Ó þessir hafrakossar. Þegar Vikan hafði samband við mig og bað mig um að senda inn uppskriftir fyrir matgæðing vikunnar voru þessar dúllur fyrstar að koma upp í hugann. Þetta er svona næstum of gott til að vera satt og getur eiginlega ekki annað en slegið í gegn. Ég fékk hugmyndina að kökunum á síðunni sem bandarísku hjónin Kevin og Amanda halda úti. Þar má oft finna skemmtilegar uppskriftir, fallegar ljósmyndir og hugmyndir að hinu og þessu. Uppskriftirnar á síðunni eiga það hins vegar all flestar sameiginlegt að ekkert er til sparað í smjeri, sykri og öðru fíneríi svo þær flokkast algjörlega undir mat sem fólk ætti ekki að hafa oft á borðum. En maður minn, ef þú vilt gera vel við þig og þína og baka guðdómlegar kökur til að eiga á aðventunni, já þá eru þessar bara málið, ég lofa!
Hafrakossar (Breytt uppskrift frá www.kevinandamanda.com):
- 250 gr mjúkt smjör við stofuhita
- 2 dl púðursykur
- 1 dl sykur
- 1 egg
- 2 tsk vanilluexract
- 3 dl hveiti
- 1 tsk matarsódi
- ½ tsk salt
- ½ tsk kanill
- 6 dl haframjöl (ath ekki grófir hafrar)
Aðferð:
Hitið ofn í 170 gráður með blæstri. Hrærið saman smjör og sykur þar til létt og ljós. Bætið egginu og vanillu út í og blandið vel saman við.
Hrærið saman hveiti, matarsóda, salti og kanil. Bætið út í smjörblönduna og hrærið létt saman. Bætið höfrunum út í og blandið þar til rétt svo komið saman. Setjið deigið með tveimur teskeiðum á plötu, þrýstið aðeins ofan á hverja köku og bakið í 8-10 mínútur. Kælið á grind.
Krem:
- 150 gr smjör
- 250 gr flórsykur
- 2 msk rjómi
- 1 tsk vanilluextract
Aðferð: Þeytið allt vel saman og sprautið eða smyrjið á kældar kökurnar og leggið aðra köku ofan á. 
Takk fyrir góðar uppskriftir ! Segðu mér….Vanillu extract , þaðeru ekki vanilludropar.
Ef svo er hvar fær maður extract 🙂 Kveðja
Sæl Gerður og takk fyrir kveðjuna!
Vanilluextract eru ekki vanilludropar, heldur búið til úr ekta vanillu og maður finnur sannarlega bragðmun, mér þykir extractið mun betra og nota það sjálf í allan minn bakstur. Ég er vön að kaupa mér stróra flösku af vanilluextraxt frá Kirkland sem fæst í Kosti. Ég hef líka rekist á þetta í Hagkaupum, Nóatúni og Þín verslun en þá frá öðrum merkjum. Það stendur þá oftast utan á ”pure vanilla extract”. Ef þú átt þetta ekki til eða getur ekki nálgast það, er lítið mál að nota bara gömlu góðu vanilludropana, kannski aðeins minna magn.
Kær kveðja, Helena
Takk fyrir svarið. Ætla að skunda í Kost og ná í extract ! Kaupi nefnilega alltaf ískex þar, Frábært blogg hjá þér 🙂
Sæl og takk fyrir uppskriftina, mér líst vel á hana. Geymir þú kökurnar í ísskáp eða heldurðu að það sé hægt að frysta þær?
Kveðja, Guðrún.
Sæl Guðrún
Ég hef nú ekki þurft að geyma kökurnar lengi en þær sem voru ekki borðaðar samdægurs fóru í ísskáp. Ég myndi þó mæla með því að borða þær stofuheitar því þá er kremið svo mjúkt og gott. Það er í góðu lagi að frysta þær, bara passa að pakka þeim vel inn 🙂
Kær kveðja, Helena
Hæ og takk fyrir þessa uppskirft. Get ekki beðið eftir að prófa.
Hvað áttu við með “ekki grófir hafrar” ? Bara til að vera viss 🙂
Kv Sólveig
Sæl Sólveig
Ég á semsagt við fínni tegundina af höfrum, ekki tröllahafra eða þá grófvölsuðu. Ég notaði fínvalsaða instant hafra sem tekur bara 5 mínútur að sjóða, það kom vel út 🙂
Kær kveðja, Helena
Sýðurðu hafrana sem sagt áður?
Nei alls ekki, hef þá hráa. Var semsagt að meina að það er betra að nota hafra sem eru fljótir að eldast, ekki þá grófu.
Kv. Helena
Flottar kökur.Ætla að baka þær..
Hæ – þær fletjast ekki sjálfar út – fletur þú þær út eða?
Sæl Lilja
Ertu þá að meina þegar þær eru í ofninum? Ég set þær á plötu með tveimur teskeiðum og þær láku aðeins út hjá mér og þynntust, eru samt ekkert svo þunnar. Ef þú vilt hafa þær enn þynnri væri alveg hægt að ýta ofan á þær áður en þær fara í ofninn, t.d. með botni á glasi eða bara lófanum.
Vona að þetta hjálpi 🙂
kær kveðja, Helena
Já ok – varstu pottþétt með þetta deig? Vegna þess að þær voru miklu þykkari hjá mér og ekki sjéns að þær myndu leka, í raun þurfti að ýta þeim niður svo hægt væri að setja kremið á seinna.. 🙂
Já ég var með nákvæmlega þetta deig 🙂 Ég set kremið á botninn á kökunni, sný semsagt köku við (hef hana á hvolfi), sprauta kremi á og legg aðra köku svo ofan á þannig að botnarnir á báðum kökunum snerta kremið.
