Archives for nóvember 2013

Tíu mínútna máltíð: Tortellini alla puttanesca

nóvember 28, 2013 by helenagunnarsd 1 Comment

Það er ár og dagur eða svona því sem næst, síðan hér hefur verið pasta á borðum. Það var því kærkomin löngun í góðan og bragðmikinn pastarétt sem varð að veruleika á dögunum. Einn af uppáhalds pastaréttunum mínum er pasta alla puttanesca eða pasta gleðikonunnar eins og það þýðir svo skemmtilega á íslensku. Það er eiginlega allt í honum sem mér þykir gott: tómatar, hvítlaukur, chilli, capers, góð ólífuolía, ólífur og parmesan ostur. Ég hef áður birt uppskrift að svona pastarétti hérna á síðunni og það vill svo skemmtilega til að það var ein af fyrstu uppskriftunum og birtist 5. desember í fyrra. Þetta gæti því eitthvað tengst árstímanum þessi löngun mín í bragðmikla pastarétti. Áhugavert ekki satt? En jæja, ég gerði útgáfu af puttanesca tortellini í þetta skiptið og notaði ferskt pasta í réttinn sem gjörsamlega sló í gegn. Eldamennskan tók heldur ekki meira en 10 mínútur, sem hlýtur alltaf að alltaf að vera kostur.

Tortellini alla puttanesca fyrir 4:

500 gr ferskt pasta, t.d tortellini
3 msk góð ólífuolía
1 rauðlaukur smátt skorinn
2-3 hvítlauksrif, rifin eða smátt söxuð
4 vel þroskaðir tómatar, skornir í teninga
1 askja piccolo tómatar eða kirsuberjatómar
3 msk kapers
1 tsk sambal oelek chillimauk eða 1/2 rauður chilli smátt saxaður
Safi úr hálfri sítrónu
1 tsk hunang eða önnur sæta
1-2 msk rjómi (má sleppa)
Salt og pipar
Nýrifinn ferskur parmesan ostur

Aðferð: Hitið olíuna á stórri pönnu og steikið laukinn og hvítlaukinn þar til hann mýkist aðeins. Bætið þá öllum tómötunum út á og hækkið hitann. Látið malla í 5 mínútur og kremjið kirsuberjatómatana aðeins með sleifinni. Bætið kapers, chilli, sítrónusafa, hunangi og rjóma út á og smakkið til með salti og pipar. Sjóðið pastað samkvæmt leiðbeiningum á pakkanum, sigtið og hellið því svo út í sósuna og blandið vel saman. Rífið ferskan parmesan yfir áður en rétturinn er borinn fram.

Hafrakossar

nóvember 26, 2013 by helenagunnarsd 39 Comments

Ó þessir hafrakossar. Þegar Vikan hafði samband við mig og bað mig um að senda inn uppskriftir fyrir matgæðing vikunnar voru þessar dúllur fyrstar að koma upp í hugann. Þetta er svona næstum of gott til að vera satt og getur eiginlega ekki annað en slegið í gegn. Ég fékk hugmyndina að kökunum á síðunni sem bandarísku hjónin Kevin og Amanda halda úti. Þar má oft finna skemmtilegar uppskriftir, fallegar ljósmyndir og hugmyndir að hinu og þessu. Uppskriftirnar á síðunni eiga það hins vegar all flestar sameiginlegt að ekkert er til sparað í smjeri, sykri og öðru fíneríi svo þær flokkast algjörlega undir mat sem fólk ætti ekki að hafa oft á borðum. En maður minn, ef þú vilt gera vel við þig og þína og baka guðdómlegar kökur til að eiga á aðventunni, já þá eru þessar bara málið, ég lofa!

Hafrakossar (Breytt uppskrift frá www.kevinandamanda.com):

250 gr mjúkt smjör við stofuhita
2 dl púðursykur
1 dl sykur
1 egg
2 tsk vanilluexract
3 dl hveiti
1 tsk matarsódi
½ tsk salt
½ tsk kanill
6 dl haframjöl (ath ekki grófir hafrar)

Aðferð:

Hitið ofn í 170 gráður með blæstri. Hrærið saman smjör og sykur þar til létt og ljós. Bætið egginu og vanillu út í og blandið vel saman við.

Hrærið saman hveiti, matarsóda, salti og kanil. Bætið út í smjörblönduna og hrærið létt saman. Bætið höfrunum út í og blandið þar til rétt svo komið saman. Setjið deigið með tveimur teskeiðum á plötu, þrýstið aðeins ofan á hverja köku og bakið í 8-10 mínútur. Kælið á grind.

