Archives for febrúar 2013

Brokkolíbaka með geitaosti

febrúar 27, 2013 by helenagunnarsd 2 Comments

Að gera böku getur verið góð skemmtun. Ég segi það aftur eins og við síðustu böku að bökur hafa ekki átt sérstaklega mikið erindi upp á mín eldhúsborð hingað til. Það er tilhugsunin um að gera flókið bökudeig og standa við að fletja það út með tilheyrandi hveitistráningu sem forðaði mér frá þessari iðju. Þetta er allavega ekki iðja sem ég myndi kjósa að gera á virkum degi þegar kvöldmatur þarf að vera kominn á borðið helst undir 30 mínútum. Engu að síður finnast mér bökur alveg einstaklega góður matur og þá sérstaklega grænmetisbökur.

Maður fær einmitt oft svo góðar bökur á hinum mörgu góðu grænmetisstöðum borgarinnar. Innblásturinn að þessari böku er einmitt komin frá einum slíkum þar sem ég fékk alveg einstaklega góða brokkolíböku um daginn og ég varð að búa til eitthvað svipað heima. Geitaosturinn gefur þessari böku alveg rosalega gott bragð og smá svona spari stemmingu. Honum má þó vel sleppa, eða nota t.d fetaost eða rjómaost í staðinn. Þetta er sama bökudeig og ég notaði í fyrrnefnda tómata- og spínatböku. Það er mjög einfalt að gera og þarf ekkert að fletja út.

Bökubotn:

200 grömm gróft spelt eða heilhveiti
Salt á hnífsoddi og smá pipar
80 grömm smjör, skorið í litla teninga
1/2 dl heitt vatn (kannski minna, setjið smátt og smátt saman við)

Aðferð: Ofn hitaður í 180 gráður með blæstri. Allt innihaldið í bökubotninn sett í skál og unnið saman með höndunum. Þegar það er komið saman er því þrýst í botninn og aðeins upp með hliðunum á eldföstu móti eða lausbotna bökuformi. Pikkað með gaffli hér og þar. Þetta er svo bakað í 10 mínútur. Tekið úr ofninum og hitinn lækkaður í um 160-170 gráður. Fer svolítið eftir hita á ofnum. Ég hef minn á 160 gráðum með blæstri.

Fylling:

350 grömm brokkolí, skorið í fremur smáa bita
2 vorlaukar smátt saxaðir
5 egg
2,5 dl matreiðslurjómi eða 1 peli kaffirjómi
1 poki gratínostur
1 tsk sjávarsalt
1/2 tsk pipar
1 msk dijon sinnep
1/4 tsk muldar chilliflögur (red chilli flakes)
50 gr geitaostur (má sleppa)

Aðferð: Byrjið á að sjóða vatn með dálitlu salti í meðalstórum potti. Skerið brokkolíið niður og setjið út í sjóðandi vatnið og sjóðið í um 3 mínútur. Hellið þá vatninu af og látið ískalt vatn buna á brokkolíið þannig að það snöggkólni. Sigtið vatnið frá, þerrið brokkolíið aðeins og setjið það svo í bökubotninn. Með þessari aðferð helst brokkolíið fallega grænt. Stráið svo söxuðum vorlauknum jafnt yfir bökubotninn.

Hrærið saman eggin, matreiðslurjóma, gratínost, salt, pipar, dijon sinnep og chilli flögur. Hellið yfir brokkolíið. Dreifið því næst geitaostinum jafnt yfir bökuna með teskeið. Bakið í 35 mínútur. Leyfið bökunni að kólna í um 10 mínútur áður en hún skorin.

