Archives for júní 2014

Vatnsmelónu gazpacho

júní 29, 2014 by helenagunnarsd 2 Comments

Sumarið sem ég varð 18 ára fór ég til Malaga á Spáni og var þar í mánuð í spænskuskóla. Þetta var sannarlega einhver skemmtilegasti mánuður ævi minnar og þvílík upplifun fyrir 17 ára unglingsstelpu að fara alein langt í burtu frá öllum og það fyrir tíma Facebook og Skype. Skólinn var dásamlegur í fallegu úthverfi Malaga borgar og þar kynntist ég í fyrsta skipti alvöru andalúsískri paellu og gazpacho.. og flamenco dansi og nautaati og San Miguel en það er önnur saga. Paellan heillaði mig aldrei neitt sérstaklega, þannig lagað, en ég hef allar götur síðan verið afar hrifin af gazpacho, sem er í raun bara köld súpa. Það er fátt eins frískandi í 30 stiga hita en ísköld og bragðmikil gazpaco og merkilegt nokk þá er hún bara alveg ágæt líka í 15 stiga hita á Íslandi. Ég hef ekki getað hætt að hugsa um þessa vatnsmelónu gazpacho síðan ég sá hana í uppskriftatímariti um daginn. Svo gerði ég hana um daginn, við borðuðum hana í sólinni á pallinum og nú get ég aftur ekki hætt að hugsa um hana. Hún skoraði fullt hús stiga hjá okkur, svo fersk, létt og bragðgóð, fullkominn forréttur á undan grillmat til dæmis. Þarna sannast líka enn og aftur hið margkveðna, hvað einfalt er oftast langbest, í matargerð sem og öðru. Ég mun gera þessa aftur og aftur.

Vatnsmelónu gazpacho fyrir 4 (örlítið breytt uppskrift úr FoodNetwork Magazine):

2 bollar vatnsmelóna, afhýdd og skorin í litla bita
2 eldrauðir vel þroskaðir tómatar
1/4 bolli góð jómfrúar ólífuolía
1/2 agúrka, fræhreinsuð
1/2 grænn eða rauður chillipipar, fræhreinsaður ef þið viljið ekki sterka súpu
2 msk smátt saxaður rauðlaukur (og aðeins meira til að strá yfir)
2 tsk rauðvínsedik
Sjávarsalt og nýmalaðurr pipar
4 msk fetaostur í vatni
Smávegis af graslauk og steinselju, smátt saxað (líka hægt að nota aðrar ferskar kryddjurtir, t.d dill)

Aðferð: Setjið einn og hálfan bolla af saxaðri vatnsmelónu og tómatana í blandara og þeytið þar vel maukað. Bætið út í ólífuolíu, agúrku, chillipipar, rauðlauk, rauðvínsediki, salti og pipar (ég notaði alveg 1 tsk af grófu Saltverk sjávarsalti). Blandið þessu vel saman þar til silkimjúkt. Smakkið til með salti, pipar og rauðvínsediki. Hellið í könnu eða skál og kælið í a.m.k 30 mínútur. Hellið súpunni í bolla eða litlar skálar. Toppið með restinni af vatnsmelónunni, fetaosti, smátt söxuðum rauðlauk, graslauk, steinselju eða dilli. Berið fram strax, ískalt.

Rabarbarakaka með marsipani og vanillusósu

júní 16, 2014 by helenagunnarsd 16 Comments

Í Stokkhólmi, og sennilega víðar í Svíþjóð er varla þverfótað fyrir kaffihúsum, krúttlegum bakaríum, kökuhúsum og litlum dúllustöðum þar sem hægt er að setjast niður fá sér kaffisopa og ”fika”, sumsé fá sér eitthvað sætt og gott með kaffinu. Við rákumst inn á eitt slíkt á meðan við vinkonurnar dvöldum í Stokkhólmi um daginn. Þar var meðal annars boðið upp á himneska berjaböku með vanillusósu. Bragðlaukarnir dönsuðu af kæti og ég mundi þá hvað vanillusósa og sænskt sumar er dásamleg blanda. Og ég hugsaði með mér: Af hverju er ekki bara alltaf vanillusósa með öllu? Svo kom ég heim og gleymdi þessu nostalgíuvanillusósukasti mínu þar til ég rakst á uppskrift að rabarbaraköku á sænsku matarbloggi. Vanillusósu minningin kom þá eins og himnasending og ég varð að athuga hvernig vanillusósa færi með slíkri köku. Útkoman var svo góð að ég get ekki annað en deilt gleðinni með ykkur. Svo þykir mér líka bara fátt þjóðlegra en glænýr rabarbari sem virðist spretta undir hverjum húsvegg á landinu nema mínum. Elsku bakið kökuna og gerið vanillusósu með, kakan er reyndar líka æðisleg með þeyttum rjóma.

