Archives for október 2013

Flottustu bloggin og nýjasta dótið

október 30, 2013 by helenagunnarsd Leave a Comment

Finnst ykkur ekki gaman að skoða matarblogg? Það hlýtur bara að vera! Ég hef allavega afskaplega gaman að því og einhverra hluta vegna eruð þið að lesa þessi skrif svo við hljótum að eiga eitthvað sameiginlegt. Það er alveg ótrúleg gróska í matarbloggandi skrifum bæði hér á landi sem og annars staðar og hægt væri að eyða mörgum klukkustundum á dag við lestur frábærra matarblogga. Tímaritið Saveur hefur undanfarin ár tilnefnt og verðlaunað flottustu matartengdu bloggin úti í hinum stóra heimi. Það er virkilega gaman að renna yfir listann hjá þeim og skoða gullfalleg og skemmtilegt matarblogg sem sannarlega veita manni innblástur í eldamennskunni. Ýtið á myndina hér fyrir neðan til að fara á síðuna.Annars mæli ég líka eindregið með tímaritinu Saveur sem er eitt af flottustu matreiðslutímaritunum að mínu mati, ég fjárfesti yfirleitt í eintaki komist ég í tæri við það en hef reyndar ekki séð það til sölu hér á landi. Hægt er að gerast áskrifandi að tímaritinu sjálfu eða fá sér áskrift á ipad sem er ansi skemmtilegur kostur.

En að öðru. Ég hef ákveðið að innleiða nýjan lið hérna inn á síðuna mína og kynna fyrir ykkur nýjasta eldhúsdótið mitt. Ég hef ákaflega gaman að því að bæta við mig nýjungum til að nota við eldhúsverkin og á það til (oft) að reka nefið inn í húsbúnaðarverslanir þegar ég er í útlöndum en líka hér á landi. Að þessu sinni langar mig að segja ykkur frá flottu fyrirtæki sem heitir Bambu. Ég kynntist vörunum frá fyrirtækinu í versluninni Duka í Kringlunni, það getur vel verið að vörurnar fáist á fleiri stöðum og svo fást þær auðvitað líka í netverslunum. Fyrirtækið sérhæfir sig í áhöldum sem eru búin til úr bambus og eru allar vörur fyrirtækisins unnar á afar umhverfisvænan hátt. Áhöldin eru einstaklega falleg í laginu, notadrjúg og á góðu verði. Á sama tíma styrkir maður umhverfisvænt fyrirtæki sem þarf ekki að höggva niður skóga fyrir framleiðslu sína heldur notar bambus sem vex hratt og endurnýjar sig því fljótt. Bambusinn býr yfir þeim eiginleika að vera afar léttur en harður viður. Áhöldin litast því minna af mat heldur en t.d viðaráhöld. Ég fjárfesti í svona sleif sem ég er afar hrifin af. Svo fékk ég mér líka töng sem lofa góðu, er þægileg í notkun og ansi fjölnota. Mæli með því að þið kynnið ykkur þessar vörur og kíkið á fallegu verðlauna matarbloggin! 🙂