Ristaðar hnetur og möndlur með rósmarín kryddblöndu

febrúar 25, 2013 by helenagunnarsd Leave a Comment

Það er fátt eins huggulegt á góðu föstudagskvöldi en að fá nokkrar íðilfagrar og að ég tali nú ekki um skemmtilegar skvísur í eilítinn hvítvínsdreitil og spjall. Mér finnst um að gera að nota tækifærið þegar ég á vona á svona ánægjulegum heimsóknum að bjóða upp á eitthvað einfalt og gómsætt sem gott er að narta á meðan maður dreypir á góðu hvítvíni.. eða bara sódavatni.Ég bauð einmitt upp á þessar rósmarín ristuðu hnetur og möndlur um daginn á svona ”málfundi” ásamt smá ostum og svo auðvitað bollakökunum. Hneturnar eru virkilega einfaldar og góðar og það er hægt að nota hvaða hnetur sem er. Ég gæti alveg ímyndað mér að valhnetukjarnar og pekanhnetur kæmu líka vel út. Þetta er alveg passlega sætt/sterkt/salt með ljúfum rósmarínkeim og alveg upplagt til að gæða sér á með glasi af léttu víni, bjór eða kokteil.

Ristaðar hnetur og möndlur með rósmarín: (Breytt uppskrift frá Inu Garten)

450 grömm hnetur (ég notaði cashew hnetur og möndlur)
2 msk saxað ferskt rósmarín
2 tsk gróft sjávarsalt (t.d Maldon eða Saltverk)
2 tsk púðursykur
1/2 tsk cayenne pipar
2 msk smjörAðferð: Ristið hneturnar og möndlurnar við miðlungshita þar til þið finnið góðan hnetuilm og hneturnar eru aðeins farnar að brúnast. Þetta er ekki gott að gera við háan hita því þá er hætta á að hneturnar brenni að utan og séu enn kaldar í miðjunni. Það viljum við ekki. Þegar hneturnar höfðu ristast tók ég pönnuna af hitanum og bjó til smá pláss á miðri pönnunni og setti strax 2 msk af smjöri á miðja pönnuna. Þegar það hafði bráðnað setti ég kryddin út í smjörið. Þá er öllu blandað vel saman þar til kryddin þekja hneturnar og þær verða gljáandi. Borið fram volgt eða stofuheitt.

Súkkulaði bollakökur með vanillusmjörkremi

febrúar 23, 2013 by helenagunnarsd 5 Comments

Ég er ekki þolinmóðasta týpan þegar kemur að bakstri. Tilhugsunin um að standa svo tímunum skiptir við að skreyta kökur, hnoða sykurmassa, skera út blóm og búa til kökur sem líta út eins og Versalakastalar, heillar mig ekki sérstaklega. Ég hef þó gaman að því að baka, ekki misskilja mig. Hef meira að segja vippað fram oftar en einu sinni kökum í afmæli sonar míns sem litu út eins og geimflaug og annarri sem leit út eins og lirfa. Það var mjög krúttlegt og skemmtilegt en tók samt ekki langan tíma í framkvæmd. Reyndin er nú líka sú að þó að kaka líti fallega út skiptir nú eiginlega mestu máli að hún sé bragðgóð. En mikið dáist ég að öllu fólkinu sem nennir að búa til þessi fallegu kökulistaverk fyrir okkur hin sem hafa ekki þolinmæðina í verkið.

Bollakökur eru einmitt þeim kosti gæddar að það þarf tiltölulega litla fyrirhöfn við að baka þær. Það er einnig frekar einfalt að skreyta þær þannig að allir haldi að maður sé mjög flinkur kökuskreytingarmeistari þegar maður kann samt eiginlega ekki neitt í kökuskreytingum. Ég fór í búðina Allt í köku fyrr í vetur og keypti mér nokkra hluti sem gera manni lífið auðveldara þegar kemur að því að skreyta bollakökur. Það þarf alls ekki mikinn búnað. Ég fékk mér nokkra einnota sprautupoka og einn stút númer 2D. Vopnuð þessu voru mér allir vegir færir og ekkert mál að búa til fallegar rósir á bollakökurnar.

Ég gef uppskrift að þessum ljúffengu súkkulaðibollakökum. Botninn er dökkur með miklu súkkulaðibragði, léttur í sér og alls ekki of sætur. Ofan á set ég ekta vanillusmjörkrem. Klassísk samsetning sem getur ekki klikkað.

Súkkulaðibollakökur: (um 30 stk, auðveldlega hægt að helminga uppskriftina) Breytt uppskrift frá marthastewart.com.