Rabarbarakaka með marsipani og vanillusósu:

3 egg
2 dl hrásykur
1 tsk vanilluextract
100 gr brætt smjör
2.5 dl fínmalað spelt eða hveiti
1 tsk lyftiduft
Sjávarsalt á hnífsoddi
150 gr rabarbari, skorinn í litla bita
2 tsk kartöflumjöl
125 gr marsipan

Aðferð: Hitið ofn í 170 gráður, bræðið smjörið og leyfið aðeins að kólna. Þeytið saman egg, sykur og vanillu þar til létt og ljóst. Hellið bræddu smjörinu út í á meðan þið hrærið. Bætið mjölinu, lyftiduftinu og salti saman við og hrærið létt þar til allt er komið saman. Hellið í smurt smelluform. Hrærið kartöflumjölinu saman við rabarbarann og dreifið honum yfir deigið, ýtið aðeins ofan í deigið. Rífið marsipanið á grófu rifjárni yfir rabarbarann. Bakið í 35-40 mínútur. Ef ykkur finnst marsipanið dökkna mikið leggið þá álpappír yfir kökuna eftir ca. 25 mínútur.

Vanillusósa:

2 dl rjómi
2,5 dl mjólk
1 dl hrásykur
1 vanillustöng, kornin skafin úr
1 sléttfull msk kartöflumjöl
1 msk mjólk
1 eggjarauða

Aðferð: Setjið rjóma, mjólk, sykur og vanillukorn í lítinn pott. Hitið við vægan-meðalhita þar til blandan hefur hitnað vel og vanillan vel blönduð saman við mjólkina, ekki sjóða. Hrærið kartöflumjölið saman við eina matskeið af mjólk og hellið út í vanillublönduna í pottinum. Pískið saman við þar til blandan er alveg að fara að sjóða eða rétt byrjuð að sjóða, froða byrjar að myndast í köntunum og rýkur úr blöndunni. Takið af hitanum og pískið áfram og látið aðeins kólna. Bætið eggjarauðunni þá út í og pískið áfram þar til blandan hefur þykknað aðeins og kólnað. Hellið sósunni gegnum sigti og berið fram volga með rabarbarakökunni. Sósan geymist í ísskáp í lokuðu íláti en þynnist aðeins þegar hún kólnar.

Taco súpa

júní 12, 2014 by helenagunnarsd 20 Comments

Ef ég hef einhvern tímann sagt að súpur séu kjörinn vetrarmatur, sem ég hef örugglega gert, þá tek ég það til baka. Ég er hrifin af súpum allt árið um kring og fæ ekki nóg af að prófa nýjar útgáfur. Mér þykir þessi súpa meira að segja bara þræl sumarleg með þessum fallegu grænu og rauðu litum og ilmandi límónubátum. Þetta er svona maturinn sem ég elda þegar ég er kannski pínulítið stressuð og langar að slaka á í eldhúsinu og elda eitthvað rólegt og fallegt. Jafnast á við bestu íhugun að standa yfir gómsætri súpu, sjá hana umbreytast úr nokkrum hráefnum úr ísskápnum, smá kryddi og vatni yfir í þessa dásamlegu máltíð. Þessi tiltekna súpa er svona ”slá í gegn súpa”. Kjörin veislusúpa sem er auðvelt að gera mikið magn af og meðlætið gerir hana svo sparilega og sérstaka. Svo er hún auðvitað líka bara upplögð heima súpa fyrir fjölskylduna. Prófið þessa og leyfið mér að vita hvernig ykkur líkaði. Ég mæli innilega með henni!

