Eldhúsperlur

Ég setti myndir af humar taco sem ég gerði á instagram um daginn og hef sjaldan eða aldrei fengið jafn margar fyrirspurnir um uppskrift. Svo hér er hún komin! Ég mæli af öllu hjarta að þið prófið og athugið að það er auðveldlega hægt að skipta humrinum út fyrir risarækjur, það er alls ekki síðra. Og fyrir kóríander hatarana þarna úti (þið vitið hver þið eruð) þá er leikandi hægt að sleppa því og nota t.d. steinselju eða jafnvel ferskt basil í staðin. Uppskriftin er ríflega áætluð fyrir tvo til þrjá sem aðalréttur. Þó að uppskriftin virðist löng lofa ég að hún er ekki flókin og inniheldur ekki flókin hráefni. Nokkur skref sem eru svo sannarlega þess virði fyrir þessar ljúffengu tacovefjur!

Humar taco

Humarinn:

• 12-15 meðalstórir humarhalar, skelflettir og hreinsaðir
• 2 tsk chillimauk úr krukku, t.d. Sambal oelek eða annað
• Salt og pipar (ég nota alltaf flögusalt frá Saltverk)
• 3 msk smjör

Pikklaður rauðlaukur:

• 1 rauðlaukur, skorinn í tvennt og svo þunnar sneiðar
• 2 msk hvítvínsedik
• 1/2 tsk salt
• 1/2 tsk sykur

Hrásalat:

• 1/2 lítið rauðkálshöfuð, rifið niður eða skorið mjög fínt
• 2 msk smátt saxað ferskt kóríander
• 2 msk majónes
• 2 msk hvítvínsedik
• 1 tsk chilllimauk
• 1 tsk sykur
• 1/2 tsk salt

Límónu sósa:

• 4 msk sýrður rjómi
• 2 msk majónes
• Safi og rifinn börkur af hálfri límónu
• Salt eftir smekk

Lárperu salsa:

• 1 stór lárpera eða 2 minni, skorið smátt
• 2 tómatar, skornir smátt
• Safi úr hálfri límónu
• Salt og pipar
• Smá saxað kóríander

Litlar mjúkar hveiti eða maís tortillakökur. Ef þið finnið ekki litlar kökur er líka hægt að skera litlar út með því að leggja lítinn disk eða undirskál ofan á tortillaköku og skera meðfram.

Límónubátar og ferskt kóríander til að setja yfir tacovefjurnar í lokin.

Mér finnst best að gera þetta í þessari röð:

1. Byrjið á að útbúa pikklaða rauðlaukinn. Blandið öllu saman og leggið til hliðar á meðan þið undirbúið restina af meðlætinu.
2. Gerið hrásalatið. Skerið rauðkálið mjög smátt eða rífið niður, pískið innihaldið í sósuna saman í skál og setjið svo kálið saman við. Smakkið til og geymið í ísskáp.
3. Hrærið saman hráefnin í límónusósuna, smakkið til og setjið til hliðar.
4. Skelflettið humarinn og hreinsið. Leggið á disk og þerrið vel. Smyrjið þunnu lagi af chillimauki öðru megin á hvern humarhala.
5. Skerið niður hráefnið í lárperusalsað, smakkið til og setjið til hliðar.
6. Hitið pönnu við háan hita, kryddið humarinn með salti og pipar. Setjið smjörið á pönnuna. Þegar smjörið byrjar að freyða er tími til að setja humarinn á. Steikið humarinn í um það bil 1 mínútu á hvorri hlið. Gott er að ausa smjörinu yfir humarinn á meðan hann steikist. Setjið humarinn á disk og hellið dálitlu af smjörinu yfir hann ásamt því að kreista smá límónusafa yfir.
7. Hitið tortillakökurnar á þurri vel heitri pönnu báðu megin.
8. Berið fram! Best finnst mér að raða þessu svona saman: Neðst fer smá hrásalat, því næst lárperusalsa og pikklaður rauðlaukur. Humarinn fer þar ofan á (þrír halar á hverja kökur finnst mér passlegt), dálítið af sósu yfir ásamt fersku kóríander og nokkrum dropum af kreistri límónu. Endurtekið eins oft og þörf er á. Það er unaðslegt að drekka ískalt rósavín með!