3/4 bolli kakóduft
3/4 bolli sjóðandi heitt vatn
300 gr. mjúkt smjör
2 bollar sykur
1 msk vanilluextract
4 egg
3 bollar hveiti eða fínmalað spelt (ég notaði speltið)
1 tsk matarsódi
1 tsk lyftiduft
1/2 tsk salt
1 bolli sýrður rjómi

Vanillusmjörkrem:

300 grömm smjör
400 grömm flórsykur
1 tsk vanilluextract
1 vanillustöng

Aðferð: Hitið ofninn í 170 gráður með blæstri. Byrjið á að blanda saman kakóduftinu og heita vatninu. Hrærið vel þar til áferðin verður slétt. Setjið til hliðar og leyfið aðeins að kólna. Setjið smjör, sykur og vanillu í hrærivélaskál og þeytið vel þar til smjörið verður ljóst og létt. Setjið eggin út í eitt í einu og hrærið vel á milli. Hellið þá kakóblöndunni út í og blandið vel saman. Blandið saman hveiti, lyfitdufti, matarsóda og salti og setjið út í hrærivélaskálina í smáum skömmtun ásamt sýrða rjómanum. Setjið í pappírsklædd bollakökuform þannig að formið fyllist að 3/4. Bakið í 18-20 mínútur. Kökurnar lyfta sér en síga örlítið saman þegar þær koma úr ofninum. Þær eru því alveg upplagðar til skreytinga.

Smjörkrem: Setjið smjörið í hrærivélaskál og þeytið á mesta hraða í 5 mínútur. Málið við þetta krem er að þeyta smjörið nógu lengi þar til það verður nánast alveg hvítt. Það þarf smá þolinmæði í þetta en það gerist á endanum. Þá er flórsykrinum, vanilluextractinu og kornunum úr einni vanillustöng bætt út í og þeytt vel saman í um 2 mínútur til viðbótar. Kremið verður mjög létt og meðfærilegt við þessa meðferð og haggast ekki eftir að því hefur verið sprautað á kökurnar. Þegar bollakökurnar hafa kólnað er kreminu sprautað á þær.

Ef gera á rósir er galdurinn að byrja rósina með því að sprauta beint niður á bollakökuna miðja og fara svo 2-3 hringi og enda yst á brúninni. Það eru örugglega til meiri rósasmjörkremssnillingar þarna úti en ég, en þetta þarf nú ekki að vera fullkomið. Ég get allavega lofað að bragðið er dásamlegt sama hvernig útlitið er

Kjötbollur í mildri chilli rjómasósu

febrúar 21, 2013 by helenagunnarsd 5 Comments

Ég er búin að vera með þennann rétt á heilanum síðan við komum heim úr sólinni á Tenerife og hef eiginlega ekki komist í almennilega ró fyrr en bara núna eftir að hafa eldað hann. Að koma úr 25 stiga hita og sól í 1 gráðu og Suðaustan sjö kallar á eitthvað eitthvað heitt og gott að borða, svona ekta spari þægindamat. Þetta er hugsanlega einn mesti þægindamaturinn hérna á síðunni og er liggur við of einfaldur til að gefa uppskrift af. Hann er líka þeim mun ljúffengari og upplagður þegar maður vill gera vel við sig og sína, jafnt fullorðna sem börn án mikillar fyrirhafnar. Enda enginn hollusturéttur, þetta er sko rjómasósa gott fólk! Þetta er ein af þeim sósum sem er ekki hægt að gera of mikið af því hún hverfur jafn harðan ofan í mannskapinn.

Það var því ekkert annað að gera en að bjóða nokkrum vel völdum í mat og gera réttinn. Ég fékk þennan rétt í fyrsta skiptið í matarboði hjá góðu fólki fyrir nokkuð löngu síðan og fékk uppskriftina á munnlegu formi svona eiginlega í dyragættinni á leiðinni út. Hef verið á leiðinni að elda hann síðan en ekki alveg vitað nákvæmlega hvað var í honum. Ég gerði því bara mína útgáfu sem var byggð á grunn upplýsingum frá eðal kokknum sem ég smakkaði hann hjá fyrst.

