Nú nálgast óðfluga sá tími að kona býr ekki lengur við þann lúxus að geta myndað kvöldmatinn í dagsbirtu. Ef ég á að segja alveg eins og er, þá hlakka ég ekkert voðalega mikið til þess tíma. Þeir sem hafa myndað mat, vita að dagsbirta er besti vinur fallegra matarmynda. Og þegar maður er ekki áhuga- eða atvinnu ljósmyndari, á tiltölulega einfalda myndavél, kann næstum ekkert í ljósmyndun og á ekki ljósmyndastúdíó, eru félagarnir myrkur og flass ekki bestu vinir manns. Maður einfaldlega tekur ekki myndir af mat með flassi, það er agalegt! Annað hvort þarf ég að fara að elda matinn í hádeginu, finna eitthvað út úr þessu birtuveseni eða einfaldlega taka myndir af matnum undir ljósunum í eldhúsinu hjá mér og vona það besta. Ég hugsa að þið fáið að sjá sitt lítið af hverju á komandi vetri. Ef þið lumið á einhverjum góðum ráðum varðandi þetta lúxusvandamál mitt, þigg ég þau með þökkum.
En þá að uppskrift dagsins. Það má með sanni segja að þessi kjúklingaréttur sé af sparilegri gerðinni. Rjómaostur og sýrður rjómi spilar lykilhutverk í sósunni sem er einstaklega bragðgóð með sætu og mildu chilli og púrrulauksbragði. Rétturinn er til dæmis alveg kjörinn lágkolvetnaréttur, borinn fram með fersku grænu salati eða blómkálsgrjónum. Sweet chilli sósuna er hægt að fá sykurlausa t.d í Krónunni og sennilega víðar. Annars mæli ég nú alveg heilshugar með þessum einfalda og ljúffenga kjúklingarétti fyrir alla og hvet ykkur, kæru vinir til að prófa, þetta er sannkallaður veislumatur.
Freistandi kjúklingur í púrrulauks og sweet chili rjómasósu (fyrir 5):
- 5 kjúklingabringur, skornar í teninga (gúllas stærð)
- 1 púrrulaukur, smátt skorinn
- 2 dósir sýrður rjómi
- 1 lítil dós rjómaostur (125 gr)
- 1 teningur kjúklingakraftur
- 2 hvítlauksrif, smátt söxuð eða rifin
- 4-5 msk sweet chilli sósa (eftir smekk)
- 1 dl rifinn ostur
- Salt og pipar
Aðferð: Hitið ofn í 200 gráður með blæstri. Hitið pönnu með smá smjöri eða olíu, saltið og piprið kjúklingabitana og brúnið þá vel eða þar til þeir eru nánast fulleldaðir. Setjið kjúklinginn í eldfast mót. Lækkið hitann á pönnunni, setjið smá olíu eða smjör á pönnuna og steikið púrrulaukinn þar til hann mýkist aðeins, ca. 3 mínútur.
Setjið rjómaostinn, sýrða rjómann, kjúklingatening, hvítlauk og sweet chilli sósuna út á og leyfið að malla aðeins, smakkið til með sweet chilli sósunni. Bætið örlitlu vatni saman við sósuna ef ykkur finnst hún of þykk. Stráið rifna ostinum yfir kjúklingabitana og hellið sósunni því næst yfir. Bakið í ofni við 200 gráður í 15 mínútur eða þar til kraumar í sósunni og hún hefur tekið lit. Berið fram með góðu grænu salati og grjónum.
spennandi að prófa þennan rétt
var með þennann í kvöld algjört æði vorum 6 í mat og allir mjög ánægðirn
Frábært Nína. Gaman að vita það, takk fyrir kveðjuna! 🙂
Kær kveðja, Helena
sæl
til að byrja með vil ég þakka þér fyrir að halda út þessari síðu, ég kíki hérna inn reglulega og hef prufað ýmislegt, allt jafn gott og vel heppnað 🙂
en, að þessari uppskrift (sem mig langar til að prufa sem fyrst), ég bý erlendis og hér er sýrði rjóminn seldur í 500 gr. dósum (þar um bil, minnir mig), gætirðu gefið upp ca. grömm af því sem þú notaðir í þennan rétt þar sem að sýrði rjóminn á Íslandi er jú seldur í litlum dollum.
takk takk
Sæl Kæra Ólöf og takk fyrir kveðjuna!