Taco súpa:

500 gr nautahakk
2 rauðlaukar
2 paprikur
3 hvítkauksrif
2 tómatar
1 lítil sæt kartafla
3 msk tacokrydd
1 kjúklingateningur
1 krukka mild chunky salsa (350 gr)
2 msk tómatpúrra
1 l vatn
2 msk rjómaostur, ég nota philadelphia light
2 msk rjómi

Aðferð: Skerið rauðlauk, papriku og hvítlauk smátt. Hitið stóran pott og brúnið nautahakkið í pottinum. Bætið grænmetinu út í og látið krauma þar til það mýkist aðeins. Kryddið með tacokryddinu og setjið gróft skorna tómatana út í. Setjið salsasósuna, tómatpúrru, kjúklingatening og vatn út í og hleypið suðunni upp. Skerið sætu kartöfluna í litla teninga og bætið út í. Látið sjóða við hægan hita í 20-30 mínútur. Bætið þá rjómanum og rjómaostinum saman við og smakkið til með salti og pipar ef ykkur finnst þurfa. Mér finnst svo gott að stappa aðeins sætu kartöflurnar í súpunni með gamaldags kartöflustappara, áður en ég ber hana fram þá þykknar súpan aðeins. Súpan er góð strax, en enn betri daginn eftir svo það er upplagt að gera auka fyrir nestið eða í matinn seinna. Berið súpuna fram með meðlætinu góða og kreistið dálítinn límónusafa yfir hverja skál. Njótið í botn!

Meðlætið:

5 tortillakökur
Avocado í bitum
Rifinn maríbó ostur
Smátt saxaður vorlaukur
Límónubátar

Aðferð: Hitið ofn í 170 gráður með blæstri. Staflið tortillakökunum upp, skerið í tvennt og svo í mjóar ræmur. Leggið á ofnplötu, dreifið örlítilli olíu yfir og sjávarsalti og blandið vel saman. Bakið í 15 mínútur og hrærið aðeins í kökunum einu sinni eða tvisvar yfir bökunartímann. Látið kólna og berið fram með súpunni.

Grillborgarar með fetaostafyllingu

júní 5, 2014 by helenagunnarsd Leave a Comment

Þá liggja Danir í því. Eldavélin mín, elsku spanhelluborðið mitt sem ég hef stólað á síðustu árin er bilað. Svo mikið bilað að varahluturinn í það er ekki einu sinni til á landinu og verður ekki næsta hálfa mánuðinn. Þangað til er ég eldavélarlaus. Það verður því allt annað hvort ofnbakað eða grillað hér á bæ á næstu vikum og hugmyndafluginu leyft að njóta sín. Vissuð þið til dæmis að það er hægt að sjóða egg í hraðsuðukatli? Nei, hélt ekki. Neyðin kennir naktri konu að spinna! Sem betur fer nota ég bakarofninn mikið til eldunar og grillið nær varla að kólna svona yfir sumartímann svo þetta reddast nú allt saman.

Þessir grilluðu hamborgarar urðu einmitt fyrir valinu fyrir nokkru, enn einn grilldaginn á heimilinu. Ég geri mér oft ferð í Kjöthöllina til að verða mér úti um gæða ungnautahakk. Hakkið þar kallast lúxus nautahakk, inniheldur 100% gæða ungnautakjöt og er fituprósentan í hakkinu aðeins um 2-3%. Þetta er kjörið hamborgarakjöt, helst vel saman, frábært á grillið og dúnmjúkt. Mér finnst upplagt að kaupa aðeins aukalega til að henda í frystinn og grípa í þegar næsta hamborgarapartý stendur til. Og nei, þetta er sannarlega ekki auglýsing heldur einfaldlega það sem mér þykir gott. Þessir borgarar voru sannarlega með þeim betri sem við höfum grillað, frábært bragð af kjötinu og fetaosturinn gerði alveg útslagið.