Krem:

150 gr smjör
250 gr flórsykur
2 msk rjómi
1 tsk vanilluextract

Aðferð: Þeytið allt vel saman og sprautið eða smyrjið á kældar kökurnar og leggið aðra köku ofan á.

Nutella smákökur

nóvember 21, 2013 by helenagunnarsd 1 Comment

Það er alveg með ólíkindum hvað fólk almennt virðist hafa gaman að því að lesa um mat. Ég verð allavega pínulítið feimin þegar ég átta mig á því hversu margir lesa þessa litlu uppskriftasíðu mína sem í byrjun átti aðeins að vera fyrir mig og mína og til að hafa uppskriftirnar allar á einum stað. Mér þykir svo ótrúlega vænt um að þið viljið líta hingað inn og ég tala nú ekki um þegar þið skiljið eftir ykkur spor eða sendið mér línu. Ég hefði aldrei getað ímyndað mér hvað það er gaman að halda úti svona síðu og hvað það gefur mér mikið að geta veitt öðrum innblástur þegar kemur að bakstri og matargerð. Það er svo stutt síðan ég sat hinum megin við borðið, þræddi matarblogg (sem ég geri sannarlega ennþá) og uppskriftasíður og hugsaði um að kannski ætti maður bara að skella saman einu svona bloggi til að koma skikki á uppskriftasafnið.

Í dag, 21. nóvember er heilt ár liðið síðan fyrsta uppskriftin birtist á Eldhúsperlum, gestum hefur jafnt og þétt fjölgað og uppskriftirnar eru orðnar vel á annað hundrað. Undanfarnar vikur hefur heimsóknateljarinn á síðunni hvað eftir annað slegið eigið met og greinilegt að mataráhugi fólks fer ekki dvínandi. í febrúar ákvað ég að stofna Facebook síðu utan um bloggið. Ég setti mér það markmið að ef sú síða myndi ná 1000 ”like-um” fyrir árslok 2013 ætlaði ég halda áfram með hana. Mér fannst einfaldlega eitthvað svo sorgleg tilhugsun að vera með síðu sem næði ekki inn sterkum lesendahópi. Síðan er núna komin yfir 2600 ”like” svo markmiðinu er náð og gott betur. Eins og er get ég ekki hugsað mér að hætta að skrifa um mat eða að bæta nýjum færslum inn á Eldhúsperlur, þetta er svo gaman! Við ykkur langar mig einfaldlega að segja TAKK. Takk fyrir að lesa og takk fyrir að vera svona skemmtileg. Ég hlakka mikið til næsta Eldhúsperluárs með nýjum uppskriftum og tryggum lesendum.

Í tilefni dagsins læt ég hér fylgja með einhverja einföldustu en bestu smákökuuppskrift sem ég hef prófað. Uppskriftin birtist í Vikunni fyrr í mánuðinum svo það er kominn tími til að hún birtist hér. Ég mæli með að þið prófið þessar og vona að þið njótið vel!

Nutella smákökur með sjávarsalti:

200 gr nutella
2 msk hrásykur
1 egg
1 tsk vanilluextract
1 tsk instant kaffiduft (ég mala það í morteli)
1,5 dl fínmalað spelt eða hveiti
1 dl (eða meira) dökkir eða ljósir súkkulaðidropar eða saxað súkkulaði
Gott sjávarsalt í flögum t.d Maldon eða Saltverk

Aðferð: Hitið ofn í 170 gráður með blæstri, annars 180. Hrærið nutella, egg, vanillu, sykur og kaffiduft saman með sleif þannig að það blandist vel saman. Bætið hveitinu út í ásamt súkkulaðidropunum og hrærið þar til það hefur rétt svo samlagast deiginu. Kælið í 15-30 mínútur. Setjið deigið með tveimur teskeiðum á bökunarplötu, stráið örlitlu sjávarsalti ofan á hverja köku og bakið í 7-9 mínútur. Mér finnst betra að baka þær aðeins of lítið og leyfa þeim svo að kólna. Þá verða þær mjúkar í miðjunni og dásamlegar. Athugið að kökurnar eiga að vera mjúkar í miðjunni. Kælið á grind.