 

 

 

Ég get ekki mælt nógu mikið með að þið prófið að baka þessar dásamlegu tebollur. Ég er kannski ekki alveg hlutlaus, enda komin tæpa 6 mánuði á leið með furðulegar langanir í hitt og þetta.. þessar tebollur voru eitt af því og ég ekki í rónni fyrr en baksturinn hafði átt sér stað. Og maður minn, ég varð ekki fyrir vonbrigðum. Uppskriftin er gömul og góð og ég man hreinlega ekki hvaðan hún kemur, hún er handskrifuð á miða innan um helling af öðrum uppskriftum inni í gamalli uppskriftabók hjá mér. En sá sem á heiðurinn af uppskriftinni á heiðurinn alveg skilinn. Ég bætti þó við sítrónudropunum og ég hvet ykkur til að nota þá líka, þeir passa alveg ótrúlega vel við! Uppskriftin er meðalstór, úr henni fengust 22 ágætlega vænar tebollur. Athugið að bollurnar frystast mjög vel og mér finnst alveg upplagt að baka þær fyrir útilegu eða ferðalag. Það jafnast ekkert á við heimabakað nesti utandyra.

Dúnmjúkar gamaldags tebollur með rúsínum (um það bil 22 bollur)

• 200 gr mjúkt smjör
• 200 gr sykur
• 3 egg
• 1/2 tsk sítrónudropar
• 1 tsk vanilludropar
• 400 gr hveiti
• 1 msk lyftiduft
• 1/2 tsk salt
• 1 dl mjólk
• 200 gr rúsínur (Má líka nota súkkulaði í staðin fyrir rúsínur)

Aðferð: Hitið ofn í 180 gráður með blæstri. Þeytið saman smjör og sykur þar til létt og ljóst, alveg í 3-5 mínútur í hrærivél. Bætið eggjunum út í einu í einu og hrærið vel á milli. Bætið sítrónu, og vanilludropum saman við. Hrærið hveitinu, saltinu og lyftiduftinu saman og bætið að lokum út í ásamt mjólkinni og rúsínum.

Hrærið þar til allt blandast vel saman, en gætið þess að hræra ekki mikið eftir að hveitið er komið út í, bara þannig að allt sé komið saman. Setjið deigið með tveimur matskeiðum eða stórri ísskeið á bökunarpappírsklædda ofnplötu. Hver bolla hjá mér var ca. tvær vel fullar matskeiðar af deigi. Bakið í 8-10 mínútur eða þar til bakaðar í gegn og fallega ljósgullinbrúnar.

Í dag eru fjögur ár síðan ég setti fyrstu uppskriftina inn á Eldhúsperlur. Mikið sem mér þykir vænt um þetta matarblogg, fyrir utan það hvað það er gaman að deila öllum þessu uppskriftum og skrifa pistlana hefur síðan líka tilfinningalegt gildi. Hér eru samankomnar mínar uppáhalds uppskriftir ásamt gömlum og góðum uppskriftum fjölskyldunnar sem allar vekja notalegar minningar og svo er ótrúlega skemmtilegt að geta flett aftur í tímann og fundið allar þessar gersemar á einum stað. Fylgjendur á Facebook síðunni eru tæplega 12.000 og lestur hér inni eykst alltaf, þrátt fyrir að færslum hafi reyndar farið fækkandi á síðustu misserum. Bloggið og uppskriftaskrif eru algjörlega mitt aðal áhugamál en ég vinn ekki við það nema að hluta. Er í frábærri vinnu annars staðar. Það hefur þó fært mér allskonar skemmtileg tækifæri og líka gert mér kleift að vinna í aukavinnu það sem mér þykir skemmtilegast, það hljóta að teljast forréttindi.

Ég bakaði þessa köku um síðustu helgi, hún var svo fljót að klárast að ég var heppin að ná af henni einhverjum myndum áður en hún hvarf ofan í nokkra litla svanga munna. Uppskriftin er afar einföld. Það er meira að segja hægt að hræra deigið í kökuforminu sjálfu ef maður nennir ekki að óhreinka skál!