Músin sem sló í gegn

október 28, 2013 by helenagunnarsd 9 Comments

Fyrir fimm árum síðan (ég trúi því samt ekki að það sé svona langt síðan) fór ég, nýbökuð móðir, á námskeiðið Hvað á ég að gefa barninu mínu að borða, hjá henni Ebbu Guðnýju. Námskeiðið var frábært og ennþá í dag er ég nýta mér góð ráð sem hún Ebba kenndi okkur á námskeiðinu. Ég er allavega ekki hissa á að námskeiðið gangi enn og bækurnar hennar rokseljist. Hún kenndi mér á einni kvöldstund meira um næringu ungbarna og mataræði almennt en ég hafði nokkurn tímann náð að lesa um í bókum sem ég hafði þó gert þó nokkuð af á meðgöngunni. Að ég tali nú ekki um öll frábæru og sniðugu ráðin sem hún gaf námskeiðsgestum um hitt og þetta. Ég mæli heilshugar með því að þið skellið ykkur á námskeið hjá henni ef þið sjáið það auglýst og eiginlega hvort sem þið eigið ungt barn eða ekki. Góðu ráðin og uppskriftirnar nýtast öllum á heimilinu. En jæja, á þessu umrædda námskeiði gaf Ebba okkur ýmislegt gómsætt að smakka og þar á meðal var dásamleg súkkulaðimús. Hún sagði okkur ekki hvað var í henni fyrr en eftir smakkið og ég ætlaði ekki að trúa því að súkkulaðimús samsett úr lárperu og banana ásamt örfáum öðrum hráefnum gæti smakkast svona guðdómlega vel. En hún gerði það svo sannarlega og hefur verið hér á borðum ótal sinnum eftir þetta og er alltaf jafn yndislega góð. Ég er því miður búin að týna upprunalegu uppskriftinni frá Ebbu svo músin mín hefur aðeins breyst og þróast. Svona geri ég hana oftast og hvet ykkur eindregið til að prófa!

Súkkulaðimús (fyrir 3-4):

4 litlar lárperur eða 2 stórar (ég nota þessar í græna netinu)
2 þroskaðir bananar
4 msk fljótandi kókosolía
4 msk gott kakó
4 msk hunang, hlynsíróp eða önnur sæta (má vera minna, smakkið ykkur áfram)
1/2 tsk hreint vanillu extract
1/4 tsk sjávarsalt

Aðferð: Lárperur og bananar afhýtt. Allt sett í blandara eða matvinnsluvél og unnið vel saman þar til silkimjúkt og slétt. Mér finnst betra að nota matvinnsluvél en blandara en ef þið notið blandara gæti þurft að setja örlítið vatn eða mjólk til að vélin nái að hræra allt vel saman. Setjið í skálar og kælið í 1 klst. Berið fram með þeyttum rjóma, rifnu 70% súkkulaði og gjarnan ferskum berjum.

Kjúklinga taco salat

október 24, 2013 by helenagunnarsd 1 Comment

Ég ætlaði svo innilega að ná að gera þetta salat tilbúið áður en myrkrið skall á í kvöld. Á öðru hundraðinu lenti Bónuspokinn á eldhúsborðinu, kveikt á barnaefninu á RÚV, pönnu skellt á eldavélina, kveikt undir, kápunni hent á stól og vörurnar eiginlega rifnar upp úr innkaupapokanum. Kjúklingabringur klofnar í tvennt, kryddaðar og dúndrað á sjóðandi heita pönnuna á meðan var restin af hráefnunum í salatið týnd til. Jú ég var enn dálítið vongóð. Birtan á pallinum alveg sæmileg og ég myndi sennilega ná þessu. Byrjaði að skola grænmeti, skera niður, náði í stóran disk og hálfpartin forðaðist að horfa á myrkrið hægt og rólega síga yfir eldhúsgluggann. Opnaði ostinn, reyndi að ná ostinum úr án þess að rífa pokana, það gekk ekki vel. Þeir sem þekkja mig geta ef til vill reynt að sjá fyrir sér pirringinn þegar ég í mikilli bræði stappaði niður fótunum yfir ostinum pikkföstum í !#%# pokunum. Það gæti skemmt einhverjum.

Jæja osturinn kominn á brettið, rifjárnið rifið upp og í millitíðinni hugað að kjúklingabringunum á pönnunni. Þetta var allt að smella. Bara eftir að setja salatið saman og búa til chillidressingu. Tíminn hefur sennilega liðið hraðar en ég gerði mér grein fyrir því á þessum tímapunkti voru táknmálsfréttirnar teknar við af barnaefninu og hið óhjákvæmilega hafði gerst. Það var komið svo mikið myrkur að ég sá ekki einu sinni köttinn sem mjálmaði á pallinum. Það mátti reyna en ég hefði sennilega aldrei náð þessu. Kannski næst. Ég skipti því yfir í lægri gír og kláraði salatið í ögn hægari takti sem ég kann svo mikið betur við í eldhúsinu og það færðist ró yfir heimilið. Salatið var myndað undir eldhúsljósunum. Útkoman bragðlega séð var alveg dásamleg svo ljósin skiptu minna máli. Samsetningin snarvirkaði.. gott salat er bara svo gott!