Dósirnar sem ég notaði eru 180 grömm, ég notaði tvær svoleiðis svo samtals notaði ég 360 grömm af sýrðum rjóma, og hann var 18% feitur 🙂
Gangi þér vel.
Kær kveðja, Helena
Bara yndislegar uppskriftir fá þér og takk hver öðru betri.
Takk fyrir kveðjuna kæra Erla!
Alltaf svo gaman að frétta hvernig fólki líkar það sem ég er að setja hingað inn. Njóttu bara vel.
Kær kveðja, Helena
Hljómar hrikalega vel! Langar að prófa en ég get hins vegar ekki notað rjómaostinn, mælirðu með einhverju öðru í staðinn sem heitir ekki ostur…..matreiðslurjóma kannski?
Kær kveðja,
Berglind
Sæl Berglind.
Þú gætir vel sleppt rjómaostinum og notað t.d matreiðslurjóma eða kaffirjóma í staðin eða notað eingöngu sýrðan rjóma. Ég hugsa meira að segja að sósan verði ekki síðri fyrir vikið. Hún þykknar vissulega dálítið við að nota rjómaostinn en verður alveg nógu þykk af sýrða rjómanum. Gangi þér vel 🙂
Kær kveðja, Helena
ég fór í krónuna og ætlaði að kaupa þessa sykurlausu sweet chilli sósu og þar kannaðist ekki neinn við þetta. Hvaða vörumerki er þessi sósa?
Sæl Steina – Ég man ekki hvað vörumerkið heitir og á því miður ekki lengur flöskuna. Ég keypti sósuna í Krónunni Vallakór og henni var stillt upp við hliðina á hinum sweet chilli sósunum. Ég athuga þetta næst þegar ég fer í Krónuna og læt þig vita 🙂
Kær kveðja, Helena
Mög góður réttur mæli með honum 😀
takk fyrir það
Mjög góður kjúkklingaréttur. Frábær síða hjá þér ..og mikið notuð á mínu heimili. Takk..takk..
Takk kærlega fyrir uppskriftina, hún er frábær og verður örugglega elduð oftar.
Hvernig myndi uppskriftin verða fyrir 2 ?
Sæl Sigrún
Ég myndi bara minnka uppskriftina um helming – Gera 2-3 bringur og helmingi minna af öllu hinu 🙂
Gangi þér vel.
Kær kveðja, Helena
Í sambandi við myndatökuna, þá gætiru prófað að strekkja álpappír á pappaspald og endurvarpa ljósinu á matinn ásamt að nota loftljósið. Spurnign hvort að það dugi til að lýsa upp matinn. Og ég á svoooo
eftir að prófa þennan rétt enda kjúklingur það vinsælasta á mínu heimili 🙂
Takk fyrir góð ráð – prófa þetta í vetur þegar myrkrið skellur á..dagsbirtan er þó alltaf með vinninginn 🙂 En ég mæli alveg innilega með kjúllanum, hann vekur vonandi lukku!
Kær kveðja, Helena
Þetta er æðislegur réttur. Við prófuðum að setja salsasósu líka saman við sósuna og það heppnaðist mjög vel. Takk fyrir okkur.
Var með kjúllaréttinn þinn í kvöld og kallinn og ég mjög ánægð,nammi nammi 😊
Var með kjúllaréttinn þinn í kvöld ,kallinn og ég mjög ánægð,nammi nammi 😊 mjög svo gott Helena.Takk fyrir okkur.
Sæl eg hef oft haft þennan rett og fynst hann æði
eg ætla að bjóða fólki í mat og hafa hann um helgina 🙂
en það er ekki hægt að fá púrrulauksúpuna lengur
veist þú hvað eg get haft í staðinn
takk kærlega fyrir okkur
Besti og einfaldasti kjúllarétturinn þarna úti! Elska hann, er búin að gera hann 1000 sinnum og bregst aldrei! Takk Takk Takk!