Bræðiru smjörið ? 🙂
Nei, hef það stofuheitt. Bæti því inn, takk fyrir 🙂
Kveðja, Helena
Hæ hæ flott uppskrift hjá þér. 🙂 Er einhver sérstök ástæða fyrir því að nota ekki tröllharfa, það er að segja önnur en eldunartíminn?
Ég get nefnilega bara borðað tröllhafrana þoli hina svo illa.
Sæl Hrafnhildur
Þú getur alveg notað Tröllahafra ef þér þykja þeir betri. Kökurnar sem ég gerði, og uppskriftin er eftir, er úr fínum höfrum. Áferðin á kökunum verður þá bara aðeins grófari en örugglega góð 🙂
Kær kveðja, Helena
takk takk 🙂
henda tröllahöfrunum bara augnablik í matvinnsluvél
Góð hugmynd! 🙂
Hæhæ, ég lenti í því sama og Lilja, eins og að það sé of mikið af höfrum til þess að þær geti lekið út (eða of lítið smjör). Hugsa að ég myndi breyta hlutföllunum á því næst til þess að þær leki út. En góðar eru þær! Nomm!
Hæ Valgerður
Þær láku alls ekki svo mikið út hjá mér heldur. Mínar kökur voru mjög stórar svo þær líta eiginlega út fyrir að vera þynnri myndinni en þær voru. Þær eiga heldur ekkert að vera þunnar heldur svolítið þykkar og djúsí eins og í upprunalegu uppskriftinni 😉 Getur séð hvernig þær eru ef þú ýtir á linkinn hjá uppskriftinni.
Sæl,
Langaði að forvitnast hvað koma ca margar kökur úr þessari uppskrift?
Bestu þakkir og takkf fyrir flott blog 🙂
Takk kæra Bryndís
Veistu, ég man ekki alveg nákvæmlega hvað þær voru margar. En miðað við hvað ég kom mörgum á plötuna í einu sýnist mér að þær hafi verið 24, semsagt 12 kossar. Mínar voru þó ansi stórar svo ég myndi halda að 16-18 kossar væri líkleg tala miðað við að kökurnar séu aðeins minni. Gangi þér vel!
Kær kveðja, Helena
Oh, my bad! Ég held að ég hafi í alvöru sett bara 200gr af smjöri en ekki 250gr. Svona er þetta stundum að baka með þriggja ára barni !
Ætla að skella í annað batch á morgun, þetta er að verða búið 😉
Þetta er mjög svipað uppskrift sem ég fann einhvers staðar fyrir nokkrum árum, nema að í stað haframjöls eru gulrætur og hakkaðar möndlur (og enginn vanilla í kökunum sjálfum). Verð að tékka á þessari útgáfu 🙂
Það hljómar samt enn meira spennandi en hafrarnir! ég er alveg líkleg til að stela þessari gulrótarhugmynd 😉
Kær kveðja, Helena
250 gr. fínmalað spelt
250 gr. púðursykur
125 gr. smjör
1 egg
1 1/2 tsk. lyftiduft
1 1/2 tsk. matarsódi
1 tsk kanill
1/4 tsk. negull
1 pakki hakkaðar möndlur
2 meðalstórar gulrætur (rifnar smátt)
Sett saman í skál og hrært saman. Gerðar eru litlar kúlur og settar á smjörpappír og þrýst ofan á þær með einum putta. Bakað við yfir og undirhita við 180° í 8-10 mínútur
Krem
1 askja rjómaostur frá MS
50 g smjör
1 pakki flórsykur
1 tsk. vanilludropar
Smá sletta af kaffi
(Ég semsagt nota alltaf spelt, enda með hveitióþol, en upphaflega uppskriftin var með hveiti)
En hvað þessi hljómar vel! Já ég nota sjálf alltaf spelt í stað hveitis, aðallega vegna þess að mér þykir það betra á bragðið og svo fer það aðeins betur í mitt fólk. En takk fyrir uppskriftina, litlar gulrótarköku/möndlusmákökur með rjómaostakremi hljóta bara að vera góðar.
Helena
Ég tók mínar kökur í kúfulla teskeið, bjó síðan til kúlu og flatti þær síðan út á plötunni, það kemur agalega vel út 😀
En gaman að vita! Takk fyrir að deila 🙂
Kær kveðja, Helena
Bakaði þessar kökur í morgun og eru þær mjög góðar og betri ef að þær eru vel kaldar
Helena!
Þessir eru ROSALEGIR!! Er að byrja á 3.bakstri á viku. Ég. Ein heima í fæðingarorlofi.
Sem er kannski ekki alveg að gera sig..
Hahaha! Ég veit!… Njóttu bara og skelltu í þriðju umferð án þess að hika 🙂
Hafði þessa kossa í gær með kaffinu og þvílik dásemd VÁ þeir eru æði. Ætlaði alltaf að gera þá fyrir jólin en varð ekkert úr því, gat svo ekki hætt að hugsa um þá og skelli í eina uppskrift í gær.
Lenti ekki í neinu veseni með að þær og náði 29 kossum ( eða 58 kökur) og með því að fyrstu kökurnar voru frekar stórar því var búin að lesa öll kommentin og var svo hrædd um að þær munu ekki fletjast út.
Allir í fjölskyldunni voru þvílíkt ánægðir með kökurnar og þurfti ég að taka restina frá svo strákarnir og maðurinn minn mundi nú ekki klára þær i einum rikk.
Takk fyrir frábæra uppskrift mun pottþétt nota hana mikið 🙂
mín allra uppáhalds “jólauppskrift”. þessir kossar eru altaf bakaði hjá mér um jólin ! það þarf einmitt að fela boxin með kökunum í, þær væru annars ekki lengi að klárast 😀