Kjúklinga taco salat (fyrir 3):

2 kjúklingabringur
Gott bragðmikið krydd, t.d Chilli explosion og kjúklingakrydd
1 höfuð lambhagasalat
3 vænir eldrauðir tómatar
1 – 2 lárperur
1/2 rauðlaukur
1 gul paprika
Ferskt kóríander eftir smekk
2-3 dl rifinn góður ostur, ég notaði Maríbó og Óðalsost
Nokkrar nachosflögur muldar yfir. Ég notaði Blue corn chips sem ég fann í Bónus og gefa skemmtilegan lit.
1 límóna

Chillidressing:

1 msk majónes
1 dl ab mjólk eða hrein jógúrt
3 – 4 tsk chillimauk t.d Sambal Oelek, Sriracha sósa eða bæði
1 tsk hunang
2 tsk hvítvínsedik
Safi úr 1/2 límónu
Salt eftir smekk
Þynnt með smá vatni ca. 1-2 msk

Aðferð: Byrjið á að skera kjúklingabringurnar í tvennt á þykktina. Kryddið vel báðum megin og steikið þar til eldaðar í gegn. Takið þá af pönnunni og skerið í strimla. Skerið salatið niður og setjið á fat eða stóran disk. Skerið tómata, papriku, lárperu og lauk niður og stráið yfir ásamt helmingnum af rifna ostinum. Setjið kjúklingastrimlana ofan á. Stráið restinni af ostinum yfir ásamt nachosflögum og kóríander. Hellið smá chillidressingu yfir. Berið fram með chillidressingunni og límónubátum.

Uppáhalds fiskréttur fjölskyldunnar

október 23, 2013 by helenagunnarsd 6 Comments

Mikið hef ég hlakkað til að deila þessari uppskrift með ykkur. Mamma á allan heiðurinn af þessum sívinsæla, stórgóða og ofur fljótlega fiskrétti sem er á borðum hjá okkur í fjölskyldunni að minnsta kosti einu sinni í viku. Innan fjölskyldunnar gengur rétturinn undir því skemmtilega nafni ríkisfiskur og hefur hann verið eldaður óteljandi oft á síðustu árum í hinum ýmsu útgáfum. Mamma var samt búin að biðja mig um að kalla þetta ekki ríkisfisk, hæ mamma mín :).. Allavega, tilurð réttarins má að miklu leyti rekja til grillgleði pabba sem helst vill grilla á hverjum degi. Það er samt tiltölulega erfitt að grilla ýsu nema með smá tilfæringum og eftir smá hugmyndavinnu í eldhúsinu þróaði mamma þennan rétt sem samtvinnar bráðhollan fiskrétt sem er fullur af grænmeti og gerir grillglaðan pabba ánægðan.

Þið verðið að prófa þennan rétt, ef þið viljið ekki grilla hann er vel hægt að stinga honum inn í vel heitan ofn eða undir grillið í ofninum. Það er samt alveg hægt að grilla réttinn í hvaða veðri sem er þar sem maður þarf ekkert að standa við grillið og snúa og vesenast eitthvað. Ég lofa því að það er alveg þess virði að hafa dregið fram grillið þegar maður finnur ljúft grillbragðið af réttinum.

Ríkisfiskur (Fyrir 2-3):

Ég hvet ykkur til að prófa ykkur áfram með grænmeti, uppskriftin sem ég gef hér er grunnur og um að gera að leika sér. Það er líka gott að nota t.d paprikusneiðar, chilli, engifer, fennel og svo mætti lengi telja.