Fljótegasta skúffukakan með ómótstæðilegu smjörkremi

(Ég notast við bollamál – 1 bolli er 2,5 dl – Uppskiftin passar í venjulegt skúffukökuform ca. 20×30 cm)

• 1 bolli hveiti eða fínmalað spelt
• 3/4 bolli sykur (ég nota hrásykur)
• 1/2 bolli kakó
• 1/2 tsk salt
• 1 tsk instant kaffiduft
• 2 tsk vanillusykur
• 1/2 tsk matarsódi
• 1 tsk lyftiduft
• 1/2 bolli súrmjólk eða hrein jógúrt
• 1/4 bolli matarolía eða fljótandi kókosolía
• 1/2 bolli heitt vatn
• 2 egg

Aðferð: Hitið ofn í 170 gráður með blæstri, annars 190 gráður. Öllum þurrefnum pískað saman. Súrmjólk, olíu, vatni og eggjum svo hrært saman við. Ekki hæra of lengi, bara þannig að rétt blandist saman. Bakið í um 25 mínútur eða þar til prjóni sem stungið er í miðjuna kemur hreinn upp. Kælið kökuna alveg áður en kremið er sett á (Ef það er snjór eða frost og allir óþolinmóðir skelli ég forminu beint út á pall ofan á klaka eða snjó og kakan kólnar á 10 mínútum)

Ómótstæðilegt smjörkrem

• 250 gr smjör við stofuhita
• 350 gr flórsykur
• 2 msk kakó
• 2 tsk vanillusykur
• 1/4 tsk salt
• 4 msk sterkt uppáhellt kaffi (líka hægt að búa til smá instant kaffi ef maður nennir ekki að hella upp á)
• 4 msk rjómi

Aðferð: Byrjið á að þeyta smjörið vel þar til það verður ljóst og létt í sér. Bætið flórsykrinum út í ásamt kakóinu, vanillusykrinum og salti og þeytið vel saman á meðan þið setjið kaffið og rjómann smám saman út í. Þeytið kremið mjög vel eða í 5-7 mínútur þannig að það verði mjög létt í sér. Dreifið kreminu jafnt yfir kökuna og skreytið ef þið viljið.

Hér er á ferðinni alveg brjálæðislega góður og djúsí skyndi helgarmatur sem varð til alveg óvart í eldhúsinu hjá mér um daginn. Þetta er svona – það var ekkert til en ég nenni ekki að fara og kaupa neitt en allir eru mjög svangir – máltíð. Þá gerast nú oft undrin. Svo er þetta nú svo auðvelt að það er varla hægt að tala um uppskrift, þannig lagað. Eflaust er líka hægt að baka naanbrauðin sjálfur frá grunni, ég gerði það ekki en það er örugglega ekkert verra. Það góða er að það bara þarf ekki. Ég mæli hiklaust með réttinum og get ekki beðið eftir að elda þetta aftur.

Naanbaka með mangókjúkling og spínati (fyrir 3-4)

• Tvo stór naanbrauð (ég notaði Stonefire hvítlauks naan, fást t.d. í Hagkaup)
• 2 msk smjör
• 700 gr úrbeinuð kjúklingalæri, krydduð með kjúklingakryddi og karrýi eftir smekk (ég mæli með Deluxe karrýi frá Pottagöldrum)
• 2 msk ólífuolía,
• 1 dl mangóchutney
• 1 dl kjúklingasoð (vatn og kraftur, ég nota alltaf fljótandi Oscar kraft)
• 1 tsk Sambal oelek chillimauk (má sleppa ef þið viljið alls ekki sterkt)
• 2 góðar handfyllir ferskt spínat
• 200 gr rifinn ostur (1 poki, má líka nota meira)
• Ofaná: 1 rauðlaukur skorinn í þunnar sneiðar, fersk steinselja eða kóríander og jógúrtsósa, ég notaði tilbúna jógúrt sósu frá Gott í kroppinn með hunangi og dijon.

Aðferð:

Hitið ofn í 180 gráður. Leggið naanbrauðið á ofnplötu. Skerið kjúklinginn í litla munnbita. Hitið pönnu með ólífuolíu, kryddið kjúklinginn vel með góðu kjúklingakryddi og karrý og steikið. Þegar kjúklingurinn hefur brúnast vel bætið þá mangóchutney og kjúklingasoði á pönnuna og látið malla þar til kjúklingurinn er eldaður í gegn og sósan hefur þykknað aðeins, ca. 10 mínútur (það á ekki að vera mikil sósa). Smakkið til með salti og pipar og chillimaukinu.

Smyrjið naanbrauðin með smá smjöri og skiptið spínatinu jafnt á bæði brauðin. Hellið því næst kjúklingnum ofan á spínatið og toppið með vel af rifnum osti. Bakið í um 15 mínútur. Þegar komið úr ofninum leggið þá þunnar rauðlaukssneiðarnar yfir og skreytið með smá saxaðri steinselju eða ferskum kóríander og jógúrtsósu.