Myndirnar hefðu vel mátt verða fleiri og betri en gestirnir voru komnir og græðgin of mikil fyrir langar myndatökur. Ég mæli hins vegar óhikað með þessum rétti, ekki láta myndaleysi gabba ykkur 🙂

Kjötbollur í chilli rjómasósu (fyrir 6 fullorðna):

Kjötbollur

2 bakkar (1kg) ungnautahakk
1 pakki púrrulaukssúpa
1 pakki Tuc kex, mulið smátt
1 egg
1 tsk nýmalaður svartur pipar

Aðferð: Öllu blandað vel saman, ég set allt innihaldið í hrærivélaskál og læt vélina um erfiðið. Þegar allt er komið saman mótið bollur á stærð við golfkúlur úr hakkinu. Hitið örlitla olíu á pönnu og brúnið bollurnar við frekar háan hita. Færið þær svo yfir í stórt eldfast mót en hellið frá umfram fitunni sem kemur á pönnuna.

Sósan:

3,5 dl rjómi
1 flaska Heinz chilli sósa
1 tsk karrý

Ofaná

1 rauð paprika
1 tsk hunang

Aðferð: Létt þeytið rjómann í skál. Blandið chilli sósunni og karrýinu saman við með sleif og hellið sósunni jafnt yfir bollurnar í eldfasta mótinu. Sneiðið paprikuna þá í frekar mjóa strimla og steikið á vel heitri pönnu. Þegar strimlarnir eru orðnir dálítið vel steiktir setjið þá hunangið á pönnuna þannig að paprikustrimlarnir verði vel hunangsgljáðir. Hellið yfir kjötbollurnar og sósuna og bakið í við 180 gráðu í 20 mínútur. Ég bar réttinn fram með taglietelle og góðu grænu salati.

Kjúklingur í satay sósu

febrúar 20, 2013 by helenagunnarsd 2 Comments

Ég er búin að vera í hálfgerðu sólarmóki síðan við komum heim frá Tenerife. Ferðin var alveg fullkomin í alla staði, sól og hiti alla daga og auðvitað bara eintóm huggulegheit. Eftir svona gott frí getur nú tekið smá tíma að koma sér af stað aftur og þrátt fyrir mikla löngun í góðan mat eftir heimkomuna hefur nennan ekki verið mikil í eldhúsinu. Er nú samt alveg búin að vera að elda mat en fljótlegheit hafa svolítið einkennt kvöldmatinn síðan við komum heim.

Ég skellti í þennann ljúffenga satay kjúklingarétt í gær. Ef hráefnið er til er sennilega fljótlegra að elda hann heldur en að keyra á næsta tælenska stað og kaupa eitthvað tilbúið. Sannarlega mætti notast við heimalagaða satay sósu í þessum rétti en ég var ekki á þeim buxunum í gær allavega, mér finnst líka fínt að kaupa tilbúna og bragðbæta hana aðeins. Við vorum mjög ánægð með útkomuna, stórir sem smáir og munum sannarlega elda þennan rétt aftur.

Kjúklingur í satay sósu (fyrir 3-4):

3 kjúklingabringur, hver bringa skorin í þrennt eftir endilöngu
1 msk sojasósa
1 krukka satay sósa (ég notaði Blue Dragon)
1 ferna kókosmjólk (eða 1/2 dós)
1 dl vatn
1 msk rifið eða smátt saxað engifer
3 vorlaukar smátt saxaðir
1 límóna
Smátt saxaður chilli pipar (má sleppa)

Aðferð: Skerið kjúklingabringurnar niður og veltið upp úr sojasósunni. Steikið kjúklingastrimlana á pönnu á báðum hliðum og takið svo af pönnunni. Hellið satay sósunni, kókosmjólkinni, vatninu og engifer á pönnuna og látið suðuna koma upp. Smakkið til með sojasósu, nýmöluðum pipar og safa úr 1/2 límónu. Setjið kjúklingastrimlana út í og látið malla þar til kjötið er eldað í gegn. Berið fram með límónubátum, söxuðum vorlauk og chillipipar og basmati hrísgrjónum.