Grillborgarar með fetaostafyllingu (fyrir fjóra borgara):

500 gr hreint ungnautahakk
2 tsk worchestersósa
4 msk fetaostur í vatni eða fetakubbur
Sjávarsalt, nýmalaður pipar og ólífuolía

Aðferð: Blandið worchestersósunni saman við nautahakkið. Skiptið kjötinu jafnt í fjóra hluta. Takið hvern hluta og skiptið honum í tvennt. Fletjið hlutana út með fingrunum þannig að úr verði átta frekar þunnir borgarar. Myljið 1 msk af fetaosti í miðjuna á fjórum borgunum. Leggið þá hinn helminginn af kjötinu yfir og pressið saman með fingrunum og gætið að kantarnir festist vel saman svo osturinn leki ekki út. Penslið borgarana með ólífuolíu og kryddið vel með salti og pipar. Grillið á vel heitu grilli í u.þ.b fimm mínútur á hvorri hlið. Berið fram með því grænmeti og sósum sem ykkur þykir best. Létt jógúrtsósa passar einkar vel við borgarann að mínu mati ásamt rauðlauk, lárperu, vel þroskuðum tómötum og lambhagasalati.

Ljúffengir granóla bitar sem ekki þarf að baka

júní 2, 2014 by helenagunnarsd Leave a Comment

Hafið þið skoðað heimasíðuna Oh she glows? Ef ekki þá mæli ég heilshugar með heimsókn þangað. Þar má finna aragrúa uppskrifta og góðra ráða sem eiga það allar sameiginlegt að vera í hollari kantinum og oftar en ekki svokallaðar ”vegan” uppskriftir, sem eru þá lausar við allar dýraafurðir, þar með talið egg og mjólkurafurðir. Þessir dúndurgóðu orkubitar eru einmitt fengnir þaðan og það bregst ekki að allt sem ég hef prófað af síðunni er gott. Eða það þykir mér allavega. Ég myndi þó seint kalla þessa bita hreint og beint hollustufæði, þeir eru í það minnsta frekar orkuríkir og alveg skuggalega góðir, dálítið klístraðir og stökkir. Minna mig helst á blöndu af hráu hafra-smákökudegi og rice krispies kökum. Þeir allavega virka og renna ljúflega niður jafnt hjá ungum sem öldnum. Það er gott að geyma bitana í ísskáp, jafnvel í frysti því þeir eru dálítið lausir í sér þegar þeir ná stofuhita blessaðir. Eða eins og Angela Oh she glows pæja orðar það, þá er best að sporðrenna einum bita, í heilu lagi, beint úr ísskápnum og nei, það er sko ekki erfitt skal ég segja ykkur. Svo það er betra að hafa bitana bara litla og sæta og njóta í botn.

Ljúffengir granóla bitar sem ekki þarf að baka (breytt uppskrift af www.ohsheglows.com):

1 1/2 bolli haframjöl
1 bolli rice krispies eða annað blásið, létt morgunkorn – ég notaði hrísflögur frá Sollu
1/2 bolli möndluflögur
1/2 bolli kókosmjöl
2 msk chia fræ
1/2 bolli þurrkuð trönuber
2 msk súkkulaðidropar (má sleppa)
3/4 bolli hreint möndlusmjör, helst úr ristuðum möndlum, fæst t.d í Kosti og er ómótstæðilega gott
1/4 bolli brædd kókosolía
1/4 bolli agavesíróp, hlynsíróp, hunang eða það síróp sem ykkur þykir best
1 tsk vanilluextract
1/2 tsk sjávarsalt

Aðferð: Blandið öllum þurrefnum saman í stórri skál. Pískið saman möndlusmjöri, kókosolíu, sírópi, vanillu og salti og hellið yfir þurrefnin í skálinni. Blandið vel saman. Klæðið lítið form eða eldfast mót með bökunarpappír, hellið blöndunni í og þrýsið vel niður og út í kantana. Stráið yfir nokkrum trönuberjum og súkkulaðidropum og þrýstið aðeins niður. Setjið í frysti í 30 mínútur. Takið þá út og skerið í litla bita. Geymið bitana í frysti eða ísskáp.

Archives for júní 2014

Footer