Eldhúsperlur

Ég ætlaði að byrja þennan pistil á: ”svei mér þá ef það á ekki bara að fara að skína sól á okkur um helgina”.. Svo álpaðist ég til að opna vedur.is og þar stóð sannleikurinn blákaldur og ósykurhúðaður. En mér er alveg sama enda ekki vön að láta veður fara í skapið á mér.. svona oftast allavega. Ég bauð foreldrum mínum í mat í vikunni, nánar tiltekið á þriðjudaginn, í þriðjudagslægðinni. Þá var ætlunin að grilla þessi gómsætu kjúklingalæri og var sú ákvörðun tekin áður en sumarblómin mín tóku á flug og dúkurinn á borðinu fauk af. Þá var plani B hleypt á stokkana og bakarofninn fékk þann heiður að baka herlegheitin. Það var alls ekki síðra. Svo þið getið annað hvort grillað lærin eða bakað þau eins og ég gerði. Galdurinn er bara að maka reglulega á þau þessari himnesku barbecue sósu svo þau verði klístruð og bragðmikil. 

Bragðmikil barbecue kjúklingalæri (fyrir 4-5):

• 1 kg úrbeinuð kjúklingalæri (líka hægt að nota læri með beini)
• 3 dl góð bbq sósa
• 1 dl apríkósumarmelaði
• 2 msk soja sósa
• 1 hvítlauksrif rifið eða smátt saxað
• 1 msk smátt saxað eða rifið engifer
• 1 sítróna, skorin í báta

Aðferð: Hrærið saman bbq sósu, apríkósusultu, soja sósu, hvítlauk og engifer og hellið helmingnum yfir kjúklingalærin. Látið marinerast a.m.k í 30 mínútur í ísskáp. Hitið ofn í 220 gráður. Raðið lærunum á pappírsklædda bökunarplötu, stingið sítrónubátunum hér og þar og bakið í 10 mínútur. Takið þá út og penslið lærin með meira af barbecue sósunni og bakið aftur í um 8 mínútur. Takið þá aftur út, penslið meira af sósunni á og bakið áfram í um 8 mínútur eða þar til lærin eru elduð í gegn. Hækkið hitann eins hátt og ofninn ykkar kemst eða setjið grillið á síðustu mínuturnar til að sósan karameliserist á lærunum. Berið fram t.d með salati, kúskús og kaldri hvítlaukssósu. 

Ég þori varla að segja það upphátt en stundum, bara stundum kann ég alveg ágætlega við svona rigningardaga eins og eru framundan. Nei ég vill nú ekki hafa rigningu allt sumarið, en þegar spáð er krassandi lægð eins og núna hugsa ég mér gott til glóðarinnar hvað kósýheit varðar. Við Gunnar höfum viðað að okkur úrvali barnabóka frá bókasafninu og hlökkum bara svolítið til að kúra saman undir teppi og kíkja í bækur og horfa á teiknimyndir eftir langa og blauta skóladaga hjá þeim stutta. Eitt af því besta sem Gunnar veit eru möffins, eða bollakökur ýmiskonar. Það var því ekki úr vegi að hræra í þessar dásamlegu banana muffins til að eiga fyrir komandi rigningardaga. Kökurnar eru einstaklega mjúkar og alveg hættulega góðar. Svo tekur enga stund að búa þær til. Ekki hræðast brúnaða smjörið, það gerir alltaf gott jafnvel enn betra og passar svo sannarlega vel við þessar kökur. Gunnar lýsti því yfir að þetta væru bestu muffins sem hann hefði nokkurn tímann smakkað.

Ég nota alltaf sérstök bollaköku álform þegar ég baka muffins eða bollakökur. Þau fást til dæmis í versluninni Allt í köku, Ikea og örugglega mörgum öðrum stöðum. Svona deig eins og fer í þessar kökur og flestar bollakökur sem ég hef sett inn á síðuna er frekar þunnt og hentar alls ekki vel í pappírsform eingöngu, heldur þarf örlítið meiri stuðning. Ef þið notið bara pappírsform verða kökurnar allavega ekki svona háar og fínar og gætu lekið út.