Það er örugglega enginn að lesa blogg í dag sem er kannski ekki skrýtið svona föstudag fyrir verslunarmannahelgi. En það er allt í lagi.. Ég ætla að vera heima um helgina og hugsa mér gott til glóðarinnar að hafa það notalegt og njóta þess að sofa í mínu rúmi og geta dregið andann svona nokkuð örugglega (halló frjókornaofnæmi!). En mér finnst samt mikilvægt að njóta þess að vera í fríi þó ég sé heima. Við höfum til dæmis oft farið út að borða um verslunarmannahelgar og hugsa að við látum verða af því sem og að njóta útiveru enda á veðrið að vera dásamlegt um helgina. Ég er allavega jafn spennt fyrir þessari gúrmei heimaveru og einhverjir eru spenntir fyrir þjóðhátíð, alveg satt. Uppskriftin í dag er samt dálítið ferðalagavæn. Matarmikið túnfisksalat í hollari kantinum sem heldur sér vel og er laust við majónes. Ofsalega gott, prófið bara. Góða helgi!

Matarmikið túnfisksalat

• 1 lítill rauðlaukur eða 1/2 stór, smátt skorinn
• 1 rauð paprika, smátt skorin
• 4 harðsoðin egg, smátt skorin
• 2 dósir túnfiskur í vatni (vatni hellt af)
• 4 msk Philadelphia light rjómaostur
• 4 msk Kotasæla
• Vel af nýmöluðum svörtum pipar
• Söxuð fersk steinselja

Aðferð: Öllu blandað vel saman. Smakkað til með pipar. Stórgott á ristað brauð eða hrökkbrauð.. uppáhaldið mitt er að setja salatið á gróft rúgbrauð. 

Við fjölskyldan erum nýlega komin heim úr dásamlegu sumarfríi sem við eyddum á ferðalagi um Suður Evrópu. Hófum ferðina í Þýskalandi, keyrðum svo sem leið ná niðureftir til Ítalíu og Frakklands og enduðum svo á Spáni þar sem við sóluðum okkur og láum í leti í þrjár vikur. Samtals fimm vikna ævintýralega skemmtilegt frí sem hefði hreint ekki getað verið betra. Á leið okkar niður eftir til Spánar stefndum við að því stoppa í litlum bæjum en ekki á fjölförnum ferðamannastöðum og sáum ekki eftir þeirri ákvörðum. Við höfðum ekki mjög mikinn tíma á hverjum stað og það var því kærkomið að gista í litlum krúttlegum þorpum á frönsku og ítölsku rivíerunni þar sem ekki þurfti að bíða í bílaröðum eða rata um götur stórra borga. Gistinguna bókuðum við alla fyrirfram gegnum booking.com og hver einasta bókum stóðst upp á hár. Fyrstu nóttina gistum við í borginni Bolzano sem er í Suður Týról, svo lá leið okkar niður að Garda vatni í bæinn Sirmione. Þar á eftir keyrðum við niður á Rivíeru og gistum í smábænum Finale Ligure. Eftir það lá leiðin yfir landamærin til Frakklands og fyrsti viðkomustaður þar var Saint Maxine, svo Tarascon og að síðustu Argéles Sur Mer. Þá fórum við yfir landamærin til Spánar, til Barcelona og svo sem leið lá niður eftir til Alicante þar sem við hittum foreldra mína og héldum áfram suður í íbúðina þeirra. Ef ykkur langar að forvitnast meira um ferðina getið þið kíkt á instagram síðuna mína, finnið mig þar undir: helenagunnarsd, set þar inn allskonar myndir! Eins og gefur að skilja verandi á þessum stað, við matarkistu Miðjarðarhafsins var maturinn í ferðinni allri einstaklega góður. Einföld og framúrskarandi hráefni sem fengu ávalt njóta sín í hverjum rétti og allt bara eitthvað svo gott að það lá stundum við tárum hjá undirritaðri. Félagsskapurinn, umhverfið og sólin hafa mjög sennilega haft sitt að segja líka.

Uppskriftin sem fylgir að þessu sinni er ef til vill ekki sú sumarlegasta. Mér finnst svona góðgæti þó alltaf eiga við. Það er meira að segja nokkuð sniðugt að elda svona mat þegar manni langar helst að vera úti að leika og á meðan malla leggirnir án afskipta. Ég mæli hiklaust með þessu rétti sem er einn af mínum allra uppáhalds.