Salsa kjúklingur með Mexíkó osti

nóvember 14, 2013 by helenagunnarsd 12 Comments

Þetta mikla gúmmelaði þykir mér alveg kjörinn föstudags- eða helgarmatur. Ég eldaði réttinn á dögunum og stóð sennilega ekki lengur en 15 mínútur við eldavélina og lét ofninn sjá um restina. Svoleiðis réttir finnst mér svo frábærir, þetta er bæði auðveldara og fljótlegra (og betra) en að panta pizzu! Sósan er bragðmikil svo ef þið eða börnin ykkar eruð mjög viðkvæm fyrir sterku bragði er um að gera að nota milda salsa sósu og jafnvel hægt að skipta Mexíkó ostinum út og nota papriku eða pepperoni ost í staðin. Okkur þótti þetta hins vegar alveg mátulega bragðmikið, meira að segja þeim fimm ára.

Salsa kjúklingur með Mexíkó osti (fyrir 6):

6 kjúklingabringur
1-2 msk olía eða smjör
Krydd, t.d chilli explosion eða önnur góð kryddblanda
1 stór krukka (350 gr) salsa sósa
1 askja Philadelphia light rjómaostur
1 Mexíkó ostur, smátt skorinn
1/2 kjúklingateningur
Nokkrar tortillaflögur
1 dl rifinn ostur
Smátt saxað ferskt kóríander (má alveg sleppa)

Aðferð: Hitið ofn í 180 gráður og kveikið undir pönnu á meðal-háum hita. Skerið bringurnar í tvennt, kryddið og steikið upp úr smjöri eða olíu þar til bringurnar hafa brúnast. Leggið kjúklinginn í eldfast mót. Hellið salsa sósunni á pönnuna ásamt smátt skornum Mexíkó ostinum og rjómaostinum og hálfum kjúklingateningi. Setjið 1 dl af vatni í salsakrukkuna, lokið á og hristið og hellið á pönnuna. Hitið sósuna þar til allt bráðnar en það er allt í lagi að hafa smá Mexíkó osta bita í henni, bara betra. Hellið yfir kjúklingabringurnar. Stráið yfir rifna ostinum og nokkrum lúkum af muldum tortillaflögum. Bakið í 20 mínutur. Stráið smátt söxuðum kóríander yfir og berið fram með tortillaflögum, gróft skornum tómötum og avocado. Það má líka gjarnan bera þetta fram með hrísgrjónum, brauði eða salati.

Að gefa góðgæti… Rauðrófu chutney með eplum og engifer

nóvember 11, 2013 by helenagunnarsd 3 Comments

Það er langt síðan ég byrjaði að huga að jólagjöfunum, eða svona á minn mælikvarða að minnsta kosti. Ég byrja venjulega að huga að gjöfunum í ágúst og fer þá að líta í kringum mig og finna hugmyndir að sniðugum gjöfum. Mér þykir aðdragandi jóla og undirbúningur þeirra alveg dásamlegur tími og iða í skinninu að geta byrjað. Allt of oft hefur desember farið í próflestur og mikið stress en þar sem svo verður ekki núna hlakka ég alveg sérstaklega mikið til aðventunnar og alls sem henni fylgir! Ég er til dæmis búin að skrá mig á jólanámskeið hjá Salt eldhúsi í byrjun desember og mikið sem ég hlakka til að eyða kvöldstund þar og upplifa dýrðina sem ég hef lesið um svo oft en aldrei prófað. Gjafabréf á námskeið hjá Salt eldhús væri nú ekki galin jólagjafahugmynd!

Eins og mér þykir gaman að rölta um miðbæinn og jafnvel verslunarmiðstöðvar þykir mér fátt eins stressandi eins og að æða um götur og ganga á síðustu stundu í óskipulegri leit að jólagjöfum. Ég myndi miklu frekar vilja vera heima í eldhúsinu mínu og búa til eitthvert góðgæti til að gefa fólkinu mínu. Og sem betur fer, þá kunna nú flestir vel að meta það að fá heimagert góðgæti. Eitt af því sem er upplagt að búa til og gefa eru sultur eða chutney ýmiskonar. Ég notaði tækifærið um daginn þegar mamma var með smá veislu og bjó til sérlega gott rauðrófu chutney með eplum og engifer. Jólalegra getur það varla verið og það var líka svo einfalt! Chutneyið geymist vel í ísskáp í fjórar vikur svo það er upplagt að búa það til um miðjan desember ef gefa á í jólagjöf. Það er einstaklega gott með ostum og sömuleiðis með köldu kjöti, t.d skinku eða kalkún.

