 2013 ætlaði ég halda áfram með hana. Mér fannst einfaldlega eitthvað svo sorgleg tilhugsun að vera með síðu sem næði ekki inn sterkum lesendahópi. Síðan er núna komin yfir 2600 ”like” svo markmiðinu er náð og gott betur. Eins og er get ég ekki hugsað mér að hætta að skrifa um mat eða að bæta nýjum færslum inn á Eldhúsperlur, þetta er svo gaman! Við ykkur langar mig einfaldlega að segja TAKK. Takk fyrir að lesa og takk fyrir að vera svona skemmtileg. Ég hlakka mikið til næsta Eldhúsperluárs með nýjum uppskriftum og tryggum lesendum.

Í tilefni dagsins læt ég hér fylgja með einhverja einföldustu en bestu smákökuuppskrift sem ég hef prófað. Uppskriftin birtist í Vikunni fyrr í mánuðinum svo það er kominn tími til að hún birtist hér. Ég mæli með að þið prófið þessar og vona að þið njótið vel!

Nutella smákökur með sjávarsalti:

200 gr nutella
2 msk hrásykur
1 egg
1 tsk vanilluextract
1 tsk instant kaffiduft (ég mala það í morteli)
1,5 dl fínmalað spelt eða hveiti
1 dl (eða meira) dökkir eða ljósir súkkulaðidropar eða saxað súkkulaði
Gott sjávarsalt í flögum t.d Maldon eða Saltverk

Aðferð: Hitið ofn í 170 gráður með blæstri, annars 180. Hrærið nutella, egg, vanillu, sykur og kaffiduft saman með sleif þannig að það blandist vel saman. Bætið hveitinu út í ásamt súkkulaðidropunum og hrærið þar til það hefur rétt svo samlagast deiginu. Kælið í 15-30 mínútur. Setjið deigið með tveimur teskeiðum á bökunarplötu, stráið örlitlu sjávarsalti ofan á hverja köku og bakið í 7-9 mínútur. Mér finnst betra að baka þær aðeins of lítið og leyfa þeim svo að kólna. Þá verða þær mjúkar í miðjunni og dásamlegar. Athugið að kökurnar eiga að vera mjúkar í miðjunni. Kælið á grind.

Svívirðilegar súkkulaðibitakökur

september 25, 2013 by helenagunnarsd 16 Comments

Á dögunum blés Nói Siríus til uppskriftasamkeppni. Þar auglýstu þeir eftir uppskriftum sem hægt væri að birta í uppskriftabæklingi sem þeir gefa út fyrir hver jól. Ég var ekki lengi að hugsa mig um þegar ég mundi eftir uppskrift að alveg einstaklega (og þá meina ég einstaklega) góðum súkkulaðibitakökum sem ég bakaði fyrir síðustu jól. Í alvöru krakkar, þá er þetta með þeim bestu smákökum sem ég hef bakað og þær eru ólíkar öllum súkkulaðibitakökum sem ég hef smakkað. Nýbakaðar minna þær dálítið á pínulitlar franskar súkkulaðikökur eða brownies. Þær eru stökkar að utan og mjúkar inn í og haldast þannig í nokkra daga séu þær geymdar í lokuðu íláti. Það er mikið súkkulaði í þeim og uppskriftin og aðferðin er einföld, byrjar og endar á súkkulaði svo útkoman er dásamleg. Nói Siríus var allavega sammála mér og ég var svo heppin, ásamt þremur öðrum að hljóta í verðlaun fyrir uppskriftina, veglega gjafakörfu fulla af góðgæti og bökunarvörum frá Nóa Siríus. Uppskriftin mun þó ekki birtast í bökunarbæklingnum fyrir jólin en það var girnileg súkkulaðikaka með Pipp bananakremi frá Eldhússögum sem hlaut þann heiður. Það er því þeim mun meiri þörf á að birta uppskriftina að súkkulaðibitakökunum hér 🙂Aldeilis ekki ónýtt að fá svona fínerí og ég er ansi hrædd um að jólabaksturinn eigi eftir að innihalda ýmislegt úr þessari girnilegu körfu. En hér kemur uppskriftin. Endilega prófið og njótið, alveg voða vel.