Hægeldaðir lambaleggir í rauðvínssósu (fyrir 3-4)

• 4 vænir lambaleggir (350-400 gr stykkið)
• 2 laukar
• 1 stór gulrót
• 2-4 hvítlauksrif
• 2 msk tómatpurré
• 3 dl rauðvín
• 6 dl vatn
• 2 msk nautakraftur (Ég nota fljótandi Oscar kraft)
• 1 msk fersk rósmarín, gróft saxað (eða 1 tsk þurrkað)
• 3 þurrkuð lárviðarlauf
• Smjör, sjávarsalt og svartur pipar

Aðferð: Hitið ofn í 160 gráður. Kryddið kjötið vel með salti og pipar. Takið stóran pott, sem má fara í ofn og hitið á meðalháum hita á eldavél. Bræðið 1 msk af smjöri í pottinum, brúnið kjötið vel á öllum hliðum og takið það svo uppúr pottinu. Skerið grænmetið í frekar grófa teninga. Bræðið 1 msk í viðbót af smjöri í pottinum og steikið grænmetið þar til það mýkist aðeins. Setjið tómatpurré út í og steikið áfram. Hellið rauðvíninu yfir og skrapið vel botninn á pottinum. Leyfið að sjóða í 1 mínútu.

Hellið vatninu og kraftinum saman við. Setjið kjötið út í pottinn og setjið lok ofan á þannig að það sé örlítil rifa til að sleppa gufunni út. Hleypið suðunni upp og setjið svo inn í ofn í 90 mínútur. Takið þá lokið af pottinum, hækkið hitann í 200 gráður og leyfið að bakast áfram í 20 mínútur. Takið úr ofninum. Veiðið kjötbitana upp úr og geymið undir álpappír. Setjið pottinn á eldavélina, kveikið undir á háum hita og sjóðið sósuna niður þangað til að sósan er um það bil helmingi minni en var í upphafi eldunar.

Ef ykkur finnst sósan of þunn má þykkja hana með smá sósujafnara eða 2 tsk af hveiti stöppuðu saman við 1 msk af mjúku smjöri, pískað saman við sósuna á meðan hún sýður. Berið lambaleggina fram með góðri kartöflumús.

Það er svo sannarlega oftar við hæfi en bara á jólum að baka smákökur. Svo verð ég að viðurkenna að súkkulaði er minn veikleiki þegar kemur að bakstri. Dásamlegra hráefni er varla hægt að finna. Þessar ljúffengu kökur fá að fylgja okkur fjölskyldunni í bústað um helgina, sitja núna þægar og góðar ofan í boxi og bíða eftir fari í sveitina. Það er einmitt svo upplagt að baka smákökur fyrir ferðalög, útilegur eða lautarferðir (eru ekki einmitt allir á fullu að plana lautarferðir núna??..) – Njótið helgarinnar kæru vinir. Dálítið súkkulaði gerir allt betra.

Himneskar Brownie smákökur (um 14 frekar stórar kökur)

• 250 gr súkkulaði (dökkt eða suðusúkkulaði) + 100 gr saxað súkkulaði (má líka sleppa)
• 60 gr íslenskt smjör
• 2 egg
• 100 gr púðursykur
• 1 tsk vanilludropar
• 50 gr hveiti
• 1/2 tsk lyftiduft (ég nota alltaf vínsteins)
• 1/4 tsk salt

Aðferð: Byrjið á að bræða saman smjör og 250 gr súkkulaði við vægan hita. Setjið egg, sykur og vanillu í skál og pískið aðeins saman. Hellið súkkulaðiblöndunni saman við og blandið vel saman. Hrærið þurrefnunum að síðustu saman við ásamt söxuðu súkkulaði ef þið notið það. Setjið skálina inn í ísskáp í 20-30 mínútur þannig að deigið stífni aðeins. Hitið ofninn í 180 gráður á meðan. Setjið um 1 msk af deiginu á bökunarpappírsklædda plötu og bakið í um 9-10 mínútur eða þar til kökurnar eru bakaðar í köntunum og enn blautar í miðjunni. Látið kökurnar kólna alveg á plötunni og takið þær svo af. Geymast vel í loftþéttu boxi í ísskáp, má líka frysta.