Rauðrófu chutney með eplum og engifer (Lítillega breytt uppskrift frá Nigella´s Christmas Kitchen)

500 g hráar rauðbeður/rauðrófur, flysjaðar og smátt skornar
1 kg epli, flysjuð og skorin smátt (ég notaði Pink lady epli)
275 g rauðlaukur, smátt saxaður
2.5 cm engiferrót, rifin eða mjög smátt söxuð
50 gr þurrkaðar apríkósur, skornar smátt
350 g ljós púðursykur
2 tsk Maldon salt eða 1 tsk fínt salt
1 tsk Allrahanda krydd
600 ml rauðvínsedik
100 ml vatn

Aðferð: Setjið allt í frekar stóran pott. Kveikið undir og hleypið suðunni upp, lækkið þá aðeins hitann og látið malla undir loki í eina klst, hafið lokið skakkt á pottinum svo gufan sleppi aðeins út. Hrærið af og til. Eftir eina klukkustund takið þá lokið af, hækkið aðeins hitann og látið sjóða án loks í 30 mínútur. Þá ætti chutneyið að hafa þykknað og um það bil helmingurinn af vökvanum gufað upp. Setjið á hreinar krukkur. Ég fyllti sjö meðalstórar krukkur, passið bara að eiga nóg af krukkum. Geymist í ísskáp í fjórar vikur.

Bröns? – Bestu uppskriftirnar..

nóvember 9, 2013 by helenagunnarsd Leave a Comment

Að bjóða fólki í bröns er eitthvað það skemmtilegasta sem ég geri. Vakna snemma á laugardags- eða sunnudagsmorgni og dunda í eldhúsinu í kyrrðinni þykir mér alveg einstaklega notalegt. Það er næstum því takmarkalaust hvað hægt er að bjóða upp á í slíkum matarboðum og um að gera að gefa hugmyndafluginu lausan tauminn. Mér finnst samt ágætt að hafa eitt í huga þegar fólki er boðið í mat, hvenær dags sem það nú er. Það er að hafa fáa en þeim mun betri rétti í boði.

Það er ekki þess virði að vera á hlaupum við að búa til 17 sortir af smáréttum, bakkelsi eða elda fimmréttaða máltíð og vera svo ein taugahrúga þegar gestina ber að garði. Svo var sumt kannski ágætt en annað ekkert spes. Nei, fátt en gott er lykilatriði að mínu mati og svo er það miklu, miklu einfaldara. Ég tók saman nokkrar af mínum uppáhalds bröns uppskriftum og hvet ykkur til að prófa einhverjar þeirra. Mér finnst ágætt að hafa á bakvið eyrað að búa til frá grunni eina sæta tegund og eina ósæta fyrir svona bröns matarboð. Kaupa svo gott álegg og osta, skera niður grænmeti og ávexti, hella upp á kaffi og setja góðan ávaxtasafa í fallega könnu með klökum, kveikja svo á kertum og dúka borð. Þá er komin þessi fína veisla án mikillar fyrirhafnar.Enskar spariskonsur trjóna ennþá á toppnum sem uppáhalds uppskriftin mín á Eldhúsperlum. Þær bráðna í munni og eru einu númeri of góðar. Ég geri þær á hátíðisdögum eins og páska- og jóladag og allir sem smakka þær kikna í hnjánum. Brúnkur Nigellu – Ég hef ennþá ekki smakkað þær betri. Þetta er spari og fullkominn sætur endir!Að bjóða upp á bökur í matarboði er snilld því þær má gera daginn áður og velgja upp eða borða stofuheitar. Brokkolíbaka með geitaosti er bæði einföld og ákaflega góð!Þessar hindberja- ostaköku múffur með hnetumulningi hafa ekki fengið næga athygli að mínu mati, þær eiga svo miklu meira skilið. Prófið þær og látið sannfærast.Egg og beikon saman í bolla með osti. Óskaplega gott, fljótlegt og getur ekki klikkað. Berið fram heitt eða bakið með góðum fyrirvara og hafið stofuheitt. Vöfflur – ekki hvaða vöfflur sem er, heldur bestu vöfflur í heimi. Þær má bera fram með ferskum berjum, sírópi, hunangi, nutella, bönunum.. möguleikarnir eru endalausir.Einfaldar kotasælubollur eru sannarlega einfaldar. Skál og skeið er allt sem þarf í þessar og ekkert ger eða lyftivesen. Nýbakaðar bollur eru alltaf góðar.Bruschetta með tómötum og mozarella er einfaldur en einstaklega góður réttur á bröns borðið. Gaman að bera fram eitthvað létt og öðruvísi og setja smá sumar á disk.