Fylltar heimatilbúnar tacoskeljar

febrúar 7, 2013 by helenagunnarsd Leave a Comment

Við á heimilinu erum voða hrifin af mexíkóskum mat og kannski reyndar bara flestum mat ef því er að skipta.. Ég prófaði að gera þessar heimatilbúnu skeljar fyrir nokkru síðan og það er ekki hægt að líkja þeim við litlu tilbúnu taco skeljarnar sem fást í búðunum. Það er því alveg þess virði að dunda sér við að steikja sínar eigin skeljar og færa tacoveisluna upp á örlítið hærra plan.

Ég kaupi tilbúnar tortillakökur sem ég steiki upp úr olíu og sveigji saman þannig að þær myndi tacoskel, hljómar kannski flókið en er mjög einfalt! Það væri sennilega hægt að taka þetta alla leið og búa til sínar eigin tortillur frá grunni til að steikja en svona á venjulegum virkum degi er það nú kannski til of mikils mælst. Fyllingin sem ég notaði í þetta skiptið var mjög einföld en hrikalega góð, mér finnst oft betra að vera ekki með of mörg hráefni í gangi í einu og leyfa hverju fyrir sig að njóta sín.

Tacoskeljar:

1 pakki tortilla kökur (ég notaði 8 litlar maís tortillur)
Olía til steikingar

Setjið olíu á pönnu þannig að hún þeki vel botninn á pönnunni og nái um 0.5 cm upp á kantana. Hitið olíuna og steikið eina tortilla köku í einu. Byrjið að steikja á annarri hliðinni, snúið henni svo við og beygið eins og tacoskel og steikið báðum megin þar til kakan er gyllt. Það er mjög gott að nota góða töng við þessa iðju, en tveir gafflar duga líka. Leggið skelina svo á eldhúspappír.

Það er gott að vera með lítið glas til að leggja inn í kökuna þar sem hún harðnar ekki fyrr en hún kólnar, svo hún leggist ekki saman. Gerið þetta við allar kökurnar. Leggið þær síðan hverja inn í aðra, tvær og tvær saman og setjið í 120 gráðu heitan ofn í 15 mínútur eða þar til þær eru alveg stökkar. Á meðan getið þið undirbúið fyllinguna.

Fylling

600 grömm ungnautahakk
1/2 krukka mild salsasósa
2 tsk tómatpaste
1 tsk hunang eða önnur sæta
Salt, pipar og reykt paprikuduft
1 dl vatn

Kjötið brúnað á pönnu. Kryddað með salti, pipar og reyktri papriku. Salsasósu, hunangi, tómatpaste og vatni bætt út á. Látið malla í 10 mínútur við meðalhita þar til sósan þykknar.

Ofaná:

Græn salatblöð, smátt söxuð
1/2 askja Kirsuberjatómatar, skornir í tvennt
3-4 Vorlaukur, smátt saxaður
Rifinn cheddar ostur og Óðals ostur
Sýrður rjómi

Setjið kjötið neðst í tacoskelina, laukinn þar ofaná, því næst salatið, tómatana og ostinn efst. Toppið með smá sýrðum rjóma og njótið með nóg af eldhúspappír við hendina þar sem þetta er ekki snyrtilegasti matur sem hægt að borða. En líka þeim mun betri !

Gómsætir gleðibitar með döðlukaramellu..

febrúar 6, 2013 by helenagunnarsd 2 Comments

Ég rakst á þessa uppskrift fyrir nokkru síðan og hef svona meira og minna verið með hana á heilanum síðan. Og Guð minn góður þar var ekki að ástæðulausu, þessir litlu bitar eru himneskir. Stökkur botninn, mjúk döðlukaramellumiðja og súkkulaði ofan á allt saman. Auðvitað er þetta ekkert Twix, ég veit það vel en sú sem ég fékk hugmyndina frá kallar þetta heimatilbúið Twix og hún flokkar þetta undir vegan.

Hugmyndin er upphaflega komin frá síðu sem heitir Oh She Glows og er matarblogg sem fjallar um vegan mataræði. Fólk sem kýs vegan mataræði sneiðir ekki eingöngu hjá kjöti og fiski heldur sleppir það öllum afurðum úr dýraríkinu þ.m.t öllum mjólkurafurðum og eggjum. Ég hef stundum skoðað uppskriftir sem flokkast sem vegan (veit ekki íslenska orðið yfir þetta?) og það er oft margt sniðugt í gangi þar. Til dæmis ýmsar uppskriftir að svona agalega girnilegu sælgæti sem tekur frekar stuttan tíma að gera og þarfnast oft ekki baksturs. Maður þarf hinsvegar oftast að vera vopnaður töfrasprota, blandara eða matvinnsluvél og þá eru manni allir vegir færir.