600 grömm ýsuflök, roðlaus og beinlaus
2 laukar, skornir í sneiðar
1 sítróna
3-4 vænar lúkur ferskt spínat
1 askja piccolo eða kirsuberjatómatar
1 lítil krukka fetaostur með kryddolíu
Sítrónupipar
Ólífuolía
1/2 dl vatn
Spírur til skrauts

Aðferð: Leggið ýsuflökin á olíuborinn stálbakka, álbakka eða þykkan ”heavy duty” álpappír sem þolir grillun. Ef þið notið álpappír, brjótið þá upp á kantana og búið til einskonar bakka. Kryddið flökin vel með sítrónupipar báðu megin. Skerið sítrónuna í sneiðar og leggið yfir flökin.Dreifið lauknum svo yfir, því næst spínatinu ásamt tómötunum og hellið fetaostinum ásamt mest allri olíunni úr krukkunni yfir.Kryddið yfir allt með sítrónupipar og hellið 1/2 dl af vatni yfir. Grillið á sjóðandi heitu grilli í 10-15 mínútur eða bakið í ofni við 220 gráður þar til tómatarnir eru heitir í gegn, fiskurinn eldaður og osturinn aðeins farinn að bráðna. Dreifið spírum yfir og berið fram strax. Ég mæli sérstaklega með þessum spírum frá Ecospíra. Það er hægt að gerast áskrifandi og fá sendan vikulega pakka fullan af ferskum og gómsætum spírum.

Ítalskar parmesan kjötbollur í tómatsósu

október 20, 2013 by helenagunnarsd 3 Comments

Það var ekki mikið spjallað við matarborðið um kvöldið þegar þessi réttur var á borðum. Sem annað hvort er vísbending um að við séum svona leiðinleg eða að maturinn hafi verið það góður að það mátti enginn vera að því að tala. Ég vona allavega að það hafi verið það síðarnefnda og grunar það sterklega miðað við hljóðin sem fjölskyldumeðlimir gáfu frá sér við matarborðið. Gunnar átti hugmyndina að matnum og aðstoðaði af áhuga við kjötbollugerðina. Útkoman var einhverjar bestu ítölsku kjötbollur og sósa sem við höfum smakkað.

Ég er búin að vera að prófa mig aðeins áfram með kjötbollur og er svona eiginlega komin á að lykillinn að mjúkum kjötbollum er að bleyta brauðmylsnu eða góðan brauðrasp í mjólk áður en því er svo blandað saman við kjötið. Þetta gerir algjörlega gæfumuninn! Svo mæli ég líka með því að þið sleppið því að steikja bollurnar áður en þær eru settar út í sósuna, mér þykir mikið betra að láta þær detta beint út í sjóðandi sósuna og leyfa þeim að malla þar í rólegheitum. Þá verða þær jafnvel enn safaríkari og mýkri og sósan og bollurnar eiginlega fullkomna hvort annað. Þið verðið að prófa.

Ítalskar kjötbollur

2.5 dl brauðmylsna (ég notaði Panko í þetta skiptið)
1.5 dl mjólk
600 gr hreint ungnautahakk
75 gr rifinn parmesan
1 msk þurrkuð steinselja
2 msk smátt söxuð fersk steinselja
2 pressuð hvítlauksrif
2 tsk sjávarsalt
1 tsk svartur nýmalaður pipar
1 egg

Aðferð: Mjólkinni hellt yfir brauðmolanna og látið standa í 5 mínútur. Öllu blandað vel saman, ég set allt í hrærivél og blanda þannig saman. Litlar bollur mótaðar úr hakkinu og geymdar í kæli á meðan sósan er gerð.

Sósa

3 msk ólífuolía
1 smátt saxaður rauðlaukur
2 pressuð hvítlauksrif
1/2 tsk sjávarsalt og smá nýmalaður pipar
500 ml tómata passata eða maukaðir tómatar
1 dl vatn
3 msk tómatpúrra
2 tsk hunang eða önnur sæta
2 greinar ferskt timían eða 1 tsk þurrkað
1.5 dl þurrt hvítvín eða rauðvín
1 dl rjómi
Góð lúka ferskt basil, gróft saxað

Aðferð: Olía hituð í potti við meðalhita. Laukur og hvítlaukur steikt þar til mýkist, kryddað með salti og pipar. Tómatmauki, vatni, tómatpúrru, hunangi, hvítvíni, timíani og rjóma bætt út í og suðunni hleypt upp. Leyft að malla í 5 mínútur og smakkað til með salti og pipar. Athugið þó að bollurnar eru bragðmiklar og munu gefa frá sér bragð þegar þær koma út í sósuna. Kjötbollur settar útí ásamt basil og leyft að malla við vægan hita með lokið að hálfu yfir, þannig að gufi upp af sósunni og hún þykkni aðeins í u.þ.b 20 mínútur. Borið fram með spaghetti eða tagliatelle og nýrifnum parmesan osti.