Þessar dásmlegu osta- og graslauks skonsur eru skuggalega góðar og bragðmiklar. Bornar fram með silkiskorinni góðri skinku og gúrkusneiðum og allir verði hamingjusamir. Þær eru frábærar!

Bjóðið nú fólkinu ykkar í bröns og hafið það huggulegt!

Eldhúsperlur í Vikunni

nóvember 7, 2013 by helenagunnarsd 1 Comment

Í Vikunni sem kom út í dag má finna fimm glænýjar og freistandi uppskriftir frá Eldhúsperlum. Uppskriftirnar eiga það allar sameiginlegt að vera í miklu uppáhaldi hjá mér og mínum en hafa þó ekki birst hér á blogginu. Þar má finna uppskriftir af tveimur tegundum af smákökum, hafrakossum með kremi sem láta mann næstum roðna og mjúkum Nutella smákökum með sjávarsalti sem eru í senn einhverjar einföldustu en bestu smákökur sem ég hef smakkað.Auk þessu eru tvö ný og spennandi salöt og rjúkandi dásamleg frönsk innbökuð lauksúpa full af ást og osti og eiginlega aðeins of góð á köldum vetrarkvöldum. Ég mæli því eindregið með því að þið nælið ykkur í eintak mín kæru og prófið eitthvað af nýju uppskriftunum.

Chilli og sítrónu kjúklingur með marokkósku kúskús salati, möndluflögum og apríkósum

nóvember 4, 2013 by helenagunnarsd 2 Comments

Ég hef játað mig sigraða og verð nú að horfast í augu við myrkur á kvöldmatartíma. Þar sem ég hef ekki tök á að elda mat eða baka á daginn nema einstaka sinnum er þetta óhjákvæmlegur fylgifiskur vetrarins. Mér þykir bara svo gaman að deila með ykkur uppskriftum þegar vel tekst til að ég læt mig hafa það að mynda matinn undir eldhúsljósunum. Þið harkið bara af ykkur. Þessi kjúklingaréttur flokkast sannarlega undir mat sem tókst vel. Sunna systir sagði mér á dögunum frá kjúklingarétti sem hún hafði fengið hjá vinkonu sinni, rétturinn var svo góður að hún hafði ekki getað hætt að hugsa um hann.

Það er skemmst frá því að segja að aðeins eru nokkrir dagar síðan hún sagði mér frá réttinum en samt er ég búin að elda hann tvisvar. Þetta er nýjasta æðið! Ég get svo svarið það. Rétturinn er ótrúlega einfaldur en galdurinn er marineringin á hann. Chillimaukið Sambal oelek blandað saman við dijon sinnep og sítrónu er hættulega góð samsetning og eiginlega ávanabindandi. Ég get því ekki annað en þakkað Árdísi vinkonu fyrir hugmyndina að snilldarmarineringu á kjúkling og mælt með því að þið prófið. Ég bjó til marokkóskt kúskús salat sem meðlæti í þetta skiptið sem mér fannst smellpassa við bragðmikinn kjúklinginn.

Kjúklingurinn (fyrir 5):

1 kg úrbeinuð kjúklingalæri
2 msk Sambal oelek chillimauk
1 msk dijon sinnep (ég notaði hunangsdijon og venjulegt til helminga)
2 msk ólífuolía
1 tsk gott sjávarsalt
Nýmalaður svartur pipar
3 msk fetaostur
1 sítróna skorin í báta

Aðferð: Hitið ofn í 200 gráður. Hærið saman chillimauki, dijon sinnepi, ólífuolíu, salti og pipar. Makið þessu vel á kjúklingalærin og leggið þau í eldfast mót. Stingið sítrónubátum inn á milli kjúklingabitanna, stráið fetaostinum yfir og bakið í 30 mínútur. Á meðan kjúklingurinn er í ofninum gerið þið svo kúskúsið tilbúið.