Þó þetta nammi flokkist upphaflega sem vegan myndi ég ekki kalla þetta hollustufæði. Þetta er nammi og alveg hrikalega gott nammi. En það býr yfir þeim kosti að við vitum svona nokkurn veginn alveg hvaða hráefni það inniheldur. Ég notaði hnetusmjör í það en það væri ekki úr vegi að nota t.d möndlusmjör í staðin ef um hnetuofnæmi er að ræða. Bitana er best að geyma í ísskáp eða frysti.

Heimatilbúið Twix með döðlukaramellu

Botninn:

2 1/2 bolli Rice Crispies eða annað blásið hrísmorgunkorn
4 msk agave sýróp
2 msk hunang
2 msk hreint hnetusmjör
1 tsk vanilluextraxt
Salt á hnífsoddi

Setjið bökunarpappír í form sem er ca. 20 x 30 cm (skúffukökustærð), leyfið pappírnum að ná upp með hliðunum. Allt nema rice crispies sett í pott og brætt saman við vægan hita þar til suðan kemur upp. Þá er þetta tekið af hitanum og rice crispies bætt út í. Hrært vel þar til þetta loðir saman. Hellið í formið með bökunarpappírnum og sléttið úr með rökum höndum þar til þetta fyllir út í formið. Ágætt að stinga lófunum af og til undir kalda vatnið til að sporna við klístri. Stingið botninum inn í frysti meðan karamellan er útbúin.

Döðlukaramella:

450 gr steinalausar döðlur
2 msk hreint hnetusmjör
2 msk möndlumjólk eða vatn til að þynna karamelluna

Setjið döðlurnar í skál og hellið sjóðandi heitu vatni yfir til að mýkja þær. Leyfið þessu að standa í ca. 10 mínútur. Hellið þá vatninu frá og setjið döðlurnar í matvinnsluvél ásamt hnetusmjörinu og vökvanum. Vinnið saman þar til fínt mauk myndast sem er þó vel þykkt. Þetta væri líka hægt að gera með töfrasprota. Takið botninn úr frystinum og dreifið karamellunni jafnt yfir. Setjið aftur í frystinn á meðan súkkulaðið er brætt.

Ofaná:

1 poki Siríus Konsum súkkulaðidropar (150 grömm)
1 tsk kókosolía (má sleppa)

Brætt og hellt ofan á döðlukaramelluna. Sett aftur í frystinn og kælt þar til súkkulaðið er hart, a.m.k 30 mínútur. Skorið í litla bita. Best að geyma í frysti eða ísskáp. Gómsætir litlir gleðibitar 🙂 Verði ykkur að góðu!

Rómverskur kjúklingaréttur með hráskinku

febrúar 5, 2013 by helenagunnarsd Leave a Comment

Ég tek eftir því þegar ég renni gegnum uppskriftirnar hér inni að oftar en ekki innihalda þær tómata, í einhverskonar formi. Þetta fer næstum því að vera vandræðalegt hversu mikið ég nota þá, bæði ferska og eins niðursoðna. En vitið þið ekki hvað tómatar eru hollir? (þetta er samt ekki neitt sérstakt heilsumatarblogg, höfum það alveg á hreinu) Fyrir utan það hvað þeir eru góðir. Eða það finnst mér að minnsta kosti og fjölskyldunni greinilega líka. Ég á alltaf til tómata, það er eitt af því sem ég verð alltaf að eiga. Ég ætla þó að reyna að koma líka einhverntímann inn með uppskriftir sem innihalda ekki tómata.. sjáum hvernig það tekst til.