Banana muffins með brúnuðu smjöri (12 kökur, bollamálið mitt er 2.5 dl):

• 4 dl spelt eða hveiti (ég notaði fínt og gróft spelt til helminga)
• 1/2 tsk matarsódi
• 1 tsk lyftiduft
• 1/4 tsk salt
• 1 1/2 dl hrásykur
• 125 gr smjör, brætt og brúnað sjá leiðbeiningar hér
• 4 bananar, stappaðir
• 2 egg
• 2 tsk vanilluextract
• 1 dl dökkir súkkulaðidropar eða saxað súkkulaði

Aðferð: Hitið ofn í 160 gráður með blæstri, annars 180 gráður. Hrærið öllum þurrefnunum saman í skál. Brúnið smjörið og stappið bananana og bætið því ásamt eggjum og vanillu saman við þurrefnin ásamt súkkulaðinu. Hrærið þar til rétt svo komið saman. Alls ekki hræra of lengi. Skiptið í 12 pappírsklædd bollakökuform og bakið í um það bil 25 mínútur. 

Sumarið sem ég varð 18 ára fór ég til Malaga á Spáni og var þar í mánuð í spænskuskóla. Þetta var sannarlega einhver skemmtilegasti mánuður ævi minnar og þvílík upplifun fyrir 17 ára unglingsstelpu að fara alein langt í burtu frá öllum og það fyrir tíma Facebook og Skype. Skólinn var dásamlegur í fallegu úthverfi Malaga borgar og þar kynntist ég í fyrsta skipti alvöru andalúsískri paellu og gazpacho.. og flamenco dansi og nautaati og San Miguel en það er önnur saga. Paellan heillaði mig aldrei neitt sérstaklega, þannig lagað, en ég hef allar götur síðan verið afar hrifin af gazpacho, sem er í raun bara köld súpa. Það er fátt eins frískandi í 30 stiga hita en ísköld og bragðmikil gazpaco og merkilegt nokk þá er hún bara alveg ágæt líka í 15 stiga hita á Íslandi. Ég hef ekki getað hætt að hugsa um þessa vatnsmelónu gazpacho síðan ég sá hana í uppskriftatímariti um daginn. Svo gerði ég hana um daginn, við borðuðum hana í sólinni á pallinum og nú get ég aftur ekki hætt að hugsa um hana. Hún skoraði fullt hús stiga hjá okkur, svo fersk, létt og bragðgóð, fullkominn forréttur á undan grillmat til dæmis. Þarna sannast líka enn og aftur hið margkveðna, hvað einfalt er oftast langbest, í matargerð sem og öðru. Ég mun gera þessa aftur og aftur.

Vatnsmelónu gazpacho fyrir 4 (örlítið breytt uppskrift úr FoodNetwork Magazine):

• 2 bollar vatnsmelóna, afhýdd og skorin í litla bita
• 2 eldrauðir vel þroskaðir tómatar
• 1/4 bolli góð jómfrúar ólífuolía
• 1/2 agúrka, fræhreinsuð
• 1/2 grænn eða rauður chillipipar, fræhreinsaður ef þið viljið ekki sterka súpu
• 2 msk smátt saxaður rauðlaukur (og aðeins meira til að strá yfir)
• 2 tsk rauðvínsedik
• Sjávarsalt og nýmalaðurr pipar
• 4 msk fetaostur í vatni
• Smávegis af graslauk og steinselju, smátt saxað (líka hægt að nota aðrar ferskar kryddjurtir, t.d dill)

Aðferð: Setjið einn og hálfan bolla af saxaðri vatnsmelónu og tómatana í blandara og þeytið þar vel maukað. Bætið út í ólífuolíu, agúrku, chillipipar, rauðlauk, rauðvínsediki, salti og pipar (ég notaði alveg 1 tsk af grófu Saltverk sjávarsalti). Blandið þessu vel saman þar til silkimjúkt. Smakkið til með salti, pipar og rauðvínsediki. Hellið í könnu eða skál og kælið í a.m.k 30 mínútur. Hellið súpunni í bolla eða litlar skálar. Toppið með restinni af vatnsmelónunni, fetaosti, smátt söxuðum rauðlauk, graslauk, steinselju eða dilli. Berið fram strax, ískalt.