Kúskús og meðlætið:

200 gr kryddað kúskús
10 þurrkaðar apríkósur
50 gr ristaðar möndluflögur
2 tómatar skornir í grófa bita
1 lítill rauðlaukur skorinn í þunnar sneiðar
1/2 rauður chilli smátt skorinn
Ferskt saxað kóríander eða steinselja til skrauts (má sleppa)

Aðferð: Eldið kúskúsið skv. leiðbeiningum á pakkanum. Ég hellti því bara í eldfasta mótið sem ég notaði til að bera matinn fram, stráði apríkósunum yfir og hellti sjóðandi heitu vatni þar til rétt flaut yfir. Ristið möndluflögurnar á þurri pönnu en gætið þess að brenna þær ekki. Hafið pönnuna á meðalhita. Þegar kúskúsið er tilbúið, hrærið það upp með gaffli og stráið möndlunum yfir. Leggið kjúklingalærin ofan á kúskúsið, hellið soðinu úr fatinu yfir og kreistið bakaðar sítrónurnar líka yfir. Dreifið tómatabitunum og rauðlauknum yfir að lokum og stráið e.t.v yfir ferskum kóríander eða steinselju, möndluflögum, chilli og smá fetaosti.Berið fram og njótið !

Kryddkaka á hvolfi með eplum og karamellu

nóvember 1, 2013 by helenagunnarsd 2 Comments

Stundum er svo erfitt að ákveða sig. Það var einmitt þannig með þessa köku sem ég gerði á dögunum. Ég gat ekki ákveðið hvort ég ætti að baka gamaldags og ávalt góða kryddköku eða eplaköku sem er í einstaklega miklu uppáhaldi hjá manninum mínum. Ég gerði því það sem mér fannst á þeim tíma það eina rétta í stöðunni og bakaði köku sem sameinaði báðar kökurnar. Og já, bætti karamellu við. Ég hef allavega ekki ennþá rekist á köku sem verður verri af karamellu svo þetta hlaut að enda vel. Kakan er mjúk með frekar hefðbundnu kryddkökubragði og eplin með karamellunni gera svo útslagið. Ilmurinn á heimilinu getur svo varla orðið betri en þegar svona dásamlega krydduð eplakaka bakast í ofninum. Gæti jafnvel verið pínu jólalegt. Það má, enda kominn nóvember! Prófið þessa og gleðjið fjölskyldu og vini með notalegri köku.

Kryddkaka á hvolfi með eplum og karamellu:

2-3 epli (fer eftir stærð)
280 gr fínmalað spelt eða hveiti
100 gr hrásykur
2 tsk matarsódi
1 tsk vínsteinslyftiduft
1/2 tsk salt
2 tsk kanell
1/2 tsk engifer
1/4 tsk negull
1/4 tsk múskat
1 msk kakó
3 dl ab mjólk eða súrmjólk
100 gr brætt smjör, brúnað
2 egg
Karamella:
4 msk smjör
2 dl púðursykur
2 msk rjómi
2 msk hunang eða síróp
1/2 tsk sjávarsalt
1 tsk vanilluextract
1/4 tsk kanill

Aðferð: Hitið ofn í 170 gráður með blæstri. Smyrjið smelluform og setjið smjörpappír í botninn. Ef formið ykkar á það til að leka setjið þá álpappír utan um formið þar sem karamellan gæti lekið út. Flysjið eplin og skerið í sneiðar og raðið fallega í botninn á smelluforminu.

Brúnið smjörið í litlum potti. Hér má sjá góðar leiðbeiningar um hvernig á að brúna smjör. Ef þið nennið ekki að brúna smjörið er líka fínt að bræða það bara. En ég vil samt taka það fram að brúnað smjör gerir ALLT betra. Takið smjörið af hitanum og leyfið að kólna.

Setjið innihaldið í karamelluna í pott (sama og þið brædduð smjörið í óþarfi að þrífa hann á milli) og bræðið allt saman við meðalhita þar til sykurinn er allur uppleystur. Hellið helmingnum af karamellunni yfir eplin og geymið hinn helminginn þar til síðar.

Hrærið öll hráefnin í kökuna saman. Fyrst þurrefnin og svo eggin, súrmjólkina og smjörið. Ekki hræra of lengi, bara þannig að allt blandist saman. Deigið á að vera frekar þykkt. Dreifið kökudeiginu yfir eplin og bakið í 45 mínútur. Leyfið að kólna í 10-15 mínútur. Losið kökuna frá hliðunum með hnífi og hvolfið henni svo á tertudisk. Hellið restinni af karamellunni yfir og berið fram.

Archives for nóvember 2013

Footer