Þessi uppskrift inniheldur líka tómata. Jú jú, og það eina krukku af góðum niðursoðnum lífrænum tómötum. Það er líka hægt að nota dósatómata í staðin og hefur mér reynst vel að kaupa niðursoðnu Euroshopper tómatana, finnast þeir oftast mjög rauðir og góðir enda koma þeir beint frá Ítalíu og innihalda fremur lítið af aukaefnum eins og sykri og salti. En ef ég er að bruðla vel ég alltaf þessa lífrænu í glerkrukkunum. Þeir eru voða góðir. Kjúklingarétturinn bragðaðist afar vel og var vel af honum látið af öllum fjölskyldumeðlimum. Sósan er bragðmikil og hráskinkan og capersið gefa réttinum einstaklega gott bragð.

Rómverskur kjúklingur (fyrir 4):

4 Kjúklingabringur
1 rauð paprika
1 gul paprika
1 bréf hráskinka (5-6 sneiðar)
2 dl hvítvín (má sleppa og nota vatn í staðin)
1 krukka hakkaðir tómatar, eða 1 dós + 2 dl vatn
1/2 kjúklingateningur
2-3 msk capers
Ólífuolía, salt og pipar og smávegis söxuð steinselja eða basil

Aðferð:

Ofn hitaður í 180 gráður. Byrjið á að kljúfa kjúklingabringurnar í tvennt á þykktina þannig að úr einni bringu verða tvö frekar þunn stykki. Saltið og piprið bringurnar vel og brúnið á vel heitri pönnu á báðum hliðum. Takið bringurnar af og raðið í eldfast mót. Skerið paprikurnar í þunna strimla og hráskinkuna sömuleiðis. Steikið við frekar háan hita þar til skinkan verður stökk. Þá er víninu (eða vatni) hellt yfir og pannan skröpuð með spaða eða sleifinni svo allt losni af botninum. Soðið niður í um 1 mínútu.

Þá er tómötunum hellt yfir og krukkan svo skoluð að innan með ca. 2 dl af vatni og hellt yfir. Kryddað með pipar og kjúklingakraftinum og leyft að sjóða í 2-3 mínútur, passið að setja ekki of mikið salt þar sem skinkan er ansi sölt. Þá er sósunni hellt yfir bringurnar í eldfasta mótinu og capers að lokum stráð yfir. Bakað í 15-20 mínútur eða þar til kjúklingurinn er eldaður í gegn. Stráið svo saxaðri steinselju yfir réttinn og berið fram með nýbökuðu brauði og sítrónubátum. Það væri sennilega líka gott að hafa hrísgrjón með réttinum þar sem sósan er bragðmikil og góð. Mér finnst hins vegar brauð oft passa betur með svona ítölskum sósum.

Einfaldar kotasælubollur með sesamfræjum

febrúar 3, 2013 by helenagunnarsd 8 Comments

Við erum öll í bollunum þessa dagana. Hingað kom gott fólk í ljómandi notalegt bollu afmæliskaffi í dag og gæddi sér á vatnsdeigsbollum gærdagsins, sem hafði auðvitað verið umbreytt í rjómabollur. Mér fannst nú ekki ganga að bjóða fólkinu eingöngu upp á rjóma og súkkulaði svo ég ákvað að halda mig við bolluþemað og var líka með þessar kotasælubollur á kaffiborðinu. Þær voru virkilega góðar og runnu jafnvel enn hraðar út en systur þeirra með rjómanum.

Það er mjög fljótlegt að skella í svona bollur og ekkert flóknara sem þarf til en skál og sleif og þær þurfa ekkert að lyfta sér. Það er mjög gott að bera fram með þeim t.d osta og niðurskorið grænmeti en einnig finnst mér þær mjög góðar sem meðlæti með súpu.

Kotasælubollur (12 bollur):

5 dl spelt (Ég notaði 2 dl fínt og 3 dl gróft)
3 tsk vínsteinslyftiduft (eða 2 tsk venjulegt lyftiduft)
1 lítil dós kotasæla (u.þ.b 2 dl)
1 dl ab mjólk
2-2,5 dl sjóðandi heitt vatn (Setjið fyrst 1-2 dl og sjáið svo hvort það þurfi meira vatn þar sem mjöl tekur misvel við vökva)
1 msk ólífuolía
1 tsk sjávarsalt
1 dl sesamfræ

Aðferð:

Ofn hitaður í 180 gráður með blæstri. Öllu blandað saman í skál og hrært með sleif þar til rétt blandað saman. Gott getur verið að bæta vatninu smám saman við en ekki öllu í einu. Áferðin á deiginu á að vera eins og þykkur hafragrautur og klístrast við sleifina. Alls ekki hræra lengi.