Vanillu bollakökur með sjóbláu sjóræningja- vanillukremi

október 14, 2013 by helenagunnarsd Leave a Comment

Mikið er nú langt síðan ég hef gefið mér tíma til að setjast við tölvuna og skella inn uppskrift. Þær reyndar bíða nú nokkrar birtingar en vegna anna hefur ekki gefist tími til að setja þær inn. Við fórum til Dublin um helgina og eyddum þar fjórum ljúfum dögum. Ráfuðum um götur, versluðum smá og borðuðum góðan mat. Ég hef lagt það í vana minn að kíkja á tripadvisor.com áður en við förum og frí og velja þar góða staði til að skoða sem og spennandi veitingastaði og kaffihús. Mæli sannarlega með því, það er fátt eins leiðinlegt eins og að fara inn á lélegan veitingastað og borga stórfé fyrir vondan eða óspennandi mat. Við urðum allavega aldrei fyrir vonbrigðum með staðina sem urðu fyrir valinu og fengum alveg stórgóðan mat!

En að uppskrift dagsins. Þessar bollakökur voru á óskalistanum fyrir fimm ára afmæli hér á heimilinu í síðustu viku. Kökurnar eru virkilega mjúkar og bragðgóðar með góðu vanillubragði, vanillu smjörkremið setur auðvitað alveg punktið yfir i-ið. Það er fátt jafn mikið við hæfi eins og að skoða bollakökuuppskrift á mánudögum og láta sig aðeins dreyma..

Vanillubollakökur (24 stk, auðveldlega hægt að helminga):

225 gr smjör við stofuhita
250 gr hrásykur
1 msk hreint vanilluextract
4 egg
350 gr fínmalað spelt eða hveiti
1 msk vínsteinslyftiduft
1/4 tsk salt
2,5 dl nýmjólk

Smjörkrem:

300 gr mjúkt smjör
400 gr flórsykur
2 tsk vanilluextract
2-3 msk mjólk
Nokkrir dropar blár og grænn matarlitur eða sá litur sem þið viljið, líka hægt að hafa kremið hvítt.

Athugið að ef öll hráefni í kökurnar eru við stofuhita verður útkoman enn betri. Ég mæli með að taka smjörið, eggin og mjólkina úr ísskáp a.m.k 2 klst áður en bakstur hefst. Ef ekki gefst tími og smjörið er mjög hart getur verið gott að skera það í sneiðar og leggja á disk, þá mýkist það fyrr.

Aðferð: Hitið ofn í 170 gráður með blæstri. Þeytið smjör, sykur og vanillu í 3-5 mínútur eða þar til blandan er vel ljós og létt. Bætið eggjunum út í einu í einu og hrærið vel á milli. Blandið saman hveitinu, salti og lyftidufti og pískið vel saman eða sigtið. Bætið hveitinu og mjólkinni saman við deigið til skiptis, endið á hveitinu og blandið vel saman þannig að deigið sé silkimjúkt, en varist þó að hræra of lengi. Skiptið deiginu í bollakökuform og bakið í ca. 18 mínútur. Varist að ofbaka, fylgist með kökunum eftir um 16 mínútur og athugið hvort þær séu tilbúnar með því að stinga tannstöngli í miðja köku. Ef hann er blautur bakið í 1-2 mínútur í viðbót og athugið þá aftur. Takið úr ofninum um leið og tannstöngullinn kemur þurr upp. Kælið kökurnar á grind.