Svívirðilegar súkkulaðibitakökur (ca. 20 kökur):

200 gr 56% súkkulaði
50 gr ósaltað smjör
80 gr hveiti
1/2 tsk lyftiduft
1/2 tsk salt
2 egg
150 gr ljós púðursykur
1 tsk vanilluextract
300 gr suðusúkkulaði

Aðferð: Hitið ofn í 160 gráður með blæstri annars 180. Byrjið á að bræða 56% súkkulaði og smjör í potti yfir vægum hita. Takið af hitanum og leyfið að kólna/ná stofuhita. Blandið saman hveiti, lyftidufti og salti og setjið til hliðar. Setjið 300 gr af suðusúkkulaði í plastpoka og berjið með hamri eða kökukefni svo súkkulaðið brotni í grófa misstóra mola, það má líka saxa súkkulaðið gróft með hnífi.

Þeytið eggin og púðursykurinn ásamt vanillu vel og lengi saman þar til ljóst og létt. Hellið brædda súkkulaðinu rólega út í eggjablönduna og hrærið varlega saman við. Setjið því næst hveitiblönduna út í og blandið varlega saman við, ekki þeyta á þessum tímapunkti, bara rétt hræra saman. Hellið súkkulaðibrotunum út í og blandið saman við með sleikju. Setjið eina vel fulla matskeið af deiginu á bökunarpappírsklædda plötu og hafið gott bil á milli. Athugið að deigið er dálítið blautt. Stingið tveimur til þremur súkkulaðimolum ofan á hverja köku. Bakið í 12-14 mínútur og leyfið kökunum að kólna á grind. Athugið að kökurnar eiga að vera blautar í miðjunni svo alls ekki baka þær of lengi.

Myntu smákökur með bismark og hvítu súkkulaði

desember 21, 2012 by helenagunnarsd Leave a Comment

Eru annars ekki að koma jól?? 🙂 Ég verð nú eiginlega að skella hérna inn einni smákökuuppskrift sem ég rakst á um daginn og varð að prófa, enda mynta og súkkulaði heilög jólatvenna í mínum bókum. Útkoman varð alveg hreint ljómandi góð og ef þið ætlið að baka eina aukasort um helgina, eða bara eina sort í það heila mæli ég eindregið með þessari. Þær eru svakalega jólalegar og góðar.

Jólasmákökur með myntu og hvítu súkkulaði (Breytt uppskrift af marthastewart.com):

225 gr smjör
1,5 bolli sykur eða hrásykur
1/2 tsk piparmyntu extract (fæst t.d í Kosti, líka hægt að sleppa og nota bara vanillu extract)
1 stórt egg
2 1/2 bolli hveiti eða fínt spelt
2 tsk vínsteinslyftiduft, eða venjulegt lyftiduft.
1 bolli litlir dökkir súkkulaðidropar

(Ég nota ameríska bollastærð sem er 2.4 dl)

Aðferð:

Ofninn hitaður í 180 gráður með blæstri, 190 gráður án blásturs. Smjör, sykur og piparmyntu extract þeytt þar til létt og ljóst, egginu bætt út í og hrært vel. Hveitinu og lyftiduftinu bætt út, hrært létt saman og síðast er súkkulaðidropunum hrært saman við. Ég sett deigið svo á plastfilmu rúllaði því upp í lengju og geymdi í ísskáp í þrjá sólahringa. Það var nú bara af því ég hafði ekki tíma til að baka þær strax. Það er í góðu lagi baka úr því strax og það er tilbúið!

Svo skar ég deigrúlluna í sneiðar og rúllaði kúlur úr deiginu. Setti þær á plötu með góðu millibili og þrýsti aðeins ofan á hverja kúlu með fingrunum. Þetta bakaði ég í 9 mínútur.

Eða þangað til að kökurnar litu svona út. Þá lét ég þær kólna alveg og útbjó það sem átti að fara ofan á þær.

Ofan á:

200 gr. Hvítt súkkulaði, brætt yfir vatnsbaði eða í örbylgjuofni.
1/2 poki Bismark brjóstsykur, mulinn.

Ég notaði hvíta súkkulaðidropa sem ég fékk í Kosti og bræddi þá yfir vatnsbaði.

Muldi Bismark brjóstsykurinn.

Svo setti ég um það bil 2 tsk af hvíta súkkulaðinu á hverja köku og stráði svo smá muldum brjóstykri yfir. Ég gerð þetta ekki við allar kökurnar, sumar hafði ég bara svona allsberar og þær voru líka mjög góðar þannig.

Þetta er auðvitað bara algjört nammi ! Verði ykkur að góðu 🙂

Smákökur

Footer