Búið til 9 stærri eða 12 minni bollur með tveimur matskeiðum og setjið á pappírsklædda bökunarplötu. Ca 1 tsk af sesamfræjum stráð yfir hverja bollu. Þær stækka ekki það mikið að 12 bollur eiga vel að komast fyrir á einni plötu. Bakað í 20 mínútur.

Vatnsdeigsbollur

febrúar 2, 2013 by helenagunnarsd 8 Comments

Það er bara vika í bolludaginn svo ekki ráð nema í tíma sé tekið að fara að æfa sig að baka vatnsdeigsbollur. Við reyndar missum af bolludeginum í næstu viku svo ég ákvað að flýta honum um eina viku og slá afmæli eiginmannsins sem verður eftir helgi, saman við eitt stykki bollukaffi. Enda bolludagur sennilega skemmtilegasti dagur ársins og skandall að taka ekki þátt í þeim hátíðarhöldum sem fylgja því að fá sér eins og eina eða tvær rjómabollur.

Mér þykja heimabakaðar vatnsdeigsbollur alltaf svo langtum betri en keyptar í búð svo ég ákvað að skella í eina tilraunauppskrift í dag. Þær heppnuðust virkilega vel og það er einstaklega auðvelt að baka þessa litlu léttu bollur. Eina sem maður þarf að passa er að opna alls ekki ofninn fyrr en að bökunartímanum liðnum. Bollurnar þarf svo að sjálfsögðu að fylla með rjóma og tilheyrandi. Jarðarberjasulta, þeyttur rjómi og brætt súkkulaði ofan á eru mitt uppáhalds, einfalt og alltaf svo gott.

Vatnsdeigsbollur (ca. 25 stórar bollur eða um 40 smærri):

4 dl vatn
160 gr smjör
250 gr hveiti eða hvítt spelt (ég notaði spelt)
1/4 tsk lyftiduft
6 egg

Aðferð:

Ofn hitaður í 190 gráður með blæstri. Vatnið og smjörið sett í meðalstóran pott. Suðunni hleypt upp og lækkað niður í meðalhita. Þegar smjörið er alveg bráðnað er hveitinu og lyftiduftinu hellt út í og hrært kröftuglega með sleif þar til deigið losnar frá köntunum. Ekki taka pottinn af hitanum fyrr en allt er komið vel saman. Þá er potturinn tekinn af hitanum og mesta hitanum leyft að rjúka úr deiginu, í ca. 10 mínútur.

Mér finnst ágætt að hræra aðeins í deiginu meðan það kólnar og dreifa úr því upp á kantana á pottinum. Svoleiðis gerir mamma það allavega alltaf með góðum árangri. Þá er eggjunum bætt út í einu í einu og hrært vel á milli. (Ef þið eruð sterk og getið hrært lengi með sleifinni er það alveg hægt. Ég hins vegar nota yfirleitt K-hrærarann í hrærivél fyrir þessa vinnu).

Deigið virkar á ákveðnum tímapunkti eins og það ætli að skilja sig og vilji ekki samlagast eggjunum. Það er eðlilegt og verður bara að hræra og hræra þar til allt er komið saman. Þá er deigið sett á tvær pappírsklæddar bökunarplötur með tveimur matskeiðum og bakað í 30-35 mínútur.

Ef þið viljið hafa bollurnar aðeins smærri er gott að nota tvær teskeiðar til að setja deigið á plötuna. Þá eru bollurnar bakaðar í um 25 mínútur. Alls ekki opna ofninn fyrr en að bökunartíma liðnum því annars er hætta á að þær falli. Ef þið viljið extra fínar og sléttar bollur er gott að dýfa fingri í kalt vatn og slétta úr bollunum ofan á með fingrinum og gera þær þannig meira kúlulaga.

Archives for febrúar 2013

Footer