Krem: Þeytið smjörið í 3-5 mínútur eða þar til það verður ljóst og létt. Bætið flórsykrinum saman við og þeytið í 3 mínútur til viðbótar, bætið mjólkinni smám saman út í ásamt vanillunni þar til kremið er létt og meðfærilegt. Setjið kremið í sprautupoka og sprautið á kökurnar. Ég notaði stút nr. 2D frá Wilton. Formin og sjóræningjafánana fékk ég í Kosti.

Freistandi kjúklingaréttur með púrrulauk og sweet chili rjómasósu

október 2, 2013 by helenagunnarsd 25 Comments

Nú nálgast óðfluga sá tími að kona býr ekki lengur við þann lúxus að geta myndað kvöldmatinn í dagsbirtu. Ef ég á að segja alveg eins og er, þá hlakka ég ekkert voðalega mikið til þess tíma. Þeir sem hafa myndað mat, vita að dagsbirta er besti vinur fallegra matarmynda. Og þegar maður er ekki áhuga- eða atvinnu ljósmyndari, á tiltölulega einfalda myndavél, kann næstum ekkert í ljósmyndun og á ekki ljósmyndastúdíó, eru félagarnir myrkur og flass ekki bestu vinir manns. Maður einfaldlega tekur ekki myndir af mat með flassi, það er agalegt! Annað hvort þarf ég að fara að elda matinn í hádeginu, finna eitthvað út úr þessu birtuveseni eða einfaldlega taka myndir af matnum undir ljósunum í eldhúsinu hjá mér og vona það besta. Ég hugsa að þið fáið að sjá sitt lítið af hverju á komandi vetri. Ef þið lumið á einhverjum góðum ráðum varðandi þetta lúxusvandamál mitt, þigg ég þau með þökkum.

En þá að uppskrift dagsins. Það má með sanni segja að þessi kjúklingaréttur sé af sparilegri gerðinni. Rjómaostur og sýrður rjómi spilar lykilhutverk í sósunni sem er einstaklega bragðgóð með sætu og mildu chilli og púrrulauksbragði. Rétturinn er til dæmis alveg kjörinn lágkolvetnaréttur, borinn fram með fersku grænu salati eða blómkálsgrjónum. Sweet chilli sósuna er hægt að fá sykurlausa t.d í Krónunni og sennilega víðar. Annars mæli ég nú alveg heilshugar með þessum einfalda og ljúffenga kjúklingarétti fyrir alla og hvet ykkur, kæru vinir til að prófa, þetta er sannkallaður veislumatur.

Freistandi kjúklingur í púrrulauks og sweet chili rjómasósu (fyrir 5):

5 kjúklingabringur, skornar í teninga (gúllas stærð)
1 púrrulaukur, smátt skorinn
2 dósir sýrður rjómi
1 lítil dós rjómaostur (125 gr)
1 teningur kjúklingakraftur
2 hvítlauksrif, smátt söxuð eða rifin
4-5 msk sweet chilli sósa (eftir smekk)
1 dl rifinn ostur
Salt og pipar

Aðferð: Hitið ofn í 200 gráður með blæstri. Hitið pönnu með smá smjöri eða olíu, saltið og piprið kjúklingabitana og brúnið þá vel eða þar til þeir eru nánast fulleldaðir. Setjið kjúklinginn í eldfast mót. Lækkið hitann á pönnunni, setjið smá olíu eða smjör á pönnuna og steikið púrrulaukinn þar til hann mýkist aðeins, ca. 3 mínútur.

Setjið rjómaostinn, sýrða rjómann, kjúklingatening, hvítlauk og sweet chilli sósuna út á og leyfið að malla aðeins, smakkið til með sweet chilli sósunni. Bætið örlitlu vatni saman við sósuna ef ykkur finnst hún of þykk. Stráið rifna ostinum yfir kjúklingabitana og hellið sósunni því næst yfir. Bakið í ofni við 200 gráður í 15 mínútur eða þar til kraumar í sósunni og hún hefur tekið lit. Berið fram með góðu grænu salati og grjónum.

Archives for október